我係個電台DJ，每晚都做個無咩人聽嘅節目: (十一) 交際?

「歡迎今晚第三位聽眾..電話裏頭嘅係Julian，Julian你好！」

「係，你好。」

「Julian十九歲，讀緊大專嘅。咩科啊？」

「讀緊新聞及傳理系。」

「咦，同我一樣喎。第時想做咩？」





「想做下媒體創作啊，好似幾好玩。」

「係架，我都識有啲朋友做緊呢方面嘅嘢，佢地都幾享受。」

「我都覺！完成每樣作品我都好有成功感。」

「本地創作靠你地啊！」我說。

這是我的真心話，絕不是敷衍。





我是個很喜愛本地娛樂的人，看到現今本地的媒體，我感到十分唏噓。

無論在歌影視上，本土的製作都曾經叱吒一時，蜚聲國際。

可惜現今卻剩下一潭死水。

本土製作常被人批評粗製濫造，但每當有好作品時，卻是無人問津。

「係啦，講番正題先，Julian你係想講下你交友方面嘅嘢？」





「嗯，我呢排都好煩啊。」

「點解呢？」

「我覺得大學生活同自己嚮往嘅好唔同，交際方面有啲辛苦。」

「你expect嘅大學生活係..？」

「我都有住Hall嘅，我開頭以為識嘅人多啲，可以俾到個新環境自己去成長。」

「你以前人際關係係點嘅？」我問。

「我覺得其實我係算幾sociable，中學都識到好多好值得深交嘅朋友。到而家都成日聯絡。」

「但係你覺得大學啲朋友同你以前識嘅好唔同呢？」





「係！我覺得入咗大學之後識嘅人好多都好似只係陪你玩，到你真係有問題果陣都只係可以靠自己，或者同以前嘅朋友傾。

永遠佢地都係要玩果陣，或者搵人食飯果陣先會搵自己。而且一層入面冇可能全部人都熟曬，有啲識但係唔熟嘅，見面果陣都好尷尬。又唔知打唔打招呼好，或者大部分都係Hi-bye咁。」

Julian所說的其實我也經歷過，我不知道是否所有人都是這樣，但確實我和大學朋友的關係也不如阿強他們好。

「我都好明白啊，你喺hall果陣應該係幾唔自在呢？」

「都有啲啊，其實好多時我都係強顏歡笑咁同佢地玩，但一耐咗都有啲攰。」

「咁點解你唔考慮番屋企住？」

「因為我屋企同學校距離好遠，好唔方便。」





「都係嘅，好多時啲嘢都同自己期望嘅有啲落差。」

「慢慢我都搞唔清楚自己入大學係為咗啲咩，好似入咗之後生活仲過得更加辛苦咁。

如果連hall都quit埋，到果陣真係咩u-life都冇。

好彩嘅係有啲上堂嘅組員見到面果陣都幾啱傾，而且學緊嘅嘢都係自己鐘意。但係其實落堂之後都唔會聯絡對方。

喺放假果陣，我搵嘅都係以前嘅朋友，大學嘅朋友都係有啲咩特別事先會搵一搵。」

其實我覺得當你有幸進大學的話，已經是踏出了進入社會的第一步。

是頗可笑的，很多人進大學都為了認識新朋友，但卻處處防備著，不敢與他們交情太深。

或許是因為人長大了，知道世途多險惡。





年紀少的時候，心機較輕，在中學認識的每天都呆在一起，自然較容易混熟，友誼都是在打打鬧鬧間建立。

你會願意在他們面對扮演小丑，逗他們笑。

縱使是多麼愚蠢，多麼無聊的笑話或動作，也能令朋友笑破肚皮。

但在大學裏，或許你早已被當成異類。

「知唔知點解中學識嘅朋友會friend啲？」我問。

「唔知啊。」

給大家三秒鐘，也不妨想一想..





「中學校規多，守校規嘅少。你唔俾我傾計，唔俾我玩電話，唔俾我瞓覺，我偏偏要做。

仲係一班同學一齊挑戰校規。邊個未試過同班friend坐喺後排用電話打機，一邊打仲要驚俾人發現，仲刺激過玩過山車。

有時瞓覺瞓到落堂先醒，然後發現隔離位個死黨瞓得仲捻過你，真係得啖笑。

到接近考試，又會無啦啦成班轉死性咁，每日翻學淨係溫書、操卷。明明同平時嘅自己截然不同，但後來就會諗翻起呢段最熱血嘅時光。

因為有班壞就同你一齊壞，勤力又同你一齊勤力嘅朋友..一班至死不渝嘅朋友。

係，雖然畢業後見面嘅時間就唔再多，但間唔中聚一聚，講下東講下西，感情反而仲好過以前。

但係去到大學，咩嘢校規再唔成拘束。

冇人會捉你頭髮唔合標準，冇人會捉你玩電話、瞓覺。

一切以前要好鬼祟做嘅嘢突然變得光明正大，再唔會有班人同你上堂偷偷摸摸打機，上堂瞓著咗起身望住隔離座再唔係果個你熟悉嘅知己，甚至你根本就唔識佢。

去到考試，個個都掛住衝自己GPA，邊得閒同你一齊溫？」

一邊說著這番話，我便想起阿文等人。

或許是因為他們的出現，才讓我學會甚麼叫珍惜。

與他們每一個的相識，都仿佛讓自己上了不同的課程。

人生仿佛是一個循環，剛出生的時候，圍著自己轉的好像只有親人。

然後開始上學讀書，幼兒園、小學、中學，每一個階段都會認識不同的人。

初始好像認識很多志同道合的朋友，但一旦完成不同的求學階段，又難逃分道揚鑣的命運。

幸運的或許還可以擁有三五知己，但他們陪伴自己的時間真的很少很少。

過客全下了車，作為司機的自己又再次孤獨地走剩餘的路。

「我真係十分十分認同你講嘅嘢啊主持人！」Julian喊道，差點把我的耳震聾。

「其實我覺得人同人之間都好講求緣份，或者你喺大學未搵到姐，不妨同以前班朋友聯絡多啲啊，至少都會有佢地陪住你。」

「但係佢地都有自己生活..」

「真正嘅好朋友一定會抽時間陪自己，哪怕只係小小嘅十分鐘，信我。」

「好..我都相信佢地會陪我嘅。」

「啱啊，希望你好好喺大學讀書啦，呢個學位得來不易啊！」

「多謝你主持人 ！」

聽了那麼多電話，我想這個是我能最設身處地回應的一個吧。