誰搬走了我們的半塊芝士: [第二章]第四十九集：那天之後,我們將會在歷史上留名

「一切本來相安無事，唔知係計算上既失誤，定係人為既疏忽，亦或係某個人既計劃，總之，最後毫無疑問係出左事。一切都返唔到轉到，所有野都開始崩潰，已經無任何人可以阻止到。如果唔係五年前果件事……唉……」

使用純黑色頭像的簫風用輕描淡寫的語氣說道。

然後象徵賣魚勝身份的黑底白字「01」頭像，邊框立即亮起回應：

「世上無野唔係邁向緊滅亡，我地能夠做既只有爭取時間，延遲悲劇。」

「而家事實擺在眼前，你話我聽，重有乜野方法可以延遲悲劇？」簫風消極地回應道。





「如果做唔到既……就唯有接受啦，有個偉人講過：『命運就似強姦』，抵抗只會更痛苦。你而家重後生，至少重有時間再闖啊。」

「但係……！我而家應該用乜野心情黎面對啊……」

面對簫風無助的疑問，賣魚勝想了兩刻，用善意的語氣回應：「我諗……依個時候，只要笑就可以了。」

弗洛伊德頭像不知不覺地出現，在我發現前已開口問：「你地究竟講緊乜撚野？」

我保持鎮定，官式地先問候：「超級駭客，你返到黎喇？」





弗洛伊德就是超級駭客的頭像，一如以往的不合襯。

他以半分歉意說：「唔好意思，有d野做，遲左少少。」

Moscow killer一直都在，只是代表著他的針筒頭像一直也未亮過邊框，即是從沒說過半句話，可是他間中還是會用即時訊息以文字回應對話，表示他是在座的。

見現在四位《巴別塔光明會》的成員都到達，我就開口說：

「而家人齊，就入正題啦。」說罷心中暗暗悲嘆，我為什麼要做這種無謂的會議司儀？都怪四眼仔缺席，如果他在的話，我只要間中輕輕說兩句話帶領一下這群傢伙，有型一下就可以了。





「等等，其實你地頭先講緊乜撚野？」主題未開始已有人離題，這個人就是超級駭客，那個可恨的檸檬人。

「無乜野，只係簫風考試fail左姐，無乜特別。」賣魚勝輕輕回應，就一秒超級駭客就用世上是無情的方法回應一句：

「哦。」

就這樣換來了二點五秒的沉默，直到聽到簫風在遠方的苦惱怪叫，我就繼續話題，正式開始今次會議：

「我收到可靠既線報，近期醫院陷入封鎖狀態，相信同魚柳包有關，詳細情況我今朝已經係Whatsapp群組分享左出黎。」

「下？有咁既事咩？」簫風好奇地問。

不用我出口，賣魚勝已回應：「你無睇Whatsapp？另一單係醫院封鎖事件啊嘛，你識唔識人係醫院做啊？」





「可能比其他群組遮住左，唔好意思。我只係一個平凡既窮撚中學生，點會識人做醫生啊？」簫風理所當然地回應。

「咁你依排有無去醫院啊？」超級駭客以非常賤格的語氣問道。

簫風以喜感十足的語氣反問：「都無啊，好人好者點解去醫院？」

「你戒極都戒唔到J，我認為你有心理病，點解唔去睇下醫生呢？」超級駭客用力恥笑，可是不論怎看我都覺得他比簫風更需要醫生。

「點同醫生講？唔通話『我成日性慾都好強啊，幫下我啦。』咁樣啊？」簫風的語氣異常鬼馬，單聽聲音已經想笑出來，相信這就是所謂的喜劇天份吧。

「後生仔，一陣J撚到腎到壞尻埋你就後悔莫及喇。」其身不正的肥佬又再繼續教訓道。

「你信我，我一定戒得到既。」

簫風說罷，賣魚勝為免話題過度偏離，為大眾作個引導：「唔好講依D住喇，依度有人識人係醫院入面做？」





「我識啊。」非常迅速的回應，同樣是來自Moscow killer的文字訊息。

超級駭客連帶語氣和話題一起轉台，語帶著緊地問：「下？咁你又無問過佢，政府點解偷偷地閂哂D醫院？」

作為凡人的他們並不知道背後的真相，即是「無嬰症」，若我講出真相，恐怕在座的各位都會嚇到瀨屎。

為免情況失控，他們將在我決定公開這件事的時候，與世人同時間知道這個可悲的事實。

三秒後，答案終於出來：「無啊，條友仔做婦科既，前排忽然消失左，問返D Friend先知佢原來過左夏威夷果邊渡假。」

簫風接著問：「下？咁佢做果間醫院點啊？」

「我唔知啊，今日夜收工，唔想行黎行去，直接返左屋企，無特登去睇，有需要既話我聽日去望下。」Moscow killer回應得極速而可靠，除了人格有問題不能說話之外，是在座最可靠的一個。





