十八子特登嘟起嘴串我,又喺我眼前掃下隻手,又喺我耳邊吹氣,又作狀想錫我,不過我都無反應。

「薯片⋯⋯」

我好似石像咁,十八子又扮哂嗲嘅叫我:「薯~片~」

依把係佢平時用嚟嗲男朋友嘅聲嚟。

十八子終於無耐性再撩我,索性開始自己嘅工作,淋下花,剪下草咁。





而我亦隨住時間推移,慢慢有返知覺。

嗰陣已經日落,天空呈現入夜前短暫嘅淡紫色,橙色嘅晚霞喺天空無聲咁退場。