我係一個驅魔師，專幫人驅散妖魔鬼怪: 54

「小明，我哋去玩旋轉木馬好無呀？」

「好呀！我想玩呀！」

白寧帶住個細路周圍玩，仲要揀兒童專玩嘅機動遊戲。

「姐姐，我想睇大熊貓呀！」

「好呀，但我唔知大熊貓邊度有得睇……」白寧苦惱望過嚟，「師父你知唔知？」





「唔知。」

其實小明小朋友根本無玩到機動遊戲，佢只不過係飄喺啲木馬隔籬一齊轉，跟住個火車頭一齊跑，甚至坐喺空嘅碰碰車上面係咁俾白寧撞。

話說白寧長期對住空氣，加上啱啱不停撞空車嘅舉動，已經俾人當咗係癡線婆。

雖然本身都係。

所謂嘅海洋公園之旅，玩咗兩輪過山車之後就結束。





剩低嘅係天真少女幫助迷途羔羊嘅時間，我就無辜做咗苦力跟住佢。

「哇！我第一次見到熊貓呀！」

小明小朋友顯得十分雀躍，衝入去摸盈盈同樂樂。

但盈盈同樂樂好似感知到小明存在，表情驚恐咁匿返入窩。

結果小明小朋友失望而回。





原來熊貓嘅感官探知到靈體，一陣要mark返低先。

之後，白寧又帶咗小明睇海豚，睇完海豚就睇動物園，睇完動物園就睇園內表演。

唔經唔覺，個天已經黑。

「啊……原來咁快就夠鐘要走喇！」白寧愣望住離開嘅人群，「小明，睇嚟姐姐陪唔到你繼續玩——」

白寧講講下，先發現小明已經唔見咗。

「咦！小明呢？」白寧慌忙咁四圍望，以為漏低小明喺人群之中。

「佢已經消失咗。」我拍一拍佢後腦枕。

「消失咗……？」





「你都陪佢玩咗成日，帶埋佢去到出口，就算幾貪玩嘅細路都會攰。」

「佢唔係要搵返佢阿爸阿媽咩？」白寧驚訝咁問。

「佢根本唔係呢個意思。」

白寧一臉不解。

「佢只不過係期待去海洋公園，但蕩失咗路，所以哭爹哭娘嘅小朋友。」

我向白寧解釋。

「更何況亡魂記憶本來就殘缺，佢可能早就唔記得佢阿爸阿媽。」





心裡只有童真嘅細路，一次意外而喪命於此。

「原來……係咁……」

白寧似乎有啲失落。

「傻妹，你幫咗個小朋友，完成咗佢嘅心願。」我微笑住講，「而且唔靠任何人，憑自己嘅能力超渡亡魂，你應該開心先啱。」

白寧呆咗呆。

「你第一次解決鬼怪事件，下次你都要畀心機。」

「……嗯！我會㗎啦師父！」

陰霾從白寧臉上抹去，平日嘅白癡妹返嚟面前。





「我去廁所，等我。」我轉身向廁所行去。

呢個傻妹，寧願犧牲自己生日，都要帶住個細路。

雖然最後只係玩咗兩輪過山車，但呢一日佢經歷嘅嘢比過山車更有價值。

人傻真好。

而且有時望到佢啲白癡嘢，唔知點解低沉嘅心情會一抹而空。

明明晏晝先發生過咁嘅事。

去完廁所出嚟，只見傻妹坐喺度等我，周圍已經無咩人。





再唔走就真係阻住人收工。

就喺我諗住行過去時，我察覺到異樣。

一陣怪異嘅煙霧，非常唔自然咁喺白寧附近集結。

煙霧分散多條軌跡，每條軌跡彷彿帶有意識，逐步向白寧延伸過去！

不好預感從腦海浮現。

第一時間諗到嘅，係霍靜口中嘅連環殺手……！

「傻妹！」

白寧聽到我嘅叫聲，轉過頭望過嚟。

「……師父，做咩——」

分散嘅煙霧喺白寧面前聚集一團，非常劇烈地湧動。

蓬——

煙霧穿過白寧心口。

白寧睜大雙眼，眼神驚愕望向我。