是咁的，照顧過我嘅護士死咗: 三百七十三、至少……

坐咗好耐之後，我諗返起琴晚嘅夢。我諗起林林嫲嫲講過嘅承諾。

夢入面嘅林林話嫲嫲無呃佢，一直留咗喺彩虹橋，而佢兩嫲孫終於團聚。

喺林林猝死嘅夜晚發一個咁嘅夢，令我覺得唔係巧合，琴晚嘅夢係佢留畀我嘅訊息。

我企起身，身體仲係搖搖欲墜，但我要走，要去南山邨。

林林仲未同我一齊睇星星。





佢會出現喺我夢中一定有咩意義，而我相信去到南山邨就會明白點解發個咁嘅夢。

我唔接受，我唔接受我地嘅故事仲未開始就完結。

我唔接受喺我終於走出過去嘅陰影，決定向林林表白之前，電影就播出「劇終」。

我仲未同佢睇星星。

我仲未送幅畫畀佢。





我仲未請佢食飯。

我仲未表白。

「司機，南山邨。」

如果林林都同我一樣覺得故事唔應該就咁完結，如果佢同嫲嫲一樣咁重視彩虹橋，咁喺一切承諾都無做到嘅今日，佢實會喺嗰度等我。

至少⋯⋯睇下我幅畫，聽我唱埋歌先⋯⋯





先至投胎，好無呀？林林⋯⋯