我係個電台DJ，每晚都做個無咩人聽嘅節目: (十) 雷霆傘兵
「咯咯..咯咯」
嗯..什麼聲音？
我緩緩地打開雙眼，Sally的身影隨即出現在我眼前。
「你成晚冇走啊？！」
「唔覺意..恰著咗。」
「凍死你啊，就咁瞓喺街。」
「你有冇瞓教架，咁早起身嘅，天都未光齊喎。」我說。
「我瞓瞓下去廁所，望出窗見到你架車仲喺樓下先落黎望下。你上黎瞓啦，借張梳化俾你啦最多。」
「會唔會唔方便啊？」
「你都知我得一個人住。」
「好啦咁。」
跟她上到她的家，我來不及參觀，便走上了沙發昏睡了過去。過了不知多久，才醒過來。
看著蓋著自己的被褥，霎覺得很暖和，不想起來。
或者是因為多了一份關心。
但畢竟是別人的家，總不能待得太久。
我走到了飯桌，竟看到一份被蓋著的午餐，上面有一張紙條。
「我約咗friend啊，自便啦你。個飯俾你食架，我估你起到身都黃朝白晏。唔好借啲意偷我嘢啊！」
真是傻女孩，偷了你東西還不怕被你宰了麼？
我一邊捧著飯盒吃，一邊在客廳徘徊。
看到電視櫃有幾幅照片，部分是她的獨照，部分是她與她家人的。
那為什麼她不跟家人住呢？
還是以後再問她吧。
若你問我，男人最快樂的事是什麼，我會說與一群從小認識到大的兄弟把酒言歡。
「喂，阿泰呢到！」甫走進酒吧，便看見阿強跟我在揚手。
「嘩泰仔冇見一排又型咗喎。」說話的叫阿華，他很多話說，多得堪比唐僧，羅家英做那個。
但有他在，聚會永遠都不會變得死氣沈沈。
「人地而家當紥啊，個節目咁多人聽，梗係要執執個Look。」接話的叫Ruco，熱衷於政治甚於家庭的男人。常相信自己的話就是真理。
「多鬼咩，夠頂住唔洗接埋炸。」
我又怎會這樣奚落自己呢？當然是阿強幹的好事。對於他也不用多作介紹。
「喂，今日係慶祝Ruco就黎做老襯嘅日子，唔好講公事啦！」一個男人無故拿著幾瓶酒走過來。
他叫阿文，是我們這群朋友中最穩重的人，曾幫助我作出很多人生的決定。
「估唔到你條友會最快結婚，果陣我地賭你會單身一世架！」我說。
「我記得果陣佢果陣成日都食檸檬，大學畢業都未拍過一次拖。」阿強附和。
「緣份呢啲嘢好奇妙嘅，急去追都冇用，你地恨唔到咁多架啦。」
「嘩..威啦。」我們抱怨道。
「阿泰咁你點啊？仲係一支公？」阿文問。
「邊有你地咁好彩啊，連阿強咁嘅貨色都搵到個。」
「食屎啦你，我邊有咁差！」阿強辯駁。
「哈哈，咁呢到最樣衰果個真係你嘅！」阿華笑說。
因為他這句話，笑得我們前仆後繼。
「果陣仲有個最樣衰排行榜，阿強你長註第一名！」
「仲好講，就係你幾條友整出黎做尻我之嘛！」他雖然不屑被我們挖苦，但大家也明白只是開玩笑。
甚麼是兄弟？就是你說了些很攻擊性的說話，那個人也不會生氣的，他就是你的兄弟。
「唉，就黎三十歲啦我地，都想快啲安定落黎。」阿文說。
「啱啊，安安定定其實幾好，而家先發覺原來得閒可以陪下屋企人，陪下女朋友已經好開心。」Ruco說。
想不到，過往沉醉於工作的他，竟會跟我們說起家人來。
他雖熱衷於政治，卻從事一份保險工作，跟政治全無關係。
年少青蔥的我們，定必有過很多夢想，定必想像過自己會因為夢想而獲得多少輝煌的成就。
亦曾為了自己所傾慕的人多少個晚上徹夜難眠。
但年輕過後，也避不過在社會上磨練數載。然後才發現，夜夜笙歌的糜爛，也比不上在黑夜的夜深人靜中散散步，思考人生；即使縱橫情場，也比不上得到被愛的幸福。
三十而立，我們學會從逆境中找到出口。
看著他們每個人今天都穿著得十分得體，享受著三十而立帶來的快樂。
回想起十多年前，我們也是圍在一起聊個不亦樂乎。只是地點不是酒吧，而是某屋邨的麥記罷了。
我們不能預知將來的生活是怎樣，卻能懷緬過去的日子。
時移世易，初心卻未因此而變。
「點啊你呢排，份工做得唔錯喎。」阿文說。
酒過數巡後，Ruco已醉得不省人事，阿華送了他回家。阿強亦要回電台工作。只剩下我和阿文。
「嗯..好彩我冇忘記到你當日講嘅嘢，堅持到而家總算有少少成績。」
「就算你名成利就，但唔係因為做到自己嘅嘢而成功，得到嘅只係遺憾。」
「哈，你仲記得。」
「中一我比隔離班果幾條蛋散恰，你幫我出頭。
我失戀，你同我講咗一堆理論，等我好快睇淡。
我中學唔識揀科，到大學都係唔識揀科，你三言兩語就令我知道條點應該點行。
個個當我想做DJ好冇大志，得你同阿強佢地支持我，仲建議我去揀大學傳理系。
我唔知點解你明明同我地同年，但係可以成熟咁多，我一早當你係我人生導師。」
我總覺得男人那麼婆媽很扭捏，彼此很多事不用說出口也能感受到。
但或許自己此刻被酒意沖昏，微醉的我一口氣說出了平日難以啟齒的道謝。
「兩兄弟仲講呢啲咩！你過得好我都開心。」
「開心啊，每晚聽住唔同嘅電話，覺得自己閱歷都豐富咗。」
「我都有聽，你都guide得佢地幾好啊。」
「咁你呢，你都好忙啦應該。」我問。
忘了說，阿文的工作是名中學教師。他的教學常引來很多家長、校方的爭議。
他們認為阿文的教學模式偏離了現今的考試制度，令學生不能學會如何應付文憑試。但他卻仍然我行我素，堅持自己以汲取知識為首，應付考試為次的教學方法。
而事實上，學生們較認同阿文的那一套，對他很尊敬。
學校曾以教學理念不一致為由革退他，那班學生竟發動起不同的反對運動以挽留阿文。
「係啊，啱啱班仔Study Leave，但係都要幫佢地補課，反而仲忙過正常上課。」
「我地以前考A-level有啲好似你咁熱心嘅阿sir就好。」
「呢個就係我成日講睇下你對份工嘅態度係點，實有啲番工等放工。我鐘意呢份工，就要對班仔負責，除咗幫佢地chur成績，仲要教佢地點做人，教佢地點對人。」
「再世孔子啊..」
他的理想或者很渺小，只是想導人向善，但背後的理念卻很偉大。
在阿文身上，就是能感受得到這種魄力，你仿佛找不到任何逃避責任的藉口。
「飲啦衰鬼，冇幾多次可以咁樣飲架啦。」
幸好不用做節目，回到家後我頭痛得不得了，很快便已抱頭大睡。
雖然沒甚知覺，但這一覺我睡得很安穩。
或許這晚發生的一切都很完滿。