我係個電台DJ，每晚都做個無咩人聽嘅節目: (十四) 不稱職的主持人
「泰..」Sally突然跑過來，氣喘吁吁的。
「做咩啊？」
「頭先我去廁所果陣見到阿強，佢話你個friend同人打交俾人拉咗。」
「fri…friend?邊個啊？」
「好似叫..Ruco！」
「吓？咁大獲？」
「咁快啲走啦，我去拎車送你番屋企再去差館。」
「唔洗啦，我叫咗阿強去停車場攞車，我同埋你地去啦。」
「好，咁行啦。」
一邊走，剛才的不安感越趨強烈。
「搞咩啊佢？」會合阿強後，在他駕駛時，我問。
「佢喺老蘭飲醉咗，同人嘈起上黎仲打人。」
「咁燥做咩啊佢？！」
「我都唔知，去到先算。」
到了警局後，看到Ruco等人步出警局的身影，同行的還有阿華和阿文。
「搞咩啊你，搞到上差館？」我問。
只見他沒有答話，一直向前走。
「佢場婚禮撻咗Q。」阿文說。
「又撻…等陣！」
「人地而家當紥啊，個節目咁多人聽，梗係要執執個Look。」接話的叫Ruco，熱衷於政治甚於家庭的男人。常相信自己的話就是真理。
「佢係一個咩都覺得自己啱嘅人，我又係一個唔易屈就嘅人。」
「啱啊，安安定定其實幾好，而家先發覺原來得閒可以陪下屋企人，陪下女朋友已經好開心。」Ruco說。
「其實我知佢為咗我已經改變咗好多，佢慢慢減輕番自己工作量，多咗時間陪我。我地多咗時間去旅行，唔知點解旅行果陣我地相處得好好，冇鬧交。但係一番到香港，就會變番而家咁。」
沒那麼巧合吧..
「Ruco未婚妻叫咩名？」
「Ceci囉。」阿華說。
「中文呢？有冇中文？」
「你懷疑…」身旁的阿強說。
我點了點頭。
「好似叫阿君。」阿文說。
「大撚獲啦呢次，果個阿君啱啱先打完黎我電台。」
「吓？認真咩？」阿華驚訝道。
「佢唔知你做電台架咩？」
「我地見過一次之嘛，食飯果次囉，Ruco都冇介紹我地做咩嘅。」
「去搵番Ruco先啦仲講！」Sally突然大叫，才驚醒了我們。
「佢喺果到啊！」我們在一個小公園找到他。
「哈，係咪人唔開心果陣特別多麻煩呢？」Ruco問。
「唔好咁啦，有咩唔可以拆掂佢姐？」阿華說。
「拆，點拆啊？佢都唔肯聽人講。我咩都幫佢諗好曬啦，咩都唔洗佢操心，佢咁都唔滿意，咁仲想我點？」
「你成世就係咁，咩都以為自己啱。」阿文不屑地說。
「咁我有咩錯啊咁樣？有咩要煩嘅我都攬曬上身，佢舒舒服服就可以嫁，我咁有錯咩！」
Ruco說得激動，一腳踹到旁邊的垃圾箱。
「錯曬啊！兩個人一齊唔係咁架！」
說話的是Sally。
「你乜水啊..關你咩事？」Ruco問。
其實他見過Sally的，但人在不快時總喜歡用一些晦氣說話發泄在他人身上，尤其是現在矄醉的Ruco。
「你知唔知Ceci唔介意你嘅大男人，佢只係希望得到你份尊重。佢唔係你嘅下屬，唔係你啲隨從。你做每樣嘢係要同佢商量，兩個人之間傾好去，而唔係自己自把自為，最後循例通一通知佢，佢就要咩都跟住你安排去做！
我唔敢話你地之間冇其他問題，但係你地成日鬧交其中一個原因都一定係因為你嘅自私，仲要覺得自己係啱？我係佢我一早飛咗你啦！」
Sally的話簡直是大快人心，雖說我們不介意Ruco這樣的性格，但他這樣絕對不是好事。她這番話仿佛為我們多年來壓抑著的一口氣舒出來！
