【懸疑】《珍珠奶茶殺人事件》: ——第二十六章：關鍵的推理 ——
天氣驟變，灰雲蓋過了天空，落下點點如絲的細雨。
雨點跌在車窗上，看似漫天星斗。我靠近右邊車廂托頭觀察著，心情憂憂的。
的士的車速已經不慢，其實還有點超速了，可是我依然覺得不夠快。
「喂你肯講發生咩事未呀？」
對著身邊意外地出現，加上喋喋不休的吳Sir，我真的想把他一腳蹬出車廂。
可是現在的他，絕對有理由把我立即逮捕，得罪他沒有好處。
我結果還是解釋了給他：「我睇穿左老王既把戲。」
「下？」
「係佢既一貫技倆——故弄玄虛。」
「今次又關故弄玄虛事？」
「你諗下，阿邪啱啱話護士兩個半鐘前見過Shirley，而老王就話兩個鐘前飛左。醫院前往機場已經需要一段時間，仲未計Shirley會反抗，如果麻醉Shirley既話又會需要搬佢上機，時間上過份緊迫，以老王既處事手法係唔會咁做。」
「咩呀？」吳Sir滿頭問號：「即係佢地根本無上到飛機？但係頭先明明喺個屏幕見到佢地喺機艙，雖然環境好黑，但靠住張飛機櫈肯定認到......」
他說到這裡忽然停頓一下，然後恍然大悟的看著我，一臉震驚。
「唔通...張櫈係假既？」
我苦笑一下，笑他像個笨蛋一樣。
「我明喇。」吳Sir喃喃的道：「所以佢應該係匿埋左喺某個地方，營造到好似喺私人飛機入面，再同我地交涉。」
「呢個地方，好可能就係大圍車房。」我斷定。
「但係我地警方之前先封鎖左現場，照道理佢唔會咁大膽過番去喎......」
「愈危險既地方就愈安全啊。」此時，車子已經經過沙田，快要到達大圍。我瞧瞧窗外光景，續說：「車房地牢又黑又寬，而且周圍裝滿哂閉路電視，絕對係個好好既地方比佢監察，如果有人想入去佢都可以馬上有防避。」
「你有道理......但咁搞法，」吳Sir撇撇嘴：「我地一陣入去，佢一定會發現架喎，到時你條女咪仲危險？」
「後門。」我說。
「係喎！」吳Sir再一次恍然大悟：「差啲唔記得，後門無閉路電視啵。」
「只要偷偷喺後門入去，然後睇準機會制服佢，咁Shirley就唔會有事。」我眼神堅定的向前看。
吳Sir怔怔的看著我，隔了半天，他忽然緩緩的嘆息：「如果你係一個警察，咁咪幾好囉......」
我略帶錯愕的回望他，只見他神色黯然，看來剛剛的一句話是由心而出的。
從來沒有想過，對我恨之入骨的吳Sir，竟然也會這樣跟我說話......
我亦是臉色一沉，久久才回他：「呢個世界，邊有咁多如果。」
再過了兩分鐘。
的士到達了——
我們在車房後的馬路下車，沿著小巷的路去到車房後門門前。雨水嘩啦嘩啦的落下，我掏出手機查看時間，手機表面迅即沾濕了。
「由頭先到而家已經過左二十分鐘。」我跟吳Sir說：「時間唔多，老王過多十分鐘後，如果唔見李加鼎自殺既話，實會殺左Shirley。」
「咁就事不而遲啦。」
左右顧盼一番，確保沒有人窺視我們後，我便慢慢打開後門，盡量不發出任何聲音。
踱步進去黑色一片的通道，由於陰暗下寸步難行，吳Sir開著了微型手電筒電源，靠著弱弱的燈光探路。
每走一步路，心房的跳動就愈趨激動，這種感覺在以往的殺人任務中是未曾擁有的。
我自己亦感到驚奇，大概緊張的原因不是擔心老王發現我們，而是Shirley隨時會有甚麼不測吧。
被黑暗包圍的我們，走了一會兒後便去到一道門前。
「我記得門後面就係地牢，擺放喇叭既位置。」我小聲道。
吳Sir關上電筒：「開少少門，望下咩環境先。」
我握著門把，全神貫注的控制力度，好讓門扉不發出聲響。
打開一點點門，一線光芒霍然由裡頭闖進來，光芒不強亦不刺眼。我和吳Sir把眼睛擠向那道罅隙，窺視情況。
我不禁詫異的皺眉頭。
地牢的外貌完全改變了，跟之前我印象中的大相逕庭。不僅是擋在後門的喇叭消失了，牆壁的美式佈置設計通通移除掉，取而代之的是平白樸素的設計。
原本安放在中央的長桌不見了，改為擺放著一張飛機座椅。
飛機座椅上躺睡著一位余霞成綺的女子，她的正前方是一張高枱，枱上的電腦佇裝了鏡頭投射向她。
看到Shirley後，我先是舒懷，卻又變得十分憂慮......
