是咁的，照顧過我嘅護士死咗: 一百零三、怕醜侍應

我喺兒科等十八子放飯，無幾耐就同佢一齊去咗家樂坊嗰頭食野。

「依度啲珍珠奶茶好飲架。」

十八子帶咗我去食台灣野，喺屈臣氏度搭𨋢上去。

「我平時都成日嚟架，貪佢個手撕雞沙律好食，無咁肥。」

十八子同個侍應落單，個侍應明顯已經被佢個樣迷住咗。





「唔該我要手撕雞沙律，飲珍珠奶茶。」

「你飲珍奶咪又係肥返。」

十八子睥住我：「我唔想理你呀。」

「你再飲以後捐唔到血架喇。」

「我啲血無變珍珠奶茶囉！」





最後我都落咗個沙律同珍珠奶茶，個侍應好依依不捨咁走去落單，不時望返去十八子身上。

眼前嘅靚女用手背托住下巴，好欣賞咁直視嗰個怕醜嘅侍應。

「又溝仔呀打算？」

「痴線我邊有溝，覺佢好得意之嘛。」

只見嗰個侍應又偷望過嚟，而十八子喺捕捉到佢目光嗰一秒，就向人單咗下眼。





個侍應即刻紅都面哂，耷低頭走入廚房，仲撞親個頭。

「嘿嘿，好得意呀真係。」

睇個勢十八子又準備換畫，為佢現任男朋友默哀一分鐘。