所有人反應都同我一樣,大家都目瞪口呆,相信大家都唔能夠接受呢個結果。
 
唔好話佢哋,就連我自己都唔太相信呢個結果。
 
明明差距咁大,但居然話係我哋贏?咁未免太難說服人啦掛?
 
相信另一方都係咁諗,隨即有人對呢個結果提出左質疑。
 
而正係司儀打算解䆁既時候,有一把女聲響起打斷左佢。
 


呢把女聲對我而言可以話非常熟悉,但又有種久違了既感覺。
 
無錯,呢把聲既主人正是我敬愛既大家姐。
 
佢出現係大家既後方,一身黑色綁帶開叉半身裙非常華麗地登埸,慢慢行去禮台,途中仲對我wink左一下。
 
浩銘見到大家姐對眼即刻發哂光,係咁狂拍我膊頭話條女好正。
 
我都唔知點比反應佢好,只好笑兩聲同叫佢冷靜D。
 


大家姐走到台上,咳咳左兩聲清一清喉嚨,好似宣告緊佢即將要發表一D好重要既野咁。
 
大家都屏息以待,睇下佢會講D乜,可以扭轉呢個困局。
 
大家姐:「大家好,今次比賽總算告一段落,我呢幾日都有一直關注比賽既走勢,見到唔少參賽者都好努力爭勝,比我見到大家既決心,呢點令我相當欣慰。」
 
「我知道呢個結果大家未必滿意,甚至覺得點解明明差距咁大都會係佢哋贏咗,但我可以同大家講,呢個結果係有原因既。」
 
「Group 3佢哋完完全全做到我哋期望既成果,佢哋充分利用手上既資源利用得剛剛好,成功盡可能將利潤最大化。」
 


「提到利潤最大化,大家可能會話咁點解唔係另一組勝出,但我希望大家可以諗一諗先。」
 
「無錯係今次入面我哋對於點樣取得金幣並無任何規距去限制,只要你拎得到守得住,金幣就會計入你哋既成績,有人會選擇孤注一擲,將維生用既食物券全部賣走,亦有人選擇伺機而動,靜觀其變。」
 
「但我哋由一開始就無提到金幣會係決定結果既唯一因素。」
 
「所以就算你哋投訴有人假冒工作人員呃哂你哋既金幣我地都唔會理,不過我想問下大家,咁樣既手段出到去創業有可能咩?」
 
大家姐咁樣一講,場上既氣氛都好明顯唔同左,大家既怨氣唔多唔少都減退左,睇怕都係察覺到邊個呃左佢哋。
 
大家姐見到咁笑左一笑,繼續講落去。
 
「無錯,出到去你哋的確可以咁做,但代價亦會好高,有機會負上法律責任。」
 
「我哋想睇既,比起賺取金幣其實更想睇大家用咩方法去做到呢點。反觀另一組,佢哋並無偷呃拐騙,只係利用資訊上不對等既優勢去賺取金幣,而且根據我哋既觀察,佢哋同其他組係金幣上既交易絕對係你情我願,無任何人投訴。」


 
「講到呢點,我相信而家大家應該唔再有任何不滿啦?」
 
我偷偷喵了周圍一眼,無任何人出聲,亦無任何人有所動作。」
 
大家姐:「既然係咁,不如我哋俾d掌聲恭喜佢哋?」
 
係大家姐既帶領下,現場變得掌聲不絕,同我哋爭冠軍既個組更加主動走黎同我哋握手。
 
無錯,亦即係Ashley佢個組。
 
我小心警戒住,但始終分唔出邊個先係佢。
 
最後我哋幾個圍埋一齊,互相拍一拍大家既背。
 


阿輝:「搞掂左啦。」
 
阿Ray:「啊,終於贏到。」
 
浩銘:「我哋係咪終於可以開我哋既模型鋪啦…?」
 
我:「啊…呢幾日辛苦哂大家…喇…」
 
唔知點解,睇野突然變得好矇…所有野都天旋地轉…
 
「阿明!」