風之軌跡（校園，戀愛，籃球）: 風之子 上

我就咁睇落去個個都唔似識打波咁，睇黎我今日我都可以大發神威啦。

說時遲那時快，我就見到今朝果個叫我上課室果個阿sir。

「今年又咁多人呀，你地自己搵5個人，等等我地5v5全場，打21分，睇你地表現啦。」

佢一講完大家都開始搵隊友，我見到佢地個個都左識得咁，好快就分左3隊，啱啱好靜低嘅人包括我在內有5個人，自自然然就組成一隊。

我見到有個同我同隊，目測啱啱好米7左右，唔算太高白白淨淨嘅人同我自我介紹。





「你好呀，你叫我傻韋啦，我打開sg（得分後衛），最鐘意嘅籃球明星係閃電俠韋德（d wade),多多指教」

我見佢咁有禮貌我都向佢自我介紹。

「我叫阿健，打開pg,最鐘意嘅球星係Steve Nash ,多多指教」

我講完之後，後面忽然有把女仔聲同我地講野

「風之子Nash ，好耐都無聽人講過啦，宜家聽親d人講控衛都係講curry，估唔到你都睇左幾耐波」





我回頭一睇發現同我講野既正正就係林玥晴。


佢又繼續講「估唔到你真係黎左，今日上堂重諗緊你會唔會黎」

我覆佢「我本身就鐘意打籃球啦，係今朝比你嚇親先無覆你姐」

「咁就睇你表演啦，風之子！」






佢一講完哩句就轉身離開行去計分版果面。行過去嘅時間重要回頭對我笑，係果一刻我個心完全比佢俘虜。留意番四周，都係對我仇視嘅目光。


好啦，做完熱身就會開始正式比賽，我當然輕鬆上番幾籃熱番個身先，邊熱身邊留意下d隊友勁唔勁。

見到其他我唔知名嘅三個隊友連上籃都炒，我就心知不妙。

好彩重有傻韋，我見佢三分麻麻但係中距離跳投幾準，上籃都幾好，睇黎信得過嘅隊友得佢一個。


正式開始比賽，第一場由其他兩隊人打，我地隊下場先。所謂知己知彼 百戰不殆，我就睇下佢地咩料。


我見到有一隊有個幾高幾型有d肌肉嘅中鋒。基本上沒無人可以籃底攞到分，籃板都差唔多比佢攞曬。





佢重要自帶啦啦隊咁，超多人幫佢打氣，睇黎佢係人氣王黎。

大炒21比4，睇黎要贏都唔係咁易。唯有好好咁面對下場比賽先啦。


終於到我嘅果場比賽，我地企番我地打嘅位置，我打控衛，傻韋打分衛，其他果三個人就唔識籃球咁亂企。

基本上我對果三個人完全無其望，唯有自己上啦。


正式開波，對面個中鋒一黎就跳球跳贏,佢一手傳番去控衛嘅手中，一睇就知佢地識打波。


對面控衛過左半場正式同我對決，佢一個crossover想過我。我見佢傾向左邊，咁我就順住佢個勢一手抄截佢個球。





攞番進攻權之後，我就直奔半場。對面嘅回防速度都幾快下，打唔到一個快攻得分。


我招手提示我地隊嘅中鋒同大前鋒幫我pick (擋），但係佢地真係同頭文字D嘅阿木一樣真係唔識㗎，企起到唔知做咩。


好彩，傻韋見到咁嘅情況就幫我pick。雖然佢唔高又唔大隻，但都叫pick到少少。我就順著個勢上前。


對面個得分後衛因為個pick嘅關係變左mark 我，宜對面個控衛又沒轉mark 傻韋，做成一個空檔。我一手傳後，傻韋一個罰球線中距離，輕輕鬆鬆2分入手。


比數2比0，好嘅開始。