特別採訪—1

「大家好啊,我係神秘台靈異專輯主持人夏舞啊!今日好高興可以請到驅魔師凌先生上嚟同我哋傾偈。」

「你好。」

「我諗好多人都唔瞭解驅魔師係咩職業,不如凌先生同我哋介紹下啊?」

「驅魔師其實同平時聽到嘅道士、神父、僧人、法師諸如此類無分別,唯一唔同嘅係我哋無特別信奉某個宗教,對於我哋嚟講信奉嘅只有知識同事實。」





「咁點樣先可以入行做到驅魔師㗎?」

「機遇巧合……驅魔師唔會開班授徒,有緣自然就做到驅魔師。」

「啊……咁玄嘅,唔通呢種叫種佛系入行法……咁不如請凌先生講下最深刻嘅一次經歷呀。」

「最深刻……有次有個男仔走嚟話佢近排係咁發噩夢……夢見好多肥婆……」

「啊……咁跟住呢?」





「我本來想問佢『你依家係咪歧視肥婆啊?』,但諗諗下係咁易敷衍佢,收咗錢就算。點知……」

「點知……」

「我去到佢屋企,發現佢收埋好多欣宜寫真集……條撚樣真係鍾意肥婆㗎,仲要睇到日有所思夜有所夢……」

「喔喔……凌先生你唔好咁痛苦住。話時話有網友話你成日爆粗,問你壓力係咪好大喎?」

「唔……又唔係嘅,係習性嚟。就好似坊間會有傳言話對住啲鬼講粗口可以嚇走佢哋,同埋鬼片啲神父同惡魔鍾意粗口對鬧一樣,純粹習性嚟。」





「咁你有無試過對方講粗口仲犀利過你?」

「上個禮拜先遇過隻咁嘅魅魔。」

「魅魔?凌先生可唔可以介紹下係咩嚟。」

「係一種源於猶太教嘅魔,中世紀喺西亞同歐洲非常活躍,專門透過夢境同人性交吸取對方精氣,好多神話都有記載,西方甚至將佢解釋為『發春夢』嘅來源。」

「原來係咁……」

「夢魔嘅源頭其實來自一個大家都好熟悉嘅人——亞當嘅第一任老婆莉莉絲,打開機可能知我講邊個。話說佢因為扑嘢時唔鍾意男上女下而離開伊甸園,後來莉莉絲同惡魔結合生咗堆女出嚟,就係魅魔嘅始源。」

「明白。話說好多人都對若兒好奇,若兒其實係咪鬼嚟?」

「你點知若兒?」





「喔,係有個睇到鬼嘅人同我爆料嘅。」

「嗯……」

「你點頭係咪即係代表佢係鬼呀?」

「你問佢。」

「Hello,你係咪叫我呀?」

「原來真係有……我第一次親眼見到鬼。」

「你好似唔係好驚咁。」





「做得靈異專輯主持無得驚呢啲嘅……咁點解若兒你會變成咁嘅?」

「……」

「……」

「Sor……我好似問咗啲唔應該問嘅嘢,你哋唔想講就由佢啦!」

「其實唔係唔想講嘅……不過講完咪即係劇透。」

「我問埋最後一條問題啦……凌仔你係咪真係零仔嚟?」

「……」

「等等!冷靜!你收返埋把刀先!」





「呢度好似有妖魔鬼怪要驅……」

「凌仔佢真係零仔嚟㗎!」

「搵到了,一隻白色嘅鬼魂。」

「救命啊啊啊啊啊啊啊啊啊啊啊啊!」

「喔喔……兩位主角都唔知去咗邊,今次靈異專輯暫告一段落啦!我係主持人夏舞,下個禮拜同樣時間再見!」