是咁的，照顧過我嘅護士死咗: 五十二、會錯意

「玻璃仔學人表白呀！」

「收皮啦你當自己係乜野喎！」

「玻璃仔想破處！」

「點解會咁無自知之明架？」

有人拎住我封情書喺我面前兜圈，大聲讀出嚟：「你的笑容就像春天初開的花，總能令我心頭一暖～」





佢地一彈一跳咁圍住我。

我見到女神啲淚水整到佢眼濕濕，我果然無鍾意錯佢，見到佢為我心痛嘅樣，係我此時此刻最後嘅欣慰。

終於，女神唔忍心再見我咁比人笑，轉頭就想跑走，點知佢好姐妹拉住佢：「做咩啫你？」

女神揈開佢隻手，好嬲。

嬲佢地咁笑我。





女神嘅淚水落下，佢對好姐妹大叫：「個個都知玻璃仔鍾意我，我以後點見人喎！」

呃？

女神跑走咗。

啊啊⋯⋯原來係我會錯意。

我呆呆咁企喺花園嘅中心。