- 第九章 - 初戀的回憶-9

由呢一刻, 我地就行近左一步。

 呢個時侯距離歌唱比賽大約仲有兩個月。

 當時佢可能為左歌唱比賽一男兩女唔好咁怪。

 最後佢就唔知係邊到搵左一個高一年級既男生。



 印象中好似係教會既朋友黎。

 佢叫阿全。

 咁就組成2男2女既組合了。

 參加歌唱比賽就自然要練習。

 而我地練習既地方有點奇怪。



 應該係話我同阿珩練習既地方有點奇怪。

 我地主要練習既地方係電話。

 大家可能會諗既係FACETIME定SKYPE。

 但當時仲未有智能電話。

 所以係以傾電話既形式練習。



 不過都係有點怪怪地。

 因為始終會有延遲。

 但係我地都照繼續練。

 初頭會練完唱歌, 就會傾下電話。

 日日傾, 夜夜傾。

 好記得有一次佢問我有冇中意既女仔。

 「有呀」

 「我地呢班既?」



 我諗左一陣。「係。」

 之後佢就細數我地班既女仔。

 依照學號每個都問係定唔係中意。

 當佢問左幾個後, 我就知佢係跟學號問。

 越接近佢既學號, 我就越緊張。

 好緊張好緊張。

 差3個…差2個…下一個就係佢…



 結果佢跳左佢個學號繼續問。

 直至問哂其他女仔, 除左佢。

 當時我唔知佢係咪已經知道。

 假如當時佢問埋佢自己。

 我好肯定我會答係佢!

可惜唔係。

 又或者問佢想唔想知係邊個。

 可能呢一刻我地就開始左。



 可惜我冇做到。

 慢慢開始, 我地就越來越熟。

 每次小息, 佢都會企係某一個位。

 睇下學校既風景。

 的確係幾迷人。

 而我就每次都會行過佢同佢傾計。

 傾下某科目識唔識, 傾下某同學既事。



 有時候就咁企係到陪住佢。

 我都覺得好開心, 因為有佢。

 有時候我地會係飯後小息去學校天台既角位練歌。

 基本上唔係有心上黎都唔會知呢到有人既地方。

 我地拎出電話出黎播歌練歌。

 仲記得有一次中午既時候就放左學。

我同佢就由學校係咁行, 行到一個墳場, 仲要行上山。

 我地一路行就一路練歌。

 為既係同佢係埋一齊。

 而佢去墳場就係想見一個已去世既歌手。

 雖然係好奇怪既一日, 但係就印象深刻。

 就係咁, 我地就過住曖昧既時光。