《印度 · 尋油 · 台灣妹》: 《二十八》

阮兆祥？唔係，唔係，盧覓雪先真，做咩又係妳㗎？上次 "車" 我一嘢仲唔夠喉，又嚟過？今次換上一身 SM 打扮，緊身黑衫，黑手套，黑長 Boot，想點啊妳，喂喂喂，夠喇，堅痛啊！！ 


啊 ~ 嗄嗄嗄 …… 擘大雙眼，呼 ~ 原來又係發夢，望住天花板，係呢，究竟我係邊度啊，望望左，望望右，咁陌生嘅，我慢慢用力撑起身，嘩 ~ 點解郁一郁都咁鬼死痛，好似比人打完一鑊咁。 


坐起身都用咗成分鐘，睇真啲，呢度應該係醫院嘅病房，周圍放置咗啲儀器，而我右手手背插住支針，駁住條喉同包水，攪咩吖，咁大陣仗嘅？！ 


哦，依家我先留意到，喺床尾位置有一排藍色嘅櫈，上面瞓咗一個人，係一個女仔，燈光太暗，睇唔清楚係邊個。 




突然一下開門聲，我見到有個男人衝咗入嚟，佢喘晒氣咁行埋我身邊，佢咪花仔強，我就講笑咁講 


「嚇死人咩，咁急趕住去拜山呀？」 


「嗄嗄嗄 …… 你個仆街仔咁精神，想嚇鬼死我啊！」花仔喘晒氣咁話




「車，我有咩事啫，係呢，你知唔知點解我會喺醫院嘅？我唔係好記得！」我嘗試諗，但諗唔起，於是就問 


「頭先收到 Priscilla 電話，話你比車撞到，跟住我就即刻趕過嚟，依家見你無事我就放心晒！」花仔就對我講 


「咪住先，我撞車？ 邊個係 Priscilla 啊？」我一面疑惑咁話 




「咪玩啦，我隔離呢個咪 Priscilla 囉！」花仔指一指就答 


花仔所指嘅就係頭先瞓喺櫈上面果嗰女仔，只見佢雙眼通紅，應該喊咗好耐，佢見我無事，又再喊過，一邊喊，一邊講 


「嗚嗚 …… Da Vinci …… 你沒事就好 …… 嗚嗚 …… 」 


我望住佢，諗咗一陣，就講 


「對不起，我們認識的嗎？」




一架由新加坡開往香港嘅客機入面，滿腦子疑問嘅我坐咗响窗邊，托住下巴望出窗，我不停咁問自己，究竟發生咗咩事，我點解會去咗印度，仲撞車入院，最重要一點，嗰個台灣女仔點解會為我喊得咁犀利，佢果對又圓又大，但不停流淚嘅眼睛，仍然深深印响我腦海。 


花仔見我呆呆滯滯，就問 


「點啊？仲諗緊呀？」 


「我？無野啊，都唔知發生咩事，只係覺得奇奇怪怪感啫！」我轉個頭望向花仔 


「如果唔記得咪由佢先，唔好夾硬嚟，你仲未好番晒㗎！」花仔講完，就拍一拍我膊頭 




「知喇，兄弟，你都辛苦咗成日，休息下啦！」我向花仔報以微笑 


「OK，到就叫醒我喇！」講完之後，花仔就休息 


我無瞓，轉向窗，窗外一片白茫茫，同我依家嘅心情一樣。 


落咗機，攪掂晒啲嘢，花仔硬係要送我番屋企，於是我地就一齊坐機場巴士，由機場番去牛頭角都要個零鐘，坐咗一陣，我就問花仔 


「你仲攰唔攰啊？」




「瞓咗幾粒鐘好好多，係咪有野想問？」兩兄弟識咗咁耐，花仔完全知我諗乜 


「你 …… 可唔可以講比我知成件事係點？」我一面認真咁望住花仔 


花仔慢慢將佢所知道嘅講晒比我聽，估唔到呢幾日發生咗咁多事。 


「而你同 Priscilla 响 Paharganj 間酒店果啲同，以及點解發生車禍，我就唔太清楚喇！」花仔將成件事講晒 


傾下講下，不知不覺就到咗牛頭角，我話唔想屋企人擔心，就响樓下同花仔分開，電話保持聯絡。 




番到屋企，已經十點幾，老豆媽子已經瞓咗，家姐就未番，我放低啲行李就入房，瞓响床上面，個腦仍然一片空白，完全記唔起花仔提及嘅所有野，既然諗咗成日都諗唔到，唯有暫時放低。 


開著部電腦，諗住上 Facebook 睇下嘢，點知一開就發現有人 add 我，click 入去睇，係個女仔， 


叫 Heidi Wong！