我係一個驅魔師，專幫人驅散妖魔鬼怪: 95
我哋而家前往嘅目的地，係位於馬鞍山嘅馬鞍山教堂。
相傳以前馬鞍山礦場落成先，村民人數激增，於是落成咗兩個教堂供居民供奉，其中一個係馬鞍山教堂。
後來教堂漸漸荒廢，成為廢棄教堂。
話說附近一帶村民非常抗拒外來人嚟參觀，認為被打擾安寧，所以馬鞍山教堂幾乎無人問津。
我哋撥開半身高雜草，爬過生鏽圍欄，進入大門早已塌毀嘅廢棄教堂。
「身為撒旦教竟然用教會做藏身地址。」霍靜厭惡搖頭，然後打開電筒。
座堂只有兩個課室左右大，電筒照一轉，除咗厚如棉團嘅灰麈、佈滿天花嘅蜘蛛網、腐化多日嘅麻雀屍體、斷成兩截嘅十字架石像之外，就無其他嘢。
「呢度真係太陽神殿嘅藏身點？」其中一個警員膽怯咁問霍靜。
霍靜並無回答嗰位警員，視線移到我身上。
我指住本應係祭台位置嘅地下，然後話：「成座教堂淨係得嗰度地下無麈。」
「有機關？」霍靜問。
「我睇睇。」我行到祭台前踎低觀望，地板雖然無塵，但又無任何機關。
我拎出太陽燈電筒，照落地下。
果然，一個法陣瞬間顯現眼前。
「用隱形墨水畫嘅法陣。」
我拎出硝酸銀噴霧，將隱形墨水洗走。
「磁場有反應！係結界！」其中一個拎住插有儀器嘅電腦嘅警員話。
同上次喺教會創造結界情況相反，呢座教堂本來磁場反應非常劇場，自然形成無形結界，而對方藏匿於結界之中，再透過法陣將磁場平復落嚟，切斷無形結界入口。
磁場雖然紊亂，但結界入口無劇烈浮動。
「你你你你，喺度stand by，其他人跟我入去。」霍靜指揮佢嘅下屬。
穆爾泰默不作聲，做咗個十字架手勢。
「我準備好。」我應咗句。
今次行動分別由霍靜帶領嘅少數特警成員，加上穆爾泰為首嘅幾位神職人員，同埋我進行。
我哋沿住磁場缺口步去，穿過之後映入眼簾嘅——
鈴——鈴——鈴——
緩慢嘅銀鈴聲傳入耳中，映入眼簾嘅係一個祭壇。周圍燈光昏暗，只有牆身掛住油燈，燃點黑色蠟燭，白衣教徒左右兩邊肅立，總共六十六個人。
正中央地下有個大型倒五芒星陣，鮮紅嘅顏色彷似以血畫成，而法陣正中心有個山羊角惡魔雕像。
鈴——鈴——鈴——
銀鈴聲緩緩響起，白衣教徒低頭細語，猶如祈禱緊。
其中一個教徒察覺到我哋，抬頭望過嚟，然後其他教徒嘅目光一齊聚焦過嚟。
「噓！噓！噓！噓！噓！噓！噓！噓！」
頓時，一陣黑霧充斥房間，將眼前視線完全遮蔽！
「小心！」霍靜拔槍大叫。
砰！砰！
身後響起槍聲，忽然兩道黑影跌到我腳邊……係兩個頭部中槍嘅神父屍體！
我望向身後，黑霧之中隱約見到開槍嘅人……係其中一位特警成員！
嗰個特警雙眼流露懼色，然後顫抖嘅雙手舉起手槍指住我。
「怪物……怪物啊！」
砰！
槍聲響起，但子彈並無向我射嚟！
喺嗰位女警身後，另一粒子彈貫穿咗女警個額頭，我仲未明白發生咩事，連番子彈向我身邊不停射過嚟！
