我係一個驅魔師，專幫人驅散妖魔鬼怪: 74

「你話……咩話？」

原本身處於幸福嘅氛圍，卻因為若兒一句話令我驚醒。

「我話，將白寧嘅靈魂用昆迪拉消滅，然後我再附上身。」若兒一臉平靜咁講出呢番話。

我即刻抽離情緒，回復冷靜咁問：「你知唔知自己講緊咩？」

「我講緊咩？」若兒手指放喺下巴，一副理所當然嘅表情，「我咪講緊點樣可以永遠陪喺小凌身邊囉？」





「唔係。」我搖頭，「以前嘅若兒係唔會講出咁嘅嘢。」

「點解唔會？」若兒皺起眉頭，「喺我嘅世界只有小凌一個，為咗小凌無論做咩我都在所不惜。」

「你……有無諗過咁樣做，即係要犧牲一條無辜嘅性命！」

「咁又點？」

呢刻若兒表情冷如霜雪。





「我只係想陪喺小凌身邊，唔通咁都有錯？」

若兒濁白嘅雙眼深情望住我，但呢刻我只感到陌生。

「定係……你緊張呢個女仔條命，唔捨得我消滅佢？」

「你講咩嘢……？」

「果然……係咁。」若兒垂低頭，「我估得無錯，你果然係鍾意咗呢個女仔。」





「我無鍾意過白寧，佢只係我徒弟。」

「徒弟……我先唔相信！」若兒企起身猛然拍檯，「如果只係徒弟，點解佢暈低你就第一時間衝過去救佢？」

佢暈低……？

呢刻，我腦海糾正咗一個錯誤嘅記憶——

白寧曾經兩次遭遇到龐亮。

第一次係同白寧打完邊爐，送走咗白寧之後，化身黑霧嘅神秘人突然躍出襲擊我，俾我格擋咗之後就向白寧走嘅方向跑過去，不過最後不知所蹤，無正面遇上。

第二次係同白寧喺海洋公園準備走，我去完廁所出嚟嗰陣，一道白煙突然冒出穿過白寧嘅身軀，當時白寧仲暈咗下。

「唔通……喺海洋公圍襲擊白寧嘅人，係你？」我十分訝異咁問。





「係。」若兒毫不猶豫承認，「我為咗你捨身抵擋山魅，但你竟然同佢相處得咁開心？」

「嗰日之後，我一直等緊你返嚟，我無忘記過我哋之間嘅承諾。」

「咁點解……嗰陣嘅你表情……係咁幸福？」若兒低頭握緊拳頭，「我唔甘心……」

我嘅表情……好幸福？

「我唔甘心……如果我無死到，可以喺小凌身邊見證小凌幸福咁笑住嘅人，就係我……」

水珠滴落檯面，若兒雙手撳住檯面非常不甘咁講。

我，無法反駁。





做錯嘅人，其實係我。

若兒為咗我付出咁多，甚至犧牲自己性命，然而我忽視若兒嘅願望，拋低若兒自私去咁露出笑容。

我仲記得若兒臨死前同我講嘅說話——

「——你係我呢生入面，最珍惜嘅人。」

佢嘅願望，並唔單止想我幸福。

佢其實想同我一齊幸福。

「對唔住，若兒。」

而我直到最後都無理會過若兒嘅願望。





「原來，又係我嘅錯。」

所有嘢都係我造成，無論過去定現在，罪孽始終無法磨滅。

「因為我嘅自私，令到你咁痛苦。」

「小凌……」若兒抬起頭，通紅嘅雙眼望向我，「你係咪應承我消滅白寧，俾我永遠陪喺你身邊呀？」

「對唔住，唔得。」

望見眼前白寧嘅臉孔，就諗起佢天真嘅笑容。

「點解……點解啊啊啊啊啊啊啊啊！」濁白嘅煙霧頓時從若兒四散，「點解我為咗你付出咁多，但你最後要咁樣對我？」





我馬上捉住若兒隻手，原本表情猙獰嘅若兒愣望住我。

「我無辦法因為自己嘅罪而犧牲無辜嘅人，但係……我唔會再俾你孤身一人。」

我從褸袋拎出銀刀，指向頸動脈。

「呢個，係我唯一贖罪嘅方式。」

掉低你八年，我先知原來你一直係咁諗。

今日，我終於搵到我旅行嘅終點——

堂堂正正贖去我所有罪孽。

「我哋，會再見，然後，永不分離。」

「小凌！」

嗖——

鮮血伴隨銀刀四濺周圍。

溫熱嘅液體緩緩滴落地下。

「若兒……？」

若兒的確舉起手握住刀刃，阻止我自刎。

但係做出呢個舉動嘅人，唔係附喺白寧身上嘅若兒。

「師……師……父……」