《印度 · 尋油 · 台灣妹》: 《十九》

發生咩樹吖！！ "典" 解個女技師會生鬚㗎？雙眼烱烱有神，擁有強壯嘅臂彎，粗大嘅指頭，抬頭一望，仲要有成六呎高， OMG ~ WTF ~ 咁頭先不斷用手遊走我全身嘅咪 …… 咪 …… 呢位勇士！ 


唔怪之得花仔會咁驚訝，一心諗住係女，點知變咗條佬，花仔可能仲諗住 "有（飛）機可乘"，又真係難以接受嘅，我諗起都打冷震，何況係佢。 


Ankit 講得唔清唔楚，加上我同花仔先入為主嘅想法，換嚟呢個結果，但係男技師係無辜㗎，我主動同佢溝通完之後，佢就走咗，依家間房淨番花仔同我，冷靜過後嘅花仔終於忍唔住要爆喇，機關槍式嘅粗口，足足爆咗五分幾鐘先肯停，作為兄弟嘅我，有義務、有責任去安慰同關心佢， 


「你尋晚先比女姦完，今日又比仔攪菊花，你唔死都無用㗎喇！」 




大受打擊嘅花仔無晒反抗能力，猶如敗犬一樣，慢慢咁番房沖乾淨啲油同衰氣。 


仍然怒火中燒嘅花仔坐咗响大堂，口中念念有詞，目不斜視咁望住門口，等緊仇人嘅出現，十分鐘後，Ankit 突然好緊張咁衝入嚟，上氣唔接下氣咁問 


「兩位 …… 老細，你地 …… 尋日係咪响市集打傷咗 …… 四個印度男人？」 




「你點知㗎？」我好奇怪咁問 


「嗄 …… 你 …… 地自己睇！」Ankit 一邊講，一邊拉住我向門口則邊隻小窗 


我偷偷地望出去， 




嘩 ~


拍戲吖，十零個樣衰衰，凶神惡煞，一睇就知唔方好人嘅印度男人，企晒响對面街，個個唔係攞刀，就係木棍， 好似想殺人咁款，仲有王法嘅？你打劫，我還拖，天經地義，合情合理，蝦我地遊客呀！我就同旁邊花仔講 


「點睇先？」 


「仲點睇，緊係報警啦！唔通殺出去呀？」花仔果然係花仔 


「報警無用，警察唔會理㗎！佢地收咗 …… 你明我意思㗎啦！」Ankit 即時對我地講 




「咁都得？」我聽到之後，眼都凸埋 


「印度有咩係無可能，強姦、輪姦日日發生，更何況係呢啲！」Ankit 解釋比我地聽 


「咁你有冇計？」花仔收起怒火，以大局為重，就問Ankit 


「計唔係無，但你知啦 ~ 世界上無免費嘅午餐嘅！」Ankit 奸奸地咁話 


「咁你要收幾多呀？」我就問 




「嗱，我都要搵命搏嘅，朋友價 5000 盧比，後面有個後門，我架車就泊响後面兩條街，我一陣出去攞車先，差唔多到我就響安，你地聽到就好即刻出嚟上車，咪話我唔講義氣喇！比定兩碌木棍比你地旁身，再送埋支印度神油，呢個套餐係咪好抵呢？」Ankit 一口氣講晒成個套餐出嚟 


「你究竟做導遊定海盜？」我對佢嘅營銷手法好不滿 


「兩位老細，咪玩我喇！要唔要幫手先！」Ankit 笑笑口咁問


「…… 要！」我同花仔响無得揀嘅情況下就局住答 


「好！成交！攞住支神油同木棍，記住聽到響安先好出嚟呀！」 




Ankit 收咗錢之後就由後門走出去，我同花仔每人揸住碌棍企咗响後門 


兩條街嘅隔離十零分鐘咩都到啦，我地等咗成二十分鐘，開始覺得有啲唔對路，花仔就講 


「我諗我地比 Ankit 呃咗！唔好等喇，同尋日一樣衝出去，自己執生酒店等，今次記得酒店名啦嘛！」 


「記得，但係今次有成十幾人，唔係咁易攪，個個殺氣騰騰，好容易瀨嘢，有冇計？」我再問清楚花仔 


「有計頭先就唔洗比錢啦！」花仔簡單直接一句 




正當我地諗緊點攪之際，我見到正門有條友鬼鬼鼠鼠行咗入嚟，右手攞住啲野放响後面，行咗去櫃檯度問嘢，跟住個職員指向我地呢邊，個男人隨即拉開正門大嗌幾句，再衝去後門方向，今次唔走唔得喇！