[專員≠Hugo] 我係溫文樂，奉命調查一宗垃圾站藏屍案: 九

尖沙咀某咖啡店內。 

出現係我眼前既，有OL，有學生妹，有MK仔，但我就偏偏見唔到Hugo。 
我思疑左好耐，突然一個滿面鬍鬚，長髮及肩既男人走上黎拍我。 

“你唔係認唔到我呀？” 冇錯，佢係Hugo。冇見幾年，佢居然變到成隻猿人咁款。 

“老友，你邊位呀？”我故意講下笑。 

“頂你個肺！Candy呢？” Hugo打左我一拳。 





“我…我同Candy係大概兩年前已經分開左。”我一臉尷尬，一陣沉默後先開口。 

“點解呀？！中學個陣你當人地係女神架喎。 
你係咪出去偷食呀？”Hugo依然笑笑口。 

“痴線，你估我係你咩Hugo哥？邊有咁多女！ 
話時話，肯番黎喇咩你？ 
肯接受現實喇咩？”我話鋒一轉，嘗試避開Candy既話題。 





“講呢d…係呀，我番黎已經搵過Dada，知道佢仔都生埋嚕。 
唔好講我個筆啦，你先係主角呀。點解分手呀？” Hugo勢不罷休。 

“性格不合囉。”我猶疑左一陣。 

“你唔係對住我都講呢d門面野呀？” Hugo皺皺眉頭，有少少不滿。 

“你知我唔鍾意講以前既事架。 
過去的就讓它過去，曾經畢竟只是曾經。 
而且，佢已經….過左身…” 




我故作風趣，目光卻停留係咖啡上，彷彿Candy既俏臉就反射係水面。 

“痴線，分左手姐咪咁毒啦你。”Hugo始乎唔信。 

“我認真架，有冇睇新聞？ 
早兩日個單垃圾站藏屍案？死者就係Candy…” 

Hugo只係靜靜咁望住我，不發一言。