我係一個驅魔師，專幫人驅散妖魔鬼怪: 41

非人之物嘅「妖」、超自然存在嘅「魔」、死後靈體嘅「鬼」、異於常理嘅「怪」。

集齊四樣災厄嘅不祥之地。

「如果單純係磁場異常，西貢一帶山區亦有好多。」若兒繼續解釋，「但鎖羅盆村入面，似乎有更危險嘅嘢潛伏。」

「……接受得委託，我就會去。」

「嗰個委託根本無效……其實你知㗎？」





「無效？咩意思呀？」白寧不解咁問。

「無咩意思，嗰個委託係有效，我會幫嗰個男人搵返佢個女，就係咁簡單。」

若兒合上嘴巴，平淡咁望住我雙眼。

「唉，真係無你收……」若兒撳住額頭，「咁就俾我陪住你同小白寧一齊行，至少我可以幫到你哋忙。」

「……對唔住若兒。」





「唔使，我會相信小凌嘅決定。」

我同若兒商議完之後，就繼續前行。

白寧愣望住我哋二人對話，但無多口追問，默默帶住小黑跟喺我哋身後。

「係喇，穆樞機係邊個嚟㗎？」話口未完白寧又問三道四。

「唔關你事，行路啦你。」我簡單回答。





一路上前行，磁場反應愈嚟愈強烈，磁場探測器反應由原先嘅黃色變到最嚴重嘅紅色。

「咁強烈嘅磁場反應，可能性只有一個。」若兒望住部探測器。

——結界。

由強烈而紊亂嘅磁場而形成嘅空間結界。

結界可以分為三類：符結界——喺周圍貼上刻有法陣嘅符紙以形成邊界嘅結界、膜結界——以某樣嘢作為核心而形成嘅結界。

魅魔嘅黑霧，就係以自身作為核心嘅膜結界例子。

除咗靈體本身，亦可以用法陣、符石等工具作為核心。

最後一種係無形結界，既無核心亦無邊界，由地球紊亂嘅磁場自然形成，形狀扭曲。





無形結界喺大自然好常見，近至西貢，遠至百慕達三角，連馬航MH730離奇失蹤事件都係由無形結界引起。

妖魔鬼怪嘅「怪」，並非指某種特定存在，而係所有異於常理嘅自然怪異景象，無形結界就係其中一種「怪」。

「唔……好辛苦……」若兒神情痛苦，身體閃爍不停。

「若兒小姐……發生咩事？」白寧疑問。

「若兒，你返入去先。」我命令若兒。

若兒化成一縷白煙，返到我褸袋入面。

我向白寧解釋：「鬼係由能量形成，會受強烈嘅磁場干擾。」





嘟嘟嘟嘟嘟嘟——

磁場探測器響起警報聲，前方磁場反應達到最高點，而且喺最高點嘅位置之中有個探測唔到任何磁場反應嘅缺口。

「睇嚟嗰度就係結界入口，我哋要把握時間入去。」

「……結界？」白寧疑問。

「你記唔記得我用白紙比喻過唔同空間？」我向白寧解釋，「但實際上白紙唔一定係平滑，皺咗或者爛咗嘅地方，就係結界。」

「即係……扭曲咗嘅空間？」白寧罕有地大腦開竅。

「你今次幾醒下。」

鎖羅盆結界情況極度嚴重，中年男人個女好可能係誤闖結界而失蹤。





如果個女仔係跌咗落山，消防拯救隊會仲有用過我。

但係如果佢係誤闖結界，咁就會係我職責範圍之內。

我哋沿住缺口行去，不過缺口並唔係山徑上，而係側邊被密林遮蔽嘅位置。

撥開樹枝越過密林後，卻去到懸崖邊。

望落去唔係好高，大約十米左右，至少頭唔落地唔會死人。

「我哋……」白寧口震震咁指住下面，「要喺咁高跳落去？」

「嗯。」





磁場探測器顯示缺口就喺懸崖正下方。

「但係……但係……」

「你好麻煩。」我一腳伸落白寧嘅屁股。

一陣尖叫聲響遍山頭，然後我抱起小黑一齊跳落懸崖。

天旋地轉，磁場探測器停止響鳴。

我哋並無預期般高空墜落，喺跌落嘅一瞬間眼前畫面一轉，安全落咗喺一條陌生嘅山徑上。

「哇啊啊啊！師父正衰人！我真係以為會跌死！師父，你……咦？點解……」

「呢度……」

我哋愣望住眼前情景——

因為，太陽正高掛天空之上。