一齣歌劇剛好落幕,演員謝幕後各自退場離開,崔翼望和Peter帶著滿足的笑容在繼續回味。


「醫生你真係好,帶我嚟呢個咁美好嘅「極樂」世界,又介紹一套咁精彩嘅表演畀我!」Peter對崔翼望連番道謝。


「唔使咁客氣,最緊要大家都可以幸福!」


「等我都要諗下住喺邊個單位,呢到咁大都有排搵!哈哈!」Peter已經完全成為了「極樂」的居民。






「Peter!聽唔聽到呀?」Peter腦中突然出現一把女聲。


「係邊個?邊個講緊嘢?」


「咩事?咩邊個講嘢?」崔翼望疑惑地問。






「有把聲,喺我個腦到講嘢!個感覺好奇怪!」Peter發狂抓著自己的腦袋。


「唔好理佢,自然會消失。」崔翼望開始緊張。


「係我呀,係Marla呀!」那把聲音再次出現。






Peter聽到Marla這名字後,呆呆站在原地,周圍聲音猶如斷了線般。


「Peter!Peter!你做咩呀!」崔翼望呼喊呆若木雞的Peter。


「你如果聽到嘅話,我想同你講,我地已經搵到令你醒翻嘅方法啦!要撐住等我地過嚟呀!唔好畀崔翼望傷害你呀。」Marla的聲音直接打在Peter的腦中。


崔翼望搖晃Peter的身體,想喚醒失神的他。


「醫生.....」Peter呼吸錯亂,身體正在顫抖。






他一方面已經馴服於醫生的摩下,另一方面對腦中的聲音感到極度困惑,正在痛苦掙扎著。


「你冷靜啲先,有咩事我地慢慢講,你知我係大家嘅醫生。」崔翼望露出微笑。


Peter抬頭看著崔翼望的雙眼,不解何故有種黑暗冰冷的感覺,然而腦中的聲音卻像在這感覺中帶出溫暖和光。


「對唔住,醫生。」

Peter推開了崔翼望,

「雖然你係我地嘅恩人,但係我....我....」






「仲有咩好猶豫?你係「極樂」嘅居民!」崔翼望想說服Peter。


「呼.....」

Peter深呼吸,停止顫抖,用堅定的眼神說,

「我選擇相信腦入面嘅聲音。」


「有咩可能.....皮皮嘅能力應該已經發動完成....無論如何都冇辨法解除。」醫生嘴裡嚷嚷自語。


「腦入面把聲同我講,已經搵到令我醒翻嘅方法,即係我而家係夢到。」






「你明明頭先仲明白自己喺現實,點解憑一把聲就咁肯定?」


「因為把聲係來自我朋友,有時候朋友講嘅嘢幾荒謬都好,你仍然會去相信佢。」更何況她是Marla。


「你....即係想點!」崔翼望臉色一變,現出本相。


「我唔會畀你捉到!」話畢,Peter便馬上找出口打算逃跑。


「哼,只要你身上仲有單杖蛇記號,走去邊都避唔到我!」






Peter手臂上的單杖蛇記號發出亮光。


「你能力只係追蹤到我喺邊,咁我只要拖住時間就得啦。」Peter回應。


「如果係咁簡單咁我就唔係崔翼望啦。」

他發出一個陰森笑容,

「你知唔知我個名點解?」


「.....我唔想知。」Peter不敢鬆懈。


「順我者昌,逆我者亡。」

他扭動頸部,活動全身筋骨,

「崔逆亡。」


 崔翼望話音一落,舉起左臂,作了向下拉的動作。


Peter頭頂上出現三個若隱若現正的方格,方格裡圖案不停轉動著,只捕捉得到圖案殘影,仿如老虎機一樣。


登,登,登。方格中抽出了三種圖案,胃、紅心、3。


「!?」Peter掩著肚,跪在了地上。


「抽中紅心,個胃係咪好痛呢?」崔翼望再一腳伸向Peter,把他踢倒在地。


只見Peter出不了半點聲,在地上蝸著身體,痛苦不堪。


「呢種支配感真係好爽,雖然「極樂」係一個唔會有病痛嘅理想世界,但呢個能力就係賜畀我制裁你呢啲反抗者。」崔翼望像是著了魔一樣,仰天大笑,「我係無敵㗎!」「嗄...嗄....」Peter拭去嘴邊剛才因痛楚而流下的唾液,站立起來。


「話咁快就3分鐘。」崔翼望用輕藐的眼神看著Peter,再次揮動左臂。


登,登,登。這次抽出的是,手臂、楷磚、5。


「竟然係手臂,仲要楷磚,算你好彩.... 」崔翼望說。


「........」Peter流下冷汗,手臂像是被輕輕劃一了刀,帶著刺痛。


「好奇怪我用咩能力呢?」

崔翼望開始講解他的能力,

「逢係畀我落咗單杖蛇記號嘅人,除咗可以知道位置之外,仲可以發動呢個老虎機能力,揀出三樣嘢,分別係部位、痛楚程度、持續時間(分鐘)。」


崔翼望的自大狂妄,使他就算在敵人面前也毫不忌諱地說出能力,他認為「極樂」是屬於他的世界,在這裡他就無人能擋,成為一個獨裁者。


「即係我今次會持繼5分鐘....」語畢, Peter馬上尋找出口打算逃跑。


崔翼望也跟上步伐,追在Peter身後。


Peter眼尾瞄到他一直緊貼不放,心中暗想,崔翼望既然有如此厲害的能力,又為何懼被我掉下?