「咁麻煩哂你喇。」我立即回應，這個可靠之人，值得我親自致謝。

「我今日去過望撚過下啊。」超級駭客說。

賣魚勝立即以不滿的語氣說：「你早講啊嘛。」

超級駭客立即解釋：「咁殺手兄佢講緊，我就無謂打斷人啦。」

我隨即就問：「你睇果間有無封到？」

「有啊，同你一樣，都係門口企撚左幾個人，方圓百里鬼影都唔見多隻。」

聽罷，我想起有個更在意的重點，於是就問：「你有無問點解，係唔係又用流感做籍口？」

駭客立即回答：「我無過去問啊，廢事野是非啦屌，你估我唔撚驚死啊，我邊有你咁夠薑啊，ABC。」





說得好，有我這種勇氣的人確實不多，你這個檸檬廢人定必是個懦夫，這一點誰都不會懷疑。

「咁即係話香港至少已經有兩間醫院封左啦？」賣魚勝以有點震驚的語氣問道。

我用嚴肅的語氣，作出一個大膽的假設：「最差既情況係全香港既醫院都封哂。」

簫風即時抓到個盲點問：「無哂醫院，咁D白車去邊啊？」

這一點我都不能肯定：「應該去D類似健康院掛……」

「唔理啦，總之而家香港無哂醫院，成單野已經夠爆，不如今晚就發出去。」超級駭客突發奇想插話道。

只是單單開Post足夠嗎…？

不行，萬一到時有勇者潛入醫院，發現了無嬰症的話…我可失了先機，絕不能讓此事發生。

「而家未到開Post既時機。我地手上掌握既情報太少，萬一比人話我地放流料既話都唔知點交代好。」我對駭客的發言表示否定。

賣魚勝馬上附和：「ABC講得岩……而家開Post太衝動……但我地應該點樣搵更多既證據呢？」

我當然不會放過賣魚勝無意中所鋪出的路，立刻就借勢用沉實嚴肅的語氣，打個進取的快攻：「係外面查已經無意思，不如我地入去查。」

氣氛頓時急轉直下，換來一片沉默，但這已是我意料中事，始終這個做法實在太大膽。

馬上，超級駭客已展現出淆底的本性：「下？外面已經企哂人警戒嫁喎，入到去重得了？」

為應對這種假設，我開出一個更大的假設鎮定人心：「我認為佢地執空城計。外面守衛已經夠哂森嚴，所以入面係空既都唔出奇，而且……入面既祕密，可能連守衛都無權限知道。」

「我懷疑政府有機會做緊人體實驗。」

「下？」眾人驚訝。

「可能政府封左幾間醫院比共產黨做人體實驗，研究生物兵器或者新病毒，如果我地爆到依單陰謀出黎，登埋上報紙，想唔紅都難。」

又是一個無憑無據的空談，連說出這堆話的我自己也覺得荒謬。

可是同時，這個謊言卻能確實激發他們心中的本土主義，熱血一上腦，人就失去思考能力。只要當中有一人認同的話，再荒謬的空談也會變成問題的唯一答案。

「依個假設好大膽，但其實都唔係無可能……所謂最危險既地方就係最安全……香港遠離北京，而且係國際都會，無人會諗到共產黨會係係依度進行危險科技實驗，所以依個可能性唔係話無既……」首先中伏的居然是Moscow killer，真想不到。

隨著他的言論，眾人都一面倒向反政府的一方，恨不得馬上把這事揭發出來。

雖然風向意想不到，但我就是要這種情緒啊。

「聽晚我地巴別塔光明會就入去廣華醫院行返趟，想縮既而家可以出聲。」

見並無任何一人打算退縮，我就號令：

「聽日，星期一，1930係油麻地站集合！」

就這樣，明日潛入醫院的行動就此定下來。

但會議仍未結束，因為我忽然想起一件事，就是南華早報既神祕密碼。


《坡2J灾2I潓3釷2A宬3筤3胉3輥3塊2I
㝗3禆3檭3支2A軍2A䴳3䑁3焿2F錔3
緊急 一路平安》

它究竟想表達什麼？我實在想不透，所以必須提一提：「係喇，你地有無留意南華早報果單野？」

「而家吹到咁行，緊係有啦。」超級駭客回答。

會議已經去到尾聲，我便作個總結：「幫手推下Post先，依單野係網絡上紅緊，繼續討論對我地會有利。但醫院單野記得，記得，記得要保密。」然後宣佈：

「今日黎到依度先，巴別塔光明會第二次會議就此結束，辛苦哂各位！解散！」