我係一個驅魔師，專幫人驅散妖魔鬼怪: 15

「一於就聽晚進行詭校探險隊，睇下個校工咩料到！」

癡線婆。

仲記得入大學嗰陣無玩ocamp，又識唔到朋友，日日自己一個上堂。

「你好呀，我哋group project差一個人，你介唔介意同我哋一組？」

正常都係單丁嗰條友去搵組，但佢哋就主動過嚟撩我一組。





事後知道，原來佢哋好奇我呢個大帥哥（假）點解一個人咁孤僻，所以就試下撩我講嘢。

就咁樣，我哋做咗同學。

但終究亦只係同學，想像中我同佢哋關係並唔係真係咁親密。

落堂之後我打探過，又上過連登睇，的確有人真係去咗嗰間學校探險。

佢哋大多數都係聲稱見到一閃即過嘅鬼影，聽到怪叫聲同風扇聲，仲有人話真係喺課室見到有個校工吊住喺風扇上面。





但除此之外無其他特別。

屏山達德小學、吊頸嶺、長州東堤……香港猛鬼名勝地點數之不盡，日日都有人去呢啲地方，點解唔見佢哋出事？

之前都講過鬼魂原理，係生物死後嘅殘餘能量體，因為失去掌管記憶嘅海馬體，一般嚟講佢哋記憶並不完整。

就算生前係愛因斯坦，死咗可能都連自己係識科學都唔記得。

佢哋可能會依據殘留記憶抱留慾望，並漫無目的咁行動，例如搞下惡作劇，周圍嚇下人咁，無咩危險性。





而且維持佢哋存在嘅能量會隨住時間而消失，就好似放喺室溫嘅冰，唔理佢哋亦唔成問題。

呢單嘢多數係校工死咗記得自己有戀童僻，於是就去搞班小學生，無小學生就去搞嚟探險嘅人。

我對呢單嘢無興趣，唔打算同佢哋一齊去探險。

放學之後，我行去平時去開間café，順便食支煙，同埋去對返穆姑娘張支票做錢。

「驅散黑貓」同「救返張伯」其實係兩個委託，上次得到嘅報酬係以往嘅兩倍。

當我行到café門口前，突然有道黑影飛快撞過嚟——

「哎呀！」

我低頭一望，撞過嚟嘅係一個孭住書包，頭紮髮髻，上身黑色日式道袍外套，下身牛仔短褲，左手拎住電話，右手拎住拂塵嘅少女。





裝扮確實非常奇異，但我本人更在意一件事情——

我張支票跌咗落坑渠罅……