「係囉，你咁樣唔得嘅，愛係要包容，Ceci係做到，但放任太多就變縱容，佢忍讓你就得寸進尺，咁樣嘅關係點會好？」我說，這簡直是天衣無縫的補充！
「有冇你地講得咁差啊..」Ruco問。
「梗係有啦，講開先講啊，我地真係忍咗你呢樣好耐啦，咁鬼專橫，係我地先頂得你順炸！」阿華也說。
「其實佢唔係真係想唔結婚嘅，聽日去哄番佢啦。」
「你地點知咁多嘢架…」Ruco問。
「都咪話你唔信，咁啱頭先佢打黎我電台節目。」
「認真咩…我冇同過佢講你做嘅節目…」
「有啲嘢真係整定，以你Ruco面皮咁薄，一定會喺到猜疑Ceci，唔去搵佢。」
「但係佢打去電台嘅一通電話先令你可以知佢係點諗，咁你就好好把握機會啦！」阿文在旁說。
那麼多的來電，想不到也會有一天是關乎到我身邊的人的將來和幸福。
但這來電卻讓我質疑自己的不稱職，我不知道我還能否保持著客觀的意見。
若最初我知道Ceci就是阿君的話，我定會為Ruco說盡一些好話。
這可能更拖累了事情的發展。
我更發覺自己原來什麼也幫不了。
身旁的Sally比我更冷靜，看得更通透。
若不是她對Ruco直斥其非，我們幾個大男人可能還在磨磨蹭蹭的。
我們定不敢有勇氣向Ruco說出他的缺點，一定還在說著那些過時的安慰說話。
「啦，天光啦！我地為咗你成晚冇得瞓，你唔好同我衰住番黎啊！」阿華說。
「話時話我地好似冇試過一齊睇日出。」
又好像真的是，即使我們結伴旅行也不會玩通宵。
好幾次相約看日出都不知為何睡了過去。
想不到第一次一起看日出竟會是這種環境。
其實很多事都是這樣，凡事過於強求，或許最後什麼也得不到，也不如來得剛剛好。
Ceci不用Ruco過份的關心，或許她盼望的只是一段恰到好處的關係。
我們看著剛驟起的晨曦，百感交集。
不知道我們還有多少機會這樣一起過。
「愛一個人唔應該怯懦啊可？」在我送Sally回家時，她問。
「做咩啊？你受過好重大嘅感情創傷啊？」
「算唔算好重大呢？其實我覺得一切好似好重大嘅事，過咗一段日子後都變得..who fucking cares！」
「但係當時就死去活來。」我說。
「如果當初大家識得開口，或者就唔會咁。」
「你肯定暗戀過人唔敢開口啦。」
「暗戀而唔敢開口好平常，你知道或者會衰。但如果彼此之間都知道對方心意都唔講，咁就好有問題。」
「咁點解你當初唔開口？」
「可能大家當初仲好細，都唔識點去應對。應該拍拖？又好似好早。唔係男同女一齊，個title多咗個『男女朋友』就叫做愛情。」
「有幾細啊？最細咪中學。」我說。
「六年班，小學六年班。」
「嘩..」
其實我並不是不知道她很早熟，但聽到的時候還是有點驚訝的。
很多人以為青蔥的傾慕很幼稚，很無知，但我告訴你，若你可以在六年級遇上那個她，這將會是一生最難忘的。
即使是相戀還是暗戀，你會永遠記得當初大家對愛還是一片懵懂，不懂得什麼「收兵」、「戴綠帽」，彼此心意很直接，是一生中最純真的愛戀。
「做咩，你未試過？」
「得閒都拍下拖架..對上一次係四年班。」
「超，有冇抄埋歌詞啊？」
「嗯？」
「你估你係鄭中基咩，龍咁威我睇過好多次架！」
「你呢啲高冷型都會睇龍咁威？」
「好出奇咩？」
想像她一邊看一邊捧腹大笑的畫面，真的很好笑。
這女孩，越來越有趣了。