我係個電台DJ，每晚都做個無咩人聽嘅節目: (二十九) 悔不當初

「唔該曬啊文哥、強哥、太子哥！我有嘢做要走先啦！」過了一段時間後，阿彤便要先離開。

「嘩，文哥你真係好勁！聽你講兩個鐘仲好過翻一日學。」阿彤走後，我們開始閒聊一會，因此阿海便說。

我們三個中年人跟一個青少年談天，這組合也有夠新奇。

「乜你學校啲老師教得好差架咩？」阿文問。

「如果依書直說都叫好嘅話咪好囉。」





「唉，我地做老師有時都好矛盾。教好學生固然係好，但教得完書都好重要，畢竟要應付考試，關乎前途。我地緊係想將每個學生教到知書達禮啦，但係時間唔許可就係唔許可。」他道出了教師的心酸。

「咁你平時點樣讀書架？」阿強問。

「自修囉！上堂我索性自己學自己做架啦，橫點佢地都唔理嘅。」

「自修？自修都可以咁好成績？」阿強驚訝道。

「有幾好啊？」我問。





「條友仔全級20名內架。」

「咁厲害？！」我也驚訝了。

「勁又點啊，我都唔鐘意翻學。」阿海說。

「又點解呢？」阿文問，看來他的職業病發作了。老師有什麼職業病？就是了解學生嘛。

「我覺得啲同學都好唔鐘意我。」





「你好黑人憎架咩？」我問。

「即係可能有時我講嘢比較直，所以成日得罪人。」

「你講咗啲咩先？」阿文問。

「譬如有時啲男同學剪咗個好核突嘅髮型，我就話佢個頭剪到好似個蓋咁。有時啲女仔俾仔飛我又會講佢地有咩缺點咁。」

「細佬，講嘢直同踩人你識唔識分架？」阿強問。

「我又覺得自己講得冇錯喎，啲女仔好多性格都有問題，我都係指出佢地嘅問題姐。」

「講嘢直接唔代表俾你攞正牌去Hurt人嘅。」我說。

我總覺得有的時候，人總起喜歡用一些較美麗的字詞來掩飾自己醜惡的性格。說話不經大腦卻說成直截了當；多愁善感卻說成感情豐富，總之有千百萬個藉口為自己辯護。





「咪係囉，講嘢永遠客觀地講重點，唔會兜一大個圈果啲先叫直接，唔係叫你去講你主觀上嘅感受。可能人地唔覺你係啱呢，你又唔係同果啲女仔拍拖，你點知佢地真實性格係咪你所睇咁樣。冇乜分寸嘅說話好易會對人造成傷害。」阿強說。

「係啊，好多校園欺凌都係咁樣唔經唔覺發生。」最為了解的阿文說。

「我都試過用好衰嘅說話Hurt一個女仔，我到而加都好後悔，我都希望你唔會。」阿強說。

今天的阿強，仿佛像個人生導師。我最佩服他的，是他總能用合適的態度與不同性格的人說話而不輕易得罪人。

而且他說的話也不是不無道理，寥寥數句顯淺的說話，便道出阿海的不是，並很有說服力。

加上語氣上的溫和仿佛有種魔力令自己反思自己是否真的做錯...我說的是我自己，我並不知道阿海的想法。

但我可以肯定的是，他平常很少會這樣認真的說教。





他這樣的認真，或許真的不想阿海重蹈他的覆轍。

「強哥你都啱嘅..我有時都太自以為是，搞到啲嘢錯曬。」本以為阿海的一句反省是針對著他對同學的狂妄，卻想不到有弦外之音。

「係喎，都晏啦，你要番去陪你阿嫲食飯啦，下次再傾啦。」阿強看著手錶跟阿海說。

「係我阿婆啊！不過都係時候翻去啦，費時佢等。」

阿海走後，我們也離開了，之後我們走到西灣河海傍踱步。

「你好似好緊張呢個細路咁喎。」阿文說。

「好慘架佢，細細個就冇咗老豆老母，好彩識到我地，唔係社會上可能又多一條毒蟲。」阿強說。

「又係冇老豆老母？」我喃喃自語。





「又係？」阿文問。

「冇，我果日做節目有一個婆婆打黎，佢講佢個孫又係冇咗老豆老母。」

「又會咁橋嘅？」他說。

「邊有咁多咁橋啊，佢個孫咪就係阿海。」阿強說。

「你又知..？」當我說出這句話時，已即時想把它收回。

當天的接線生不就是阿強嗎？！

「你而加先講？」當我驚醒之後，我馬上問。





「你又冇問，我費時講咁多人地嘅嘢啦。」

「冇啦啦我點會問啊！」我沒好氣地說。

「嘩，個世界真係細咯，兜咗個圈原來個電話係圍繞一個大家都識嘅人。」阿文笑著說。

「咁其實阿海發生過咩事？」我好奇地問，希望能從阿強口中得知真相。

「你問我都未算最清楚。」

「咁應該問邊個啊？」

「有機會就等天使解答你嘅疑問。」

「天使？」

「你遲啲就會知。」他在賣弄神秘。

「咁你呢，原來你仲未放低果個『佢』啊？」阿文轉移話題跟阿強說。

「邊個佢？」

「你自己頭先講好後悔果個囉！」

這已經是很久以前的事，說起這個女孩，只怪阿強走掉了眼，才成為他心裡的一道遺憾。

「痴線，我氹下條𡃁仔炸。」

「真係？」我猜疑他。

「扮咩啊你，明明早排都有拍拖，但呢排又冇曬聲氣，肯定因為放唔低以前果個啦。」阿文說。

確實阿強最近才跟女友分了手，其實我也感覺他和前女友的關係不太好，看他經常工作，也不常提及女友便知道。

「唉，過咗去嘅嘢就算啦！」他說。

「都啱嘅，或者都冇機會再見到佢。」我說。

有時我在想，世事到底是巧合，還是冥冥之中自有註定。

關於阿強和這個女孩的事，已算是後話了。