【校園】現實與平行時空的愛情故事: 第十一章 - 初戀的回憶-11 ( 表白 )
- 第十一章 - 初戀的回憶-11
「後悔」每個人都可能有過呢種心情。
但「放棄」我未曾諗過!
2008年 – 中二 – 暑假
雖然詠珩開始同個師兄拍拖。
但我依然都對佢咁好。
從未改變。
為左令自己無咁灰同傷心。
就唯有用其他野黎麻醉自己。
暑假就係A樂園舞台劇表演。
當時的確係專心地參與舞台劇。
基本上成個暑假差唔多每一日都練習同綵排。
而係舞台劇入面有幾句係對詠珩講。
我曾經有邀請佢黎。
只可惜佢無黎到。
2008年 – 中三 –
升左上中三, 同班同學無改變。
依然同詠珩一班。
可惜既係, 每次小息陪佢傾計果個已經唔係我。
每一次我都只能夠係附近見住佢同個師兄一齊。
只可以遠遠觀察佢。
上堂觀察佢。
直到就黎到佢生日既時候。
我決定送一份禮物比佢。
自問第一次送禮物比人。
真係唔知送咩比女仔好。
最後係附近商場行左好耐先決定買一條頸鍊比佢。
我係入面寫左一封信。
內容唔記得寫左咩野。
但係每一行第一個字寫出「我…愛…你…」呢三個字。
希望佢留意到我呢一封「表白信」。
作為欠缺自信既我既表白。
佢生日當日我就將呢份禮物偷偷地放係佢櫃桶。
希望佢唔好意外地整唔見。
結果等左差唔多成個月。
好似無咩聲氣, 又好似無咩改變。
依然同平時一樣咁傾計。
最後我係MSN好主動咁問佢。
「你收唔收到份禮物?」我問。
「收到呀。多謝」
「你…見唔見到入面有封信呀?」
「見到。」
「你睇左封信未?」我心諗佢究竟睇唔睇到呢?
「睇左啦。」
「你有無留意到乜野?」
「…?」
「你留意下每一行既第一個字」我好緊張。有擔心過我講完之後會點。
「…?」
「我愛你」
「…多謝」
我就係咁表白完。
我無話要求佢做我女朋友。
只係純粹表白, 表達自己既心意比佢知。
你有我在。