我係一個驅魔師，專幫人驅散妖魔鬼怪: 88

咩話……？

唔知點解，我感覺到心跳加速。

「點解要情人節出街？」我不解咁問。

「因為……想多謝小凌一直以嚟對我嘅悉心教導。」

「你終於識交學費啦嘛？但係……都唔使要情人節出街㗎嘛？」我再三咁問，想從白寧口出得出答案。





「總之……」

白寧忽然變得扭扭捏捏。

「你唔好理！總之要情人節！」

白寧臉頰泛紅，氣忿忿講完之後就轉身跑走。

佢唔係我想像中男女之間嘅怕羞，但又非常緊張。





唉……算喇，俾你估得到嘅佢就唔叫白寧。

只不過……

「點解……好似係我期待緊佢講嘅嘢咁？」我不由然摸落自己心口。

＊

到嗰日，我人都未瞓醒，門外就傳嚟鬼死咁嘈嘅敲門聲。





「邊個呀？」我睡眼惺忪去開門。

「小凌，我哋今日去AIA啦！」白寧刺耳嘅聲音傳入耳中。

「去鬼咩，你唔好去到先同我講……」

當我望到白寧嘅樣時，我停止咗我嘅話語，瞬間醒咗神。

唔係因為太奇怪，而係因為……太靚。

平時嘅白寧都係頭髮紮髻，牛仔道袍，牛仔短褲，白色背心。雖然都幾襯佢傻下傻下咁款，但始終都叫做causal style。

但而家喺我眼前嘅白寧一把長髮放咗落嚟，臉化淡妝，掛住耳環，披住頸巾，上身杏色cashmere樽領冷衫，下身深啡色格仔絨毛裙，加對駝色嘅皮鞋，再拎住個白杏色嘅皮質手袋。

完全，判若兩人。





如果唔係認得佢把聲，我根本唔知……原來白寧可以咁靚。

「嗯？小凌？」白寧緩緩張開搽咗淡粉色唇膏嘅嘴唇。

我捽一捽眼，然後話：「原來你都識打扮。」

「你真係夠無禮貌。」

仆街，點解平時我用喺佢身上嘅對白，而家會自己食返？

我唔明白。

一時間打扮咁靚，令我不知所措。





我係咪應該要打扮返型啲，配合一下呢個傻妹呢？

喺衣櫃左搵右摷，嚟嚟去去都係得皮褸同牛仔褸，而且我亦唔鍾意著恤衫，天氣凍最多都係著樽領衫，主要係夠方便。

唔係……係白寧平時太奇異，我衣著一直都好正常，點解要煩惱咁多？

我同平時一樣穿搭，入面著件黑色樽領衫，出面皮褸牛仔褲。

梳洗完之後，就行到坐喺梳化等待我嘅白寧面前。

「行啦。」

「嗯！」白寧好興奮咁企起身。

沿途一路行，我都有不時偷望白寧。





的確……有種魅力，如果就咁望嘅話。

「到喇！」

都未行到，淨係見到離遠摩天輪喺度轉，白寧已經興奮咁指住大嗌。

我哋去到購票處買咗兩張成人門票外加一堆代幣，然後就入咗去玩。

「我要玩轉轉轉，然後打韆鞦，再玩過山車！」白寧拉住我手臂。

「喺度玩呢啲好嘥錢㗎，上次海洋公園又唔去玩。」

「因為……」白寧有難口言咁樣。





係喎，唔記得傻妹上次為咗陪小明小朋友，幾乎全程都喺度玩兒童機動同睇動物劇場。

「好啦好啦，去玩啦。」

「嗯！」白寧二話不說，翹住我隻手行過去。

而且，手肘好似感受到柔軟嘅觸感。

翻譯返白寧嘅話，我哋先去玩瘋狂旋轉，然後飛天韆鞦，跟住係圓形過山車。

「小凌，你做咩好似食咗屎咁樣？」

「我無。」

「上次海洋公園你都係咁，其實你係咪驚？」

「唔驚。」

「咁我哋玩多次過山車啦！」

「你食屎。」

雖然今日白寧打扮非常有女人味，但行為動作一下子就暴露佢稚氣嘅內心。

最初識佢時只會覺得佢係一個白癡，但相處耐咗，唔講外表嘅話其實佢真係幾似一個細路。

「不如我哋去玩攤位遊戲呢？」

白寧指住場地中間一連串攤位，裡面有各式各樣小遊戲，仲掛住好多公仔。

我諗起白寧屋企裝裝潢非常少女心，擺放好多公仔嘅房間。

「其實你係想要堆公仔啫。」

玩完一輪機動遊戲，我哋加埋仲有三十個代幣。雖然白寧係白癡，但以我驅魔師嘅身手應該好輕鬆掟到公仔返嚟。

「嗚……」白寧嘟起嘴巴。

最後一粒波從桶入面彈出嚟。

「唔係，唔應該係咁……」我無法相信眼前情景。

點會下下個波都彈出嚟？一定係個桶入面有怨靈作崇，最衰今日我出嚟太趕緊，唔記得帶con同驅魔工具。

之後，我哋去咗玩碌齡、釣魚、angry bird、掟飛標……差唔多咩game都玩晒，甚至充咗兩次錢，但雙手依然空無一物。

「周圍啲人對呢個狀況竟然視若無睹，唔係掛……唔通Ah Puch竟喺AIA復活，洗晒呢度所有人腦？」

「面對現實啦，呢度一隻亡魂都無呀。」白寧死魚眼望住我。

最後五個代幣，再玩落去真係會破產。

當我對人生失去希望時，面前出現一個攤檔，而且入面掛住嘅全部都係特大公仔！

「白寧。」我拍一拍佢膊頭。

「嗯？」

「望唔望到嗰度？」我指過去。

白寧望過去，呆咗咁話：「哇！好多狗狗公仔！」

「想要？」我再問多佢一次。

「嗯！」白寧雙眼重燃怒火。

目標一致，我哋一定要掟到嗰隻巨形狗狗公仔！

若不成功，就便成仁。