我係一個驅魔師，專幫人驅散妖魔鬼怪: 94
＊
「你已經決定好？」
警局審訊房，只有我同霍靜兩人。
「嗯。」
霍靜搖頭，輕嘆一口氣。
「你執著到咁，我無謂阻住你。」
「你今次好順攤，無天魔嗰次咁麻煩。」
「因為你眼神唔同咗，煙味消失咗。」
霍靜手托下巴，意味深長向住我笑。
自己都唔自覺，雖然褲袋仲袋住打火機，但已經無再食煙。
「不過我無可能俾你就咁冒險。」
「你意思係……？」我疑惑不解。
房門忽然被打開，一道身穿黑色羊皮大褸嘅高大身影行入審訊房。
「意思係必須要有強力嘅外援。」
穆爾泰傷勢雖未痊癒，但睇落並無大礙。
「經過資料搜查，我哋已經初步得悉太陽神殿匿藏地點，不過地形人數一概不明，貿然闖入嘅話風險太大。」
霍靜拎出幾份文件，全部都係有關太陽神殿嘅資料。
「唯一調查到嘅係佢哋想召喚嘅惡魔名字——Beelzebub。」
「竟然係蒼蠅王……」穆爾泰露出驚訝神情。
「係好出名嘅惡魔？」霍靜疑問。
「喺教廷眼中，Beelzebub係惡名昭彰嘅大惡魔，撒旦聖經中呢位惡魔亦係名列前茅嘅大惡魔，魔王般嘅存在。」
穆爾泰講得無錯，就算係唔熟悉宗教嘅人，都會知Beelzebub——別西卜呢個名字。
惡魔嘅禍害可以威脅世界，可想而知作為魔王嘅Beelzebub成功喺現實得到軀體會有咩不堪設想嘅後果。
聽到呢度，心中頓時浮現一個諗法。
「照太陽神殿講法，容器成年時先可以降魔。」穆爾泰嚴厲正詞，「我哋要喺三月十三日前行動，就算救唔出白寧，至少……無論用咩手法都要阻止Beelzebub降臨，就算係——」
「唔得！」我一手扯起穆爾泰衣領。
「呢次係關連到世界嘅命運，一旦太陽神殿成功降魔，會發生咩事無人會知。」
「我知……」我垂低頭，慢慢鬆開手，「但就算係咁，我都會保護白寧。」
「為咗一個女仔放棄世界？你到依家諗法都咁天真——」
「唔係，我有確確實實嘅方法。」
穆爾泰同霍靜詫異望向我。
我將作為保險，拯救白寧嘅方法話畀佢哋兩個聽。
「你……癲咗啊？」霍靜一臉不可置信。
「……的確係可行方法。」穆爾泰合埋眼點頭，然後睜開眼問：「你係認真？」
「嗯。」
「好……就咁做。」
「喂！穆樞機，你唔係陪佢癲啊嘛？」霍靜極力反對。
「呢個只係最後保險，唔一定會變成咁。」我誠懇坦率對霍靜講，「反而我有件事要拜託你。」
我將有關陳伯案件嘅來龍去脈話畀霍靜知。
「我……重新徹查呢件事。」霍靜瞇起眼，不滿咁講：「但你唔好講到交代後事咁。」
「我無諗住送死，我仲有好多嘢想做。」
「咁你到時記得幫陳伯出庭作證。」
「當然。」
我面不改容，講咗句大話。
警方同教會合作，進行調查，準備突襲太陽神殿嘅計劃。
但時間倉促，經霍靜用超級電腦計算後，定制出成功率最高嘅計劃。
三月十二日夜晚，將會將以亞納扎為首嘅太陽神殿一網打盡。
我返到屋企，小黑即刻出嚟迎接我。
「喵！喵喵喵！」小黑睜大黃色瞳孔，因為我又整到成身傷而擔心。
我抱起小黑，然後話：「今日帶你搬一搬屋。」
「喵？」
我將小黑帶到去白寧屋企，暫時放住喺度。
「凌大哥，白師妹佢……」肥師兄擔心到臉頰啲肥肉跌晒落嚟。
「閣下，會帶白師妹返嚟，係咪？」矮師兄厲眼與我對視。
「嗯，當然，你哋好好睇住你哋師父。」
＊
作戰前一日，我喺條街度行嘅時候，撞到個熟人。
「凌先生！」戴住黑超，全身牛仔打扮嘅Derek向我打招呼，「咁啱嘅，又嚟驅魔啊？」
「唔係，我散步。」
「係喇，白寧小姐呢，唔見佢同你一齊嘅？」
「佢……今日唔舒服。」
「喔！」Derek點頭，「其實上次醒返之後你哋就走咗，一直都想同你哋當面講句多謝。」
「唔使，交易嚟啫。」
「唔係，我係多謝你畀咗機會我去面對自己過去。」
我不解咁望住Derek。
「你唔係淨係幫我解夢，你仲教我點樣面對過去，今日我先可以企喺呢度。」
雖然Derek講到好多謝我，不過我無太大感覺。
如果白寧嘅話，可能會理解到唔定。
「所以我諗住開套電影講驅魔師！」
「唔撚係掛。」
你咁樣咪即係要將我哋辛苦隱藏嘅事跡公諸於世？
不過諗諗落又無所謂，因為根本唔會有人信。
「Derek！」有個女仔向Derek跑過嚟，「你係……凌先生？」
我面無表情，舉起手講咗句：「Hi。」
「你哋識㗎？」Derek好驚訝指住我哋兩個。
「係啊，凌先生之前幫我驅過魔，仲斬爛我枕頭，打到我損手爛腳！」Heidi半開玩笑咁講。
「喂，凌先生你咁對我女朋友真係唔得！」Derek搭住Heidi膊頭講。
「你哋……拍拖？」我舉起食指喺二人之間徘徊。
「係呀，都一段時間。」Derek沾沾自喜咁講。
「真係令人驚訝。」
「但你個樣一啲都唔驚訝。」
唔單止Derek，而家嘅Heidi亦都能夠挺起胸膛開心大笑，無再被過去束縛。
我稍微好奇咁問Derek：「我記得你為咗Karen，七年嚟都無再鍾意其他女仔。」
「我到依家都無忘記過佢，我甚至有同Heidi講過Karen呢個人。」
「嗯。」Heidi點頭。
「不過我明白到，光唔係照亮，而係傳遞。」
「咩意思？」我露出不解嘅表情。
「Karen佢雖然離開咗我，但佢將愛嘅光芒傳遞咗畀我，而依家我希望可以傳遞光芒畀其他人，等其他人可以感受到光芒嘅溫暖。」
傳遞光芒……
「不過，我得到嘅光芒唔淨止嚟自Karen。」
「無錯。」Heidi點頭附和，「仲有凌先生。」
「你所做嘅一舉一動，已經將光芒賦予咗畀我哋。」
我愕然望住佢哋。
大概因為，我從來未諗過會得到咁樣嘅回應。
當初為咗唔再孤獨，為咗報仇而做驅魔師，漫長嘅道路我唔經唔覺幫咗咁多人。
穆姑娘、Shelly、浩然、阿瞳、芷欣老豆、阿堯，仲有其他人……都覺得係咁嗎？
昔日若兒將光芒傳遞畀我，照亮處於深淵嘅我。
今日我將光芒傳遞畀他人，重覆住同樣嘅事情。
但係，仲差一個人。
「多謝你哋。」我衷心向Derek同Heidi道謝。
雖然佢哋兩個不明所以望住我莫名奇妙嘅道謝。
到三月十二日夜晚，準備去拯救白寧。