我係個電台DJ，每晚都做個無咩人聽嘅節目: (二十) 迷途羔羊

「歡迎收聽徘徊太子道，我係你地節目主持人太子！闊別兩日，唔知各位呢個周末過得點呢？」

回到工作崗位，重覆著一樣的開場白，但又仿佛有點不一樣的感覺。
 
「太子今個禮拜就好實在啦，唔知大家有冇留意新聞，我地電台尋日就協辦咗個嘉年華，個活動相當成功...」我把嘉年華的過程在節目中分享，希望大家對於義工有多點點認識。

「仲有啊，今朝我就收到一位朋友嘅短訊，佢地剛剛完成佢地嘅婚禮。每次得悉朋友結婚，我都會為佢地而感到好開心，希望大家遇到真愛唔好咁易放手啊！」

說這番說話時，我突然想起Ruco和阿君。





不經不覺我也說了一段時間，阿強在窗外提醒了我廣告時間早已到了。

今天阿強暫代Sally當接線生，希望不會把聽眾嚇跑，大家都清楚本來觀眾已經不多。

隨著日子的推移，今天的聽眾已不像過往般「奇怪」，我在做節目的時間也總覺得流逝得很快。

很快就到了是日最後的電話。

「徘徊太子道，我係太子，你好！」





「太子哥哥你好！」一把很慈祥的聲音從話筒另一邊傳來。

「你好啊，你係劉婆婆？」是一位老婆婆。

「係啊太子哥哥！終於打到俾你啦！我好鐘意聽你個節目架 ！」她好像很開心的說。

「叫我太子得啦婆婆，你試過打好多次黎啦？」

「咁又唔係啊，我第一次打黎，等咗成晚一直輪唔到我。」





「辛苦你啦婆婆，咁有恆心！」

「聽你個節目好開心架，你把聲又好聽，見解又獨到。」雖然婆婆不是青春少艾，但也把我哄得戚戚然。

「但我個節目好夜做架喎，婆婆做咩咁夜瞓？」

「老人家瞓唔到咯，慣架啦，幾十年都係咁。」她輕描淡寫地說。

「喔，咁婆婆點解打黎嘅？」

「我想打黎講啊，我都有去到個嘉年華架，今日個活動好好玩啊。」

「婆婆你都係果個屋邨嘅邨民？」

「係啊，我住咗果到幾十年架啦！」





「嘩，咁耐架啦？」

「係啊，我同啲老友記果日都玩得好開心！」她就像個小孩子般炫耀。

「我地遲啲都會喺果到搞其他活動架，你都可以黎玩啊！」我說。

「好啊好啊，你地做社工嘅真係好好人！」婆婆或許不知我們只是義工，不是社工。

「婆婆啊，我地只係義工黎炸，唔係你地見到果啲社工。」

「我以為你同果啲社工一樣架添！」

「唔係啊，乜啲社工都好好人架咩？」或許接觸多了，也想了解多一點社工的工作，用來當跟婆婆聊天的切入點也不錯。





「係啊，佢地喺生活上幫咗我好多，最重要嘅都係幫咗我個孫仔。」

「你個孫仔？」

「唉，講起我個孫仔就老套咯，好似啲電視劇情果啲呢，果啲校園劇咁架。」

「你唔介意就同我地分享下啦！」

「好啊，佢啊，之前好曳架，佢老豆老母..即係我個女同女婿又離咗婚。」

「所以佢地就冇理你個孫？」

「係啊！卒之咪劈佢去我到同我一齊住囉。」很典型的邊緣青年背景，我心裏想。

「不過咁喎，個衰仔好聰明，考試考得好好架喎，成日都拎頭三名，只係個操行麻麻。」





「佢曳成點啊？」我問。

「唉，我個老公死之前管得佢好嚴，成日令到佢好唔鐘意呢到。但係個伯爺公走咗之後個衰仔又喊得好傷心喎。

我以為佢識諗啦，點知原來唔係。」

「情況仲壞咗。」我推論說。

「係啊，佢開始唔番屋企，番都夜一夜先番。」

「好多破碎家庭嘅小朋友都好易會諗錯一邊。」我說。

「但係佢個成績又一直都好好，我就好奇怪啦。我去果啲咩家長日嘅時候，啲老師對佢嘅評價都話我好頭痛啊，唔識教咁樣。不過都好彩，佢好孝順我架！」





聽到這裡，我似乎聽到一點端倪了。

「咁啲社工點樣幫到佢呢？」

「有一次我就去社區中心啲活動啦，同啲老友記一齊去玩啊，大家好開心架！之後有啲社工就同我地傾偈咁囉！佢地問我好唔好玩啊，又問吓我平時啲生活啊咁樣囉。」

「之後你地就講起你孫仔啲嘢啦。」我接著說。

「係啊，佢地聽完我講之後，叫我第時帶佢黎番社區中心，咁我就照做啦，開頭都驚佢唔肯黎，好彩最後都肯。」

「然後呢？」我也很好奇事情的發展。

「佢地傾咗啲咩我唔太清楚啊，我淨係記得我地走果陣佢地俾咗個電話我地，話呢個姑娘會幫到我地喎。」

「如果唔係你話社區中心啲人叫你咁做我仲以為係詐騙案。」我笑說。

「我地都有諗過係唔係架，阿孫都話算架啦，但係我話唔得，試下都好。我實在唔想睇住個孫咁樣沉淪啦。」

「咁又係，雖然話佢好錫你，但係始終唔知佢喺出面做緊咩，一陣犯咗法都唔好。」我說。

這個年輕人真的很幸運，有一個那麼眷顧他的親人。

「啱啊，我地搵咗阿姑娘，姑娘真係都好好人啊！成日搵我個孫參加啲活動，佢之後真係開朗咗好多啊！佢得閒仲會黎我屋企探我添！」

「嘩，呢個社工咪成個天使咁？」我問。

「係啊，雖然我到而加都唔知佢點解咁大轉變，但係有咁嘅改變我都滿足咯。」

「咁就好啦，你個孫仔如果真係覺悟咗嘅話你就唔洗擔心啦，佢咁錫你一定會照顧你好好！」

「唉，我都幾十歲，唔好聽都叫果頭近，仲等多幾多年啊，我都唔係希望佢會照顧埋我定點，我只係望佢生生性性，唔好學似我個衰女咁丟低頭家，一年翻幾次屋企就算，咁唔負責任姐。」

「唔好咁講啦劉婆婆，你一定可以健健康康，長命百歲嘅。」

「承你貴言啦太子哥哥，哈哈哈！」婆婆開懷大笑。

「好啦婆婆，今日節目都差唔多完啦。我地下次再傾！」

「好！再見啦太子哥哥！」

掛了電話後，心頭竟然出現一陣溫暖，來自於劉婆婆的活潑，跟她談了很短時間，卻感受到她的樂天。她對孫兒的疼愛也觸動了我。雖然因為年紀的老邁而對他的變化感到無能為力，但她卻從沒有放棄，貢獻最後一分家庭溫暖
給她的孫兒。