[專員≠Hugo] 我係溫文樂，奉命調查一宗垃圾站藏屍案: 二十四

轉眼之間，我聽左好多陳穎妍老公同佢既事。 
再一次，我搵唔到任何線索。 
再係咁落去，我真係好難向老頂交待。 

如果要重整一下兩件案既共通點， 
兩位死者都係已婚女性， 
死前曾經同老公嗌過交， 
兩位女性都有第三者既可能， 
兩條屍都係慈雲山被發現。 





仲有一點，兩位都係我認識既，而且有少少關係。 

假如我大膽假設兇徒係同一個人， 
而且活躍，又或者非常熟悉慈雲山一帶， 
特別係佢可以避開大廈既天眼。 
究竟呢個，會唔會係一個我熟悉既人呢？ 
如果真係識既，又會係邊個呢？ 
中學既同學？ 
如果我向呢個方向查落去，唔知會唔會有咩線索呢？ 





正當我打算番屋企，嘗試搵番一D中學既回憶， 
研究下有冇一個人同呢兩個女人有關既時候， 
我電話響起。 

"喂，出黎飲杯野？" 打黎既係Hugo。 

Hugo？我擰擰頭，冇可能。 

"嗯，都得既。"我簡單回應。 





原來我都好耐冇夜晚出過去飲野喇。 
收線冇耐，電話又再響起。 
個記者妹？噢！佢好似約左我喎... 

"你係邊到呀樂仔哥哥？"記者妹問。 

"er...約左朋友出去。" 

"你唔係約左我架咩？！你係邊呀？"電話傳黎尖叫。 

"我幾時...算啦，你唔介意就一齊啦。" 

反正Hugo而家冇拍拖，當介紹佢地識囉！ 
我都好想飲杯野，放鬆一下， 
放低一下呢兩單案，放低一下..Candy。 




================================================================ 
鈴鈴鈴鈴....鬧鐘響起。 
我頭痛欲裂。 
唉，番番黎現實，又要繼續查案。 

咦，琴晚...我唔係去左飲野架咩？ 
點解我冇乜印象？睇黎我飲到斷哂片喇。 

咦咦，呢到...係邊到黎架？咁女性化既間房... 

咦咦咦！呢個，又係邊個黎架？點解訓係我身邊既？！