只要再發動能力便可。
跑過之後,驚見在劇院中的出口全數已被鎖上,崔翼望也逐步迫近自己,手臂的痛楚也已經消失。


「我講過你走唔甩。」崔翼望再次把左手舉高。


「但係你又好緊張咁追住我?你嘅能力一定有弱點!」


「我講過我係無敵。」崔翼望臉色變得嚴肅,把手拉下。


Peter再中能力,頭、梅花、4。他頓時頭昏腦花,頭部有如被針扎一樣抽痛著。


「你放棄啦,你地唔會鬥得贏我地。」崔翼望抓起Peter的頭髮,盯著他痛苦的臉。


「我都係咁認為......」

伏—!

Peter猛然向上一拳,擊中崔翼望的下巴,


「如果...嗄.....係得我一個嘅話.....」


被擊中的崔翼望感到一陣暈眩,站立不穩。


Peter趁機忍痛跑開,與他拉開距離。跑跑跌跌來到了舞台上,想要找些東西來投擲。


「呢到得啲衫褲,有用嘅都得啲樂器仔....嗰邊係咩房?」

Peter看見控制室三隻大字,馬上靈機一觸,

「唯有一試!」


劇院的燈光驟然全滅,他雖能用單枚蛇記號來辨識Peter的位置,但在這個密封空間伸手不見五指,崔翼望在漆黑一遍的環境下四索,變得寸步難行,左腳一踏絆倒椅子,右腳一踏踩空樓梯。


「就由佢繼續慢慢行過嚟啦,等我有多啲時間。」

Peter正在籌備對付崔翼望的方法,但途中,他忽地想到崔翼望能力的限制,

「冇錯,應該係咁!」


透過Marla的能力,她、Hugo、阿蓮,三人成功聚頭。


「Marla,你過一過嚟先。」Hugo示意有話想跟Marla說。


「做咩事?」Marla和Hugo站在一個離阿蓮較遠的位置。


「嗰條友,真係信得過?」Hugo問。


「信得過呀,你都知我嘅想像能力係咩架啦,唔會呃到我嘅~」


「嗯....好。咁我就放心啦。」他們回到阿蓮身邊繼續討論。


「而家仲差Gary未嚟.....」Marla四處張望。


「我諗佢仲同皮皮戰鬥緊,嗰女人嘅能力係比較棘手。」阿蓮說。


「咁我地唔好浪費時間等佢,Marla你通知佢戰鬥一完就直接去劇院。」

Hugo提意,

「頭先同條IT毒撚戰鬥嗰時,係佢啲天眼見到Peter同崔翼望喺劇院。」


就這樣,三人快步前往劇院營救Peter。


「Peter!你而家投降現身嘅話刑罰仲可減輕,但等我親手捉到你嗰陣你就喊都冇用!」崔翼望一碰一跌地繼續接近Peter。


「條友真係痴線....畀佢捉到都唔知會點對付我。」Peter躲進了控制室裡的一個地下房間。


崔翼望的腳步聲逐漸變得清楚,他打開地下房間的門,想找尋Peter手臂上發光的記號。


嘭!

「唔係呢個。」


 嘭!

 「都唔係呢個。」


崔翼望摸黑把一個個在房間的儲物櫃打開,

「個訊號就停喺呢間房,你已經冇可能走得甩!」


「........」Peter躲進了其中一個儲物櫃中,汗流滿臉,屏住了呼吸。


「哼,呢個應該係最後一個。」崔翼望把櫃門打開。


「你食屎啦!」Peter向崔翼望揮出在舞台上撿到的長笛。


「!?」崔翼望的右肩中了重擊。


Peter確實感受到命中了他,心中回想剛剛定下的作戰計劃,

「呢個一係場賭博,以佢咁厲害嘅能力,根本唔使追住我,佢咁樣做只有兩個可能,一係佢發動能力有距離限制,另一個係佢需要見到目標先發動到能力!」


如果崔翼望的能力限制是前者,那麼現在擬定的計劃就會泡湯,幸好這場賭博的勝者是Peter,他更把手臂會發光的記號貼上黑布摭擋光線,在這漆黑環境更有優勢。


「你.....!」崔翼望掩著被打中的右肩。


Peter打算乘勝追擊,繼續攻擊他,再用長笛一棒揮下。


「咩話....!」Peter的一擊竟被崔翼望用手接住。


「你太天真,你唔知雙眼只要經過時間適應,就算係漆黑環境都可以睇到少少嘢咩?」

崔翼望把左手舉高,

「你已經冇棋!」


「嗄!」Peter拿起腳邊潛放好的滅火筒,向崔翼望直接噴灑!


「嗚!咳、咳!」崔翼望被Peter噴得滿身都是白色的二氧化碳,幾乎窒息。


Peter馬上奪門而出,跑回原本的劇院中庭。


「可惡!可惡!可惡呀!點解冇辦法打得低佢!」Peter在黑暗中跑跑跌跌,緊張得要哭出來。


「你仲有咩計?」

崔翼望一柺一柺的走出來,

「你好有頭腦,連我都幾乎畀你逼上絕路,但係呢一刻,所有反抗都要完結,我係「極樂」嘅話事人!」


他左手一揮,Peter頭頂再出現3個方格。頭、葵扇、15。


「哈哈哈哈!係葵扇嘅15分鐘!呢種痛,你會比死更難受!」