「咁所以,你哋做咩事?」

我們再次坐下,我慣性拿起眼前的咖啡杯,即使早已被我喝光了,準備聆聽大概是說來話長的故事。

「簡單嚟講,琪姐同我表白,但我拒絕咗。」

「...我係咪錯過咗好多嘢?」

的確我錯過了很多,這樣想來,我和他們的緣份其實只有短短的兩個月。縱使本來就跟琪姐同班,但卻沒有機會混熟,謙少就更加是不認識。好想知道,他們人生的故事,是不是因我意外介入而起了變化,我為他們留下的是快樂還是心痛的伏線呢?



「其實我都好驚訝,聖誕突然同我表白...你知啦,一直以來當大家都係好兄弟咁嘛...Jessie先係我女神你哋都知咖...」

「係啫,但你對琪姐真係一啲嘢都無?」

「咁就算有都一早過咗啦,大家已經咁熟,要一齊點解唔早啲,時間耐咗就唔想打破呢種關係。」

「可能係無契機姐...」

卓行若有所思的回應,謙少馬上就接話。



「無契機咪啫係無機囉。老套啲講,咪係wrong timing囉。」

「係嘅,人越大越明白時機有幾重要。」

卓行聽到我的回應,不自覺地抿着嘴,視線再沒有看我們,彷彿心思已經不在這裡。

「所以,就係咁囉,咪唯有拒絕佢...其實我諗阿琪都知,我對佢唔係愛情。」

「喔...咁嗰日聖誕節,琪姐其實係等你嘅回覆?」



「我諗係掛,但我嗰日無覆佢...等到今朝我先打咗一段嘢同佢講清楚。」

「haha佢邊有咁快覆你吖,你唔洗望住個電話喇。」

「你都啱嘅...但我都唔知點,好怕我哋嘅關係變得好奇怪。」

「我諗琪姐選擇講出嚟,一定係經過深思熟慮。女仔唔似得男仔咁一股衝勁話去就去,我諗佢考慮過嘅嘢一定比你多,總會有佢嘅原因。」

「係嘅...同佢傾計佢總係比到好多inspiration我,有時諗唔通嘅嘢,佢一講我就比佢點醒咗咁。」

「wuuuu inspiration,勁啦,放心啦,無咩嘅。」

「食屎啦你。唉講完喇,行啦,講到我都餓。」

「好,明晒喇,行啦。」



謙少收拾好東西後,我們就往下層的快餐店吃下午茶,卓行一直跟在後,也沒有再說甚麼,在想事情吧。

「我去一去廁所,你哋坐低先。」

「洗唔洗放低袋先?」

卓行終於開口,卻依然是呆掉的狀態,倒是他變得心不在焉了。

「errr...唔洗喇,你哋坐啦。」

女廁長年都要排隊,人龍竟然還排出洗手間外,沒事可做,我便拿出電話查看,才發現收到琪姐的訊息,這麼巧!

芯言 你得唔得閒啊? 13:24
我出咗去溫書xd做咩事啊? 15:07




我總不能表現出我已經知道發生甚麼事,還是讓當事人親口告訴我比較好。

喔...咁你聽日得唔得閒啊haha
一齊食個飯?
 15:08
好啊聽日lunch吖 15:08


好 唔阻你喇咁 15:08

我收起電話,繼續漫長的等待。