【校園】現實與平行時空的愛情故事: 第十九章 - 初戀的回憶-19 ( 後果 ) ( 完結篇 )
- 第十九章 - 初戀的回憶-19
每做一件事都會有需要承受既「後果」。
而我亦都一樣。
因為我提出係我自己生日選揀左返屋企休息訓教。
所以得到呢一個SMS。
SMS內容大概係話…
「你去陪你班朋友啦。我地分手。唔好搵我。星期一我會出現。」
呢個就係一個結果。
因為舞台劇識到一班朋友, 冷落左詠珩。
再加上今日既導火線演變成咁既結果。
果一晚, 我拎住部電話, 不斷喊不停喊。
直到夜晚到天光。
我相信我係我生日決定返屋企休息既選擇而後悔一世。
直到星期一返學, 我如常去接佢返學放學。
而表面上亦都好似同拍緊拖無分別。
但一日一日咁過去, 佢漸漸就開始同我有距離。
之前返學既時候我地會拖手。
直到我去拖佢既時候佢會縮手。
MSN同佢傾計少左。
問多兩問就答我一句「與你無關」。
有一日既早會, 學生會係操場排隊。
而我就收到一份禮物, 一份佢托朋友送比我既一份禮物。
呢一份係一個CUP CAKE外形既布公仔。
另外仲有一張紙仔寫住「遲來的生日禮物」。
果一刻我相信當日佢想送呢個公仔比我。
但係我白廢左佢既心機同心思。
我真係好後悔果日既決定。
到左中秋節果晚既約定時間。
我依時到佢屋企樓下等佢。
佢亦都依時黎到。
呢一日我可以拖到佢啦。
拖住佢去睇花燈。
拖住佢周圍影相。
睇完花燈就返到屋企附近同班朋友玩下。
全程我地亦都拖住手。
玩完之後我送佢返屋企。
呢一日之後, 我地就無再拖手。
亦都無再接觸。
我係MSN搵佢, 佢唔覆。
我用SMS搵佢, 佢唔應。
自此之後, 佢完全無視左我既存在。
直到畢業。
畢業之前曾經見過佢係學校社際話劇比賽既時候出現過。
呢個係令我覺得出奇既事。
果一日佢負責女生化妝, 而我負責男生化妝。
我完全意想唔到佢會係呢個地方出現。
可惜佢亦都係無視我。
直到畢業。
分開之後, 我差唔多每一日都記低今日係同佢分開左既第幾日。
寫下寫下寫到唔知第幾日。
每一年我都會係佢生日果日同佢講聲生日快樂。
而佢亦都會回應一句「多謝」。
直至畢業之後。
分手後第五年, 佢生日我依然同佢講聲生日快樂。
佢都係回應一句「多謝」。
隔左幾日, 佢突然WHATAPPS我。
叫我落去我屋企樓下等。
我非常意外佢會主動約我出黎。
我立即落去。
我見到佢。
佢亦都見到我。
佢將佢手上一份禮物送比我。
「忘記我啦!」佢講完呢句說話就轉身離開。
果一刻假如我捉緊住佢, 抱緊佢。
或者我地之間故事就唔會就此完結。
的確果一日我係無捉緊佢。
而係呆呆地企係到直至佢完全消失係我視線。
返到屋企。
拆開禮物盒。
有一個吊燈型既鐵架吊住一個唔太大既玻璃球。
玻璃球入面有一個雪人公仔同周邊既雪境。
雪人公仔旁邊有張紙條。
紙條寫住「當你唔開心既時候就拍一下手掌, 雪人會為你照亮。」
就係咁, 我同佢既故事就完左。
-真實故事完-