我係一個驅魔師，專幫人驅散妖魔鬼怪: 特別採訪—3

「又到神秘台靈異專輯時間，我係主持人夏舞！今晚我哋邀請到道居道士，兼任凌先生嘅首席弟子白寧小姐上嚟呀……請問白小姐你喺度食緊咩？」

「鋒味漢堡呀，你無試過咩？」

「哈哈無呀（我先唔食呢啲垃圾）……我明喇，白小姐一定想講要食飽個肚先有力驅魔呢！不如白小姐講下道士同驅魔師其實有咩唔同？」

「有咩唔同？無咩唔同啊，大家都係識驅魔殺妖，不過驅魔師感覺好似有趣啲。」

「喔，係咁啊……係喇，點解你要拎住棵蔥嘅？」





「你唔好睇小呢棵蔥啊！呢棵蔥其實係一件非常犀利嘅法寶，只要對住惡鬼拎呢棵蔥出嚟，佢哋就會即刻退避三舍。」

「咁犀利，其實原理係點？」

「等等呀……搵到喇，師父話因為蔥蒜擁有某種刺激性嘅分子，可以對某啲妖有奇效，例如殭屍同吸血鬼。」

「原來惡鬼嘅意思係吸血鬼……但通常聽道士係拎蒜頭居多，點解你係拎蔥？」

「因為蔥可以用嚟塞人鼻窿。」





「竟然仲有咁嘅用法！受教了！咁係咪咩蔥都做到，定係經由煉製先可以作為法寶使用？」

「街市十蚊十棵蔥，去菠菜蓮買仲有買十送一添。」

「咁真係一件幾方便嘅道具，普通市民都可以買返幾條旁身。係喇我想問你平時係咪經常同凌先生一齊去驅魔？」

「梗係喇！我哋一齊趕過鬼，又一齊驅散過噩夢！」

「咁你知唔知平時凌先生瞓緊覺，佢身邊隻鬼……即係若兒會做啲咩？」





「做愛做的事掛。」

「咩話！果然……係人鬼情未了！」

「你講咩呀？平時師父會將若兒小姐收埋，俾人困咗成日，咁到師父瞓覺嗰陣正常都會解放自己，想做咩就做咩㗎啦。」

「原來我誤會咗……話說呢集未開播之前，好多男觀眾（毒撚）已經對你呢位驅魔師首席弟子兼任女道士嘅你非常好奇，所以你介唔介意問一啲關於你嘅私人事？」

「嗯，可以呀。」

「咁我想問白小姐三圍係幾多？」

「唔知呀，我自己無度過。」

「你唔介意嘅我可以即場幫你度。」





「無問題呀。」

「……（拎出軟尺）……（度胸圍）……（度腰圍）……（度臀圍）……」

「點呀？」

「喔……白小姐身材真係好，不過諗諗下呢啲私人嘢都係唔應該咁揚咁講出去……（好想跳樓）」

「……（奇奇怪怪……）」

「話說好多男觀眾（毒撚）都好緊張白小姐，因為坊間有唔少專呃人性交轉運嘅神棍道士，所以佢哋好緊張你之前……有無受過一啲非禮待遇？」

「無呀，我三位師兄都好好人，好似大師兄會煮飯我食，二師兄會扮狗仔俾我騎，三師兄仲會俾我發洩，佢會用麻繩將自己五花大綁，然後叫我用皮鞭鞭佢添！」





「麻繩……皮鞭……你知唔知係做緊咩？」

「唔係三師兄想俾我發洩怨氣咩？」

「……（好隱瞞咁解釋畀白寧聽）」

「原來係咁，唔怪得之三師兄次次都笑得咁開心，我以為佢唔想我擔心添。」

「總之……你依家無再做……咁就好……」

「都係，我都唔想次次三師兄俾我打到周身傷痕。」

「我唔係咁嘅意思……算喇，講開呢樣，我反而想知道會唔會有真係需要透過性行為嘅驅魔儀式，例如……捽下面……」

「……（臉紅）」





「Sor，我唔應該問啲咁露骨嘅問題，我都係問返啲正常啲嘅問題喇！之前我聽凌先生講過妖魔鬼怪呢個概念，我想知『怪』係指咩嘢。」

「……（臉紅）」

「等等……點解呢個都要臉紅？我唔明呀？」

「……（臉紅）」

「睇嚟呢個訪問已經繼續唔到落去，唯有我哋下星期同樣時間再見啦！」

「……（臉紅）」

「夠啦！（翻檯）」