特別採訪—2

「又到夜晚十點半,我係神秘台靈異專輯主持人夏舞啊!今晚再度邀請到凌先生上嚟同我哋講驅魔事跡,喺佢身邊仲有隻聽講係黑貓嘅貓妖添!」

「喵喵喵!(傲慢嘅人類,同我跪低!)」

「嗚哇!巧打意呀,凌先生介唔介意抱上嚟畀大家睇下?」

「我唔想掂呢隻衰貓,你自己抱佢啦。」



「喔喔……嗚哇!毛茸茸嘅皮膚,軟綿綿嘅肉感,真係好可愛呀!」

「……(佢好似已經唔記得咗自己本來要做啲咩……)」

「喵喵喵喵喵……(見你摸我我咁舒服,就放過你喇……)」

「咳咳……我哋講返正題先,凌先生話呢隻黑貓係貓妖,咁其實妖究竟係啲咩呢?」

「妖其實係基因比一般動物更加進化嘅生物,可以係更聰明,更強壯,更奇異嘅生物,概括咁講就係動物百科無記載嘅生物。」



「咁呢隻黑貓係屬於邊個類型嘅呢?」

「佢係屬於識得使用法術嘅類型,本體同普通嘅貓無異,但佢哋識得進行俗稱『修煉』嘅能量調和,涉取周圍能量同埋加強自身能量,令自己變得更強大。我哋認知中最熟悉嘅妖怪,包括封神演義同西遊記,其實都係屬於呢種妖。」

「喵!(就係本小姐!)」

「咦?點解佢會唔見咗!」

「呢個就係佢最擅長嘅隱身術,利用能量改變周圍光線折射達到隱身效果。」



「喵喵,喵喵喵喵!(知驚未,呢個係本小姐最拿手法術!)」

「依家又憑空出現返……真係好神奇,原來呢啲睇落咁奇幻嘅法術原來都可以用科學解釋!啱啱聽你咁講,係咪即係有唔會用法術嘅妖?」

「無錯,就好似西方嘅吸血鬼同狼人,佢哋唔識用法術,但身體結構比一般生物更加強大,甚至擁有一啲非常特異嘅能力。」

「哦……原來吸血鬼同狼人都屬於妖。」

「因為吸血鬼同狼人嘅terms係來自西方,同東方概念嘅妖好似格格不入,但實際上佢哋其實存在喺世界各地,喺東亞吸血鬼又被稱為魃,有興趣可以google下。」

「喵喵喵,喵喵喵喵喵!(我要摸摸,死人頭快啲摸我!)」

「凌先生同黑貓感情真係好,唔知你哋平時會唔會玩開人獸呢?」

「……」



「……」

「唔好打我唔好搲我!我知錯喇!一係唔好講妖,不如我哋講下鬼呀,唔知凌先生知唔知最近發生嘅廢校靈異事件?」

「知。」

「聽講入面有隻好可怕嘅吊頸鬼,凌先生可唔可以講解下鬼嘅原理呀?」

「鬼係生物死後嘅殘餘能量體,佢哋依據殘留記憶抱留慾望而行動,當中又分為兩類——亡魂同怨靈。」

「兩者又有咩唔同呢?」

「亡魂只會搞下惡作劇,本身無咩危險性,基本上隨處可見。怨靈係對生前執念過於強烈,加上吸收一定能量而演化成嘅強大靈體,但因為對執念嘅慾望太強烈,失去理性,甚至會做出危害人類嘅行為。」



「就好似我哋平時睇鬼片啲鬼啊……貞子之類咁?」

「無錯,不過講到貞子其實係另一種更特殊嘅存在,但呢個題外話。」

「咁鬼會唔會死㗎?」

「會,佢哋會自然消失,亦可以透過物理手段消滅佢哋。」

「兩者有咩唔同?」

「前者係自然現象,構成鬼嘅能量體會根據熱力學第二定律而漸漸消散,就好似擺喺溫室嘅冰會溶化一樣,另外如果滿足到鬼魂嘅願望,鬼魂亦會自然消散,而後者就係對付某啲強頑怨靈而作出嘅手段。」

「咁佢哋死咗會去邊㗎?」

「萬物歸一,化為虛無。」



「吓!即係……人死咗唔會好似佛家咁佛你老母……唔係,係進入輪迴?」

「當然會輪迴,作為構成萬物內在嘅靈魂。」

「喔喔(一頭霧水,唔明佢講乜)……」

「(如果向夏舞小姐呢啲媒體講出真相,會唔會可以幫陳伯平反到……但始終無證無據,而且媒體力量有限,最重要係警察……)」

「時間都差唔多,咁我問埋最後一條問題喇……凌先生唔玩人獸,咁會唔會玩人鬼情未了?」

「小黑,呢度有隻妖要驅。」

「喵!(收到!)」



「凌先生冷靜啲,有事慢慢講,唔好拎刀出嚟……今晚時間又到,下星期同樣時間我哋……沙沙……再見……沙沙……」(享年22歲)
已有 0 人追稿