我係一個驅魔師，專幫人驅散妖魔鬼怪: 59
「小凌，右邊！」
我將太陽燈電筒照向右邊，怨靈頓時淒厲大叫。
若兒趁機喺怨靈腳底完成法陣，消滅怨靈身上瘴氣，將怨靈驅散。
「成功喇……」我大汗淋漓企喺原地喘氣。
「做得好。」
若兒拎咗條手巾幫我抹去額頭上嘅汗。
「雖然未到完美，但都叫做合格。」
據若兒所講，呢個世上僅有少部分人擁有天生望到靈體嘅眼睛，俗稱「陰陽眼」。
雖然坊間有唔少開眼嘅方法，但實際上望唔望到靈體係取決於視錐細胞，普通人除咗借助外物並無任何方法可以望到靈體。
我係屬於無陰陽眼嘅人，而若兒就有。
聽講穆樞機除陰陽眼外，擁有比若兒更特殊嘅體質，不過若兒無提及過。
「雖然你無陰陽眼，但只要畀心機一樣做得到。」
「哼！我一定會成為一個稱職嘅驅魔師！」我向若兒宣言。
「有決心係好事，不過比起我仲差得遠。」若兒彷彿安慰咁搭我膊頭。
「唔好再搭我膊頭，我已經唔係細路！」
「但喺我眼中，你永遠都係個細路。」
若兒派咗張好人卡畀我……唔係，應該係「弟弟卡」先啱。
最初我話成為驅魔師時若兒非常驚訝，佢擔心會勾起我過去嘅事。
「點解小凌你想做驅魔師？」嗰陣若兒咁問我。
「因為……我想盡可能去救助其他人，唔想再有同樣嘅悲劇發生喺其他人身上。」
若兒呆咗呆。
「小凌……你真係決定要咁做？」若兒再一次問。
「係。」我堅決點頭。
若兒猶豫咗陣，最後決定收為我徒，正式教授所有有關驅魔師嘅知識畀我。
「呢本係我特登為你寫嘅筆記。」若兒拎出一本簿皮非常殘舊嘅筆記簿。
「咁舊嘅本嘢。」
「作死你啊！」若兒一拳打落我個頭，「竟然話我特登寫畀你嘅嘢舊！你知唔知我寫咗幾耐，同埋簿皮舊舊地先更加有feel，你懂不懂？」
「不懂。」
同若兒吵鬧時，一張相從筆記簿跌出嚟。
我執返起張相，望住張相講：「呢張相……」
「係小凌拜我為師時影嘅相，我特登拎起曬相店曬出嚟㗎。」
「無聊。」
然後，我個頭又食多下拳頭。
我跟隨住若兒完成各種委託，慢慢熟習驅魔師嘅工作。
而不知不覺，我對若兒萌生出另一種情感。
並非恩人，並非父母，並非家人，並非師父……
一種難以言喻，卻非常在意嘅感覺。
我諗……
我……可能鍾意咗若兒。
但我同若兒年齡相差十幾年，似乎……無咩可能。
我……會唔會太妙想天開？
但如果我能夠成為一個大人，若兒……會唔會對我另眼相看？
青春期嘅少年總喜歡胡思亂想，憑感覺去做啲想做嘅事。
於是，我去學習點樣去做一個大人。
首先，衣著打扮係個重點，著住啲又卡通又logo嘅衫，就好似長唔大嘅小朋友。
於是，我就買咗純色嘅樽領衫同洗水爛牛，但咁樣係唔夠。
我參考咗貓王，用晒若兒畀我嘅零用錢買咗件復古皮褸。
仆街，已經窮了。
然後，髮型對外觀影響非常大，一定唔可以再梳住個薯仔頭。
但讕係成熟嘅all back配上過於白淨嘅臉孔反而有種韓仔乸型feel，所以我選擇咗比較凌亂而多層次嘅髮型。
再者，樣貌先係致命傷，十四歲嘅我太過青靚白淨，塊臉顯不出蒼桑，只顯得出暗瘡。
既然係咁，就留多啲鬚同整乾啲塊臉，捱多幾晚通宵加深啲黑眼圈，咁應該睇落會老啲掛。
最後，行為係真正反映出大人嘅氣質，配上大人嘅外觀做小朋友嘅行為，依然係小朋友。
今次我都無諗頭……
就喺呢個時侯，啱啱到港嘅穆樞機喺屋企門口出面食煙。
無錯！食煙！
我趁穆樞機無為意，偷偷入佢房拎咗支煙食。
「咳！咳！好難食呀！」
唔得，要做大人就要忍耐，呢條一定係決定做唔做到大人嘅線！
我鼓起勇氣，將手上呢支煙食晒去。
「咳！真係好難食呀！」
踏上大人嘅階梯之後，我就準備展視我截然不同嘅造型。
我企喺屋企門口點著煙頭，若兒返到屋企時呆若木雞望住我。
「若兒，你返嚟喇……」
「作死你啊！」
若兒一個重拳車落我個頭。
「……邊個教你食煙㗎？」若兒氣沖沖咁問，「唔使審，一定係穆爾泰條馬甩佬！」
「唔係，係我自己想食。」
「你做咩無啦啦食煙？屎忽痕得制無嘢做？」
「因為……我想做一個大人。」
若兒聽完之後愣咗愣，幾秒之後開始捧腹大笑。
「你……笑咩？」我不解望住佢。
「我笑你啊！白癡低B！」若兒恥笑聲令我紅都面晒。
「我——」
「唔好再食喇，食煙對身體唔好啊！」
若兒伸出手，將我嘴巴上支煙拎落嚟。
「想做大人唔係咁做，真正嘅大人就算唔食煙都型過食煙嘅人。」若兒收斂笑容之後話：「你離大人仲差得遠呀，小凌小朋友。」
就係咁，嗰日發生一件無比羞恥嘅事。
自此之後，我放棄咗追求若兒嘅想法，專心做一個驅魔師。
有日我將若兒畀我本筆記睇晒，於是無所事事嘅我行去若兒間房。
咯咯咯——
我推開門，若兒唔喺度。
裡面有個書架，上面全部都係有關神秘學同科學嘅書籍。
我隨手拎咗幾本書落嚟，裡面記載住比我認知遠深奧嘅知識。
睇嚟，我同驅魔師嘅距離非常遠。
我睇咗一個晏晝，睇到非常眼瞓。
正當我諗住返房瞓時，我唔小心撞跌咗一本書。
——一本封面無字嘅書。
有種奇怪嘅感覺。
好奇心驅使下，我打開咗本書。
書頁早已殘舊泛黃，裡面嘅文字東歪西倒，彷如手寫一樣。
唯一確定嘅，呢本書記載嘅嘢同我睇過嘅所有書籍唔同。
係專門記載禁忌嘅知識。
當我翻到某一頁，標題寫住三個字——
降魔術。
若兒寫畀我嘅筆記，曾提及過名為赫耳墨斯主義嘅秘教。
赫耳墨斯主義係建基於古埃及同古希臘嘅神秘學，其內容大大促進中世紀科學發展，係神秘學中地位非常重嘅秘教。
秘教中記載宇宙三大智慧——煉金術、占星術，以及降神術。
降神術，係透過某種儀式召喚高維度嘅神靈，令其附身於己身嘅法術。
不過據若兒所講，唔知係咩緣故，降神術早已失效。
而且並唔係法術失效，而係並無神靈有任何回應。
因此古代嘅神話可信性同重要性愈嚟愈低。
然而，魔依然存在。
換句話……
將魔召喚附身於己——就係降魔術。
唔通……殺死我全家嘅黑斗篷男人……