我邊跑邊躲避子彈，霎時另一道高大身影握住銀刀向我撲過嚟！
「可惡嘅惡魔，我唔會俾你迷惑到！去死啦！」身穿白袍嘅神父向我捅過嚟。
我輕輕出腳將神父踢跌，然後反手將佢壓落地下！
「惡魔！放開我！惡魔！」
唔通……佢哋俾人迷惑，將除自己以外嘅人都當成敵人？
正當我牽制住神父時，黑霧中飛出一粒子彈將神父太陽穴貫穿，神父隨即停止大叫，面部無力垂落地下。
周圍實在太混亂，槍聲同慘叫聲不斷傳出，屍體陸續遍佈地下。
「凌寧壹！」
係霍靜！
我馬上向叫聲跑過去，只見霍靜同穆爾泰仲有幾位特警同神父企喺一個法陣裡面，佢哋似乎無受到影響。
「快啲入嚟穆樞機個法陣！」霍靜向住我大叫。
我即刻向霍靜跑過去，但霍靜又突然舉起槍指住我。
唔係……
千均一發，霍靜開槍之際，我俯低身跑到霍靜腳邊，與此同時子彈向我身後飛去，將準備從後襲擊我嘅特警殺死！
「虧你諗到我想做咩。」霍靜吐咗口氣。
「虧你咁決斷殺死你啲手下。」
「我係上司，佢哋成為威脅，我有責任處理佢哋。」
身處法陣裡面嘅我哋並無成為其他人目標，但黑霧之中大部分人都被迷惑，不停襲擊其他人。
而且，除咗佢哋之外，仲有另一班敵人隱藏黑霧之中。
嗖—！
穆爾泰拔出半身長銀劍，將正面襲嚟嘅兩個白衣教徒斬首！
「咁落去唔係辦法。」
短短兩分鐘，原先數十人嘅小隊幾乎全軍覆滅，黑霧之中血味彌漫，屍遍橫野，化為慘絕人寰嘅地獄。
「係惡魔召喚。」穆爾泰從眼前場景得出推測。
「佢哋……已經完成降魔？」霍靜睜大眼睛愕然地問。
「唔係。」穆爾泰搖頭否定，「只係單純召喚咗惡魔嘅靈體，而且唔係Beelzebub，不過……呢個惡魔似乎好難搞。」
「佢係咩惡魔？」我好奇問。
「以我所知，可以瞬間令所有人反目成仇嘅惡魔只有一個——所羅門七十二柱魔神第七位Aamon，亞蒙。」
黑霧慢慢散去，喺祭壇中心有個梟首狼身蛇尾嘅靈體飄浮空中，以銳利嘅米黃色雙眼俯視眾人。
環境漸漸明瞭，但無見亞納扎同白寧。
唔通佢哋唔喺呢度……？
「Madam！顯像儀探測到石像下方有暗道通往密室！」霍靜身後其中一個特警報告。
霍靜環視一周，然後話：「亞納扎‧艾奎諾同官白寧可能就喺密室度。」
我焦急咁話：「我哋快啲過去！」
「等等，我幫你哋開路，然後留喺呢度。」霍靜截停我。
我好快就明霍靜嘅意思。
雖然只係靈體，但惡魔仍舊強大。
正因為咁，只有黑科技儀器，但無任何神秘學知識嘅霍靜係無可能同惡魔與之抗衡！
「放心。」穆爾泰睇穿我心中想法，「你以為太陽神殿進行降魔，教廷只會派我呢位香港樞機？」
我赫然發現，側邊幾位神職人員身上制服同穆爾泰嘅等級一樣，係來自其他國家嘅教會樞機。
「去救白寧。」
轟隆—！
爆破裝置將惡魔石像炸開，底下出現一條通往深處嘅樓梯。
穆爾泰又將兩個教徒斬殺，我跟喺穆爾泰身後一齊向樓梯跑去。
「霍靜，多謝。」
「唔使，同埋唔好死。」