[高中][少甜]《如陽光伴我》: 詩晴結局篇 序篇

「結果我都係搵唔返部電話。後來軒逼我去睇醫生，醫生覺得我可能有抑鬱。呢兩三年一直都要食藥。特別係失眠既時候，藥物的確可以幫到好多。當然仲有軒，一有假期佢就會陪我喺歐洲周圍飛，或者開住部車橫過一個又一個既國家。法國、西班牙、荷蘭、意大利，當然仲有德國本土，大多數既地方都去過。返到香港，我就遇到橙，然後就係你。」

我喝了口水說，「大概係咁。之後都係你知道既事。我從來都無咁完整講過成個故事，就連對軒都無，可能有少少長同混亂，對唔住。」

晴一直細心聆聽著我說的話，在我停下後輕抹眼淚，一時無法開口說話。

「對唔住啊，我唔應該逼你講呢件事。」她過了一會，嗚咽說。

「傻啦，如果我唔想講。我點都講唔到出口。我想講既係，我唔係要離開你或者任何人，我只係無辦法走出過去，直至呢一刻都係。」



「唔緊要啊…就算放低唔到都真係唔緊要！」她說。

「我無辦法…無辦法。有時我真係好想放棄。」我低頭說。

「大哥哥…唔使逼自己啊，真係唔使。無辦法再去愛另一個人唔緊要嫁，我明白。或者唔明，但我會努力去理解。不過你要記得我地每一個都好愛惜你。事先聲明啊，唔係無條件嫁，你一定要努力努力努力堅持落去，如果唔係我、橙，阿軒，仲有你中學既嗰一班朋友，每一個都會好傷心好傷心，你知道嘛？」

「知道啦。」我呼了一大口氣，車轉入新宿，晚上八時左右我們從旅遊巴上下來。

「你唔使送我啦，我自己行返去就得。Roommate話想同我去食壽司啊！」晴說。



「可能可以做你喺新學校第一個朋友。」

「係因為你幫我祈既護身符啊，同學…都應該係同學業有關！」

「我好少運氣咁好。」

「嫲嫲話人有三衰六旺，可能開始六旺啦你。」

「呢個可能性比較低。」我抓抓頭皮說，「真係唔使我送你？新宿好危險。」



「你睇得太多新宿事件啦！」她笑著然後說，「聽日後日係最後兩日啦，如果你想自己靜下既話都可以，唔好勉強自己啊。」

「喂，羅詩晴。你唔好因為聽完我講既事所以而改變對我既睇法，仲有同我既相處方法。」

「點解啊？」

「因為同嗰個有話直說，有開心唔開心都同我講既蠢材羅詩晴相處，我覺得好舒服、好開心。」

「真既？」

「嗯。所以…請你唔好因為今日我所講既事而改變。」

「知道啦！咁我准許你聽日後日陪我去玩啦。」她依著我說。

「…多謝曬喎。」



「咩啊，而家又唔鐘意啦？」

「唔係。不過你真係又可以蛇出嚟？蛇左好多日啦喎。」

「嗯嗯，聽日都仲得，後日就要諗下...不過我有個方法。」

「係？」

「後日見到我未知囉。不過去邊到好啊？」

「『後日見到我未知囉。』」我學她說話。

「哼！...吾，一係咁啦，聽日就我決定行程，後日就你，咁好唔好？」晴說。



「就咁話。」

「咁我走啦！」晴說。

「...你走啦？」我問。

「嗯嗯，做咩啊，你有野想同我講？」

「吾...無...總之小心。聽日見。」

她對我做鬼臉，再一次笑著向我揮手道別。

把收藏在心內幾年的所有秘密說出來，心的壓抑感好像少了一大半，要感謝的眼是這個樂天的少艾。

聽著她平時說的鬼精靈話、做的鬼臉和蠢事，總好像有一種魔咒一樣，把內心深處最快樂和最心痛的回憶都勾了出來，我不知道這樣是好還是壞，但至少在這一刻，我有點釋放的感覺。



這天晚上，我睡得很沉很沉，就像在倫敦重遇心如的那晚一樣。

（詩晴結局篇 序 完）