她的樣子異常的虛弱，本已發白的乾唇透現紫抹。她呼吸急促，而且每次也很費氣力，可能因為老王對她下了麻醉藥，而藥效觸發了副作用，令她感覺強烈的不適。
我正想把門再打開多點，好讓我進去營救她，吳Sir卻連忙抓住我，緊張得指甲也掐進我的皮肉裡。
「你傻左咩？老王隨時喺度架。」他咬牙切齒道。
「咁唔係點喎？你見唔見到Shirley已經奄奄一息呀？而且我地都唔見老王喺度啦。」我比他更緊張，Shirley的狀況不知還能支撐多久。
「你冷靜諗下，既然老王係個心思咁細密既人，佢又點會由得你條女一個喺呢度？」
「可能佢去左大便呢？」我很不耐煩：「如果唔趁而家出去，我怕再無機會。」
「點會無機會？我地只要等到老王出現，然後我喺呢個位置瞄準佢開槍咪得囉。」
「我等唔切喇。」
我猛力打開門，一躍而出，急速環顧四周後便趕去查看Shirley。吳Sir見狀亦唯有出來，他沒有走過來，而是守在樓梯口前監視著。
我瞧瞧Shirley，只見她滿臉辛苦，就連我來到她跟前她也感覺不到。
我捉住她的手，手是冷冰冰的，我心中不禁一陣泫動。
「Shirley，放心，我而家即刻帶你返醫院。」我手忙腳亂的為她鬆綁。
綁著她的尼龍繩索緊得要命，我手頭上又沒有匕首之類的物品，一時間不能馬上鬆掉繩子。
隔了半响，吳Sir一面顧著樓梯入口一面問：「得未呀？」
「好快，比啲時間。」我猛力扯開尼龍繩。
他沒好氣的看著我：「你唔係唔識解開佢下話？」
「你就唔識，我......」
我正想跟他爭辯之時，驀地看到微微一道黑影在吳Sir身後，我打算開口之際......
噗。
一把刀子在吳Sir腹部貫穿而出，冷峻的刀鋒混合著鮮血。吳Sir愕然的僵了僵身子，還未能回頭看個究竟，已經按著腹部倒地。
吳Sir倒地後，原本他的位置站著一個六十歲的老人。
「利害，利害。」那人拍拍手，從容的走下來，仿佛剛剛甚麼也沒有發生過。
我戒備的盯過去，微弱的燈光開始能映出他的模樣。
只見老王齜牙咧嘴獰笑著。
「係我太睇少你喇Paddy，搞到全盤大計都毀於一旦。」
「老王......」我怒瞪他。
「睇你個樣，好似好憎我咁啵。」
「我同Shirley，仲有其他人到底有咩得罪你？點解你要對我地個個都趕盡殺絕？」
「咁我老婆又有咩得罪人？」他睜大眼反問我：「佢對我咁好，每日都為我打點家頭細務，愛我無微不至。知道我工作性質危險，又經常勸我早啲退休，仲居然話會養我，個傻妹......竟然比人殺左......」
憑著他的一字一話，我深深感受到他的無奈，同時間，我亦對他更添狠意。
「所以你就要報復？甚至係向唔相關既人落手？我地係無辜架！」我吼罵道。
怎料他𨺗然從口袋掏出了槍，舉槍指著我：「你地無一個人係無辜。」
我見槍後一驚，唯有閉上了嘴。以老王現在的情緒，我相信他隨時真的會開槍。
「李加鼎呢個人罪大惡極，佢身邊既所有人都要死，等佢同我一樣，感受下絕望無助既感覺。」
我對他的言論大為不滿：「你指既所有人，竟然包括我地呢啲奉命行事既殺手？」
「當然。」老王理所當然道：「當年我老婆既死，就係多得你地啲殺手所為。要數最無辜既，可能就只有你既女人一個。」
他瞥了瞥Shirley，不見得有一絲悔意。
「咁你自己呢？」我問。
「我？」他錯愕一下。
「你作為殺手界既中間人，根本一直助長緊呢種風氣。而且當年你仲係李加鼎既御用中間人，你唔覺得自己好矛盾咩？」
「我唔覺。我點會有錯？我做既所有野都係為左我既家人，我既老婆，咁樣有乜野錯？」他強詞奪理。
「哼，如果我係你老婆，我實對你好失望。」
話未說完，老王竟然扣下板機，一發金屬子彈在迅雷不及掩耳間貫穿我的右臂。
我啊的慘叫半聲，致命的疼痛經由神經線刺激我的腦海，身子馬上就痛得不聽使喚，我腿子一軟跪在地上。
該死，老王真的開槍了。
「唔準你講我老婆......」
他情緒突然很激動，眼睛睜得冤大，一步一步跨到過來，槍支牢牢指住我的頭部。
「上次殺你唔死，今次你唔會咁好彩......」