跟他們在一起的時間好像過得特別快,在商場多逛了一會就四時多了,我們決定到學校附近找位置交換禮物。

卓行今天只揹了一個小背包,看起來沒有裝很多東西,所以我想他不會送公仔之類給我,可能是小飾物,不然就是文具、零食,希望不會是拿家中不要的東西給我吧!

我一直跟在他身後,很想看穿他的背包。

「我地點換法啊?即場拆禮物定返去先拆?」

「返去拆!唔好依家拆!」



卓行的聲音嚇了琪姐一跳,他好像很害怕要即場拆禮物的樣子。

「你係咪送啲咩垃圾比我,驚比我鬧,所以唔想依家拆禮物?!」

我裝作生氣的看着他,他抓抓頭,有點不知所措。

「唔係喇...咁聖誕禮物緊係boxing day先拆...」

「肥仔唔會咁衰嘅~不過依家唔拆我地就咁換又好似無咩意思,不如大家估下係咩禮物先,再留返聽日拆好無?」



Paula的提議不錯,我們便圍了一個圈,按照交換禮物的次序(如下),坐在球場旁邊。
[卓行>我>Jessie>Paula>謙少>琪姐>卓行]

「咁我地拎左份禮物出黎先,逐個估下啦!」

地上放了六份大小形狀都不同的禮物,最奇怪的可算是謙少那份,用報紙包着,比較像廢紙。

「不如Jessie你估左我送咩比你先啦,我諗唯獨係我呢份禮物要依家拆,哈哈!」

「ummm...要依家拆嘅,唔通係食得嘅?甜品?」



「都...算係嘅,係甜嘅~」

Jessie拿起禮物,輕輕一搖,露出微笑。

「我知喇,曲奇餅!你親手整㗎?」

她打開盒子,有九塊英文字形狀的曲奇,正正是「MERRY XMAS」。

「係啊,我同清清琴日整左一個晏就㗎,有三種口味,我試過唔會食到肚痛嘅,哈哈!」
「另外我都整左比大家,每種口味各一,試下啦~」

我拿出五袋透明袋子,送給他們。

「嘩,咁好㗎咩你~」


「多謝你啊芯言!」
「好彩有你呢份禮物,我諗謙少比我嗰份都...」
「睇唔出你識整嘢食喎。」

他們對於我這份神秘禮物相當滿意,不知清清的禮物順利送出沒有呢?可能二人已經手牽手在逛街看燈飾吧,我偷看手機一眼,還是未有訊息。

「聖誕節大家開心就好啦!下一個,Paula應該會估到Jessie送咩嘅,你地咁熟大家。」

Jessie準備的禮物是一個長方形小盒子,我猜大概是小飾物。

「我諗我估到,上次同佢行街,我睇中左條手鏈,以佢性格一定會買比我做禮物,哈哈! 」

「唔知㗎,可能唔係呢~」

Jessie意味深長的一笑,她保證Paula一定會喜歡這份禮物。



「Paula,你係咪畫左張聖誕卡比我咋?」

謙少看到地上的信封,顯然有些失望,但還是勉強露出笑容。

「你唔想收到我嘅卡咩?」

Paula配合地裝作失望,謙少見狀連忙說不,想了一想。

「我咁大個仔都未收過女仔送嘅禮物,所以點都好,多謝你~」

謙少突然很感觸,我和卓行在旁看着就覺得很好笑,他知道這份禮物是甚麼後,一定會興奮得跳起來吧。

「我都未收過男仔送嘅禮物,但你呢份真係...我係咪可以直接扔左佢...」



琪姐拿着報紙包着的禮物,禁不住嘆氣。

「咩啊!係你話想要我先買比你㗎!」

「係...耳筒?」

琪姐有些驚訝,搖一搖手中的報紙球。

「唔知啊,唔要我自己用。」

謙少作狀要收回,琪姐立刻收好道謝,臉上露出一個很少女的表情,好像收到情人送的禮物而心花怒放的笑容。

「至於我送比肥仔嘅禮物,係好實用嘅嘢~」

「我會成日用到?」



「你應該會,係有保護作用嘅。」

「唔通係護身符?」

琪姐白他一眼。

「講笑姐,我估係做運動可以用嘅?」

「好接近,拆完禮物話我知用唔用得着啦~」

「多謝。」

然後,卓行拿起他面前的長方形扁身盒子,遞給我——



「聖誕快樂。」