《無啦啦多左幾個家姐同細妹Season 3》: 無題

我：「嗯，如果你都對呢份初步合約既內容無異議的話…」
 
王生：「哦！我呢邊當然都無問題啦！畢竟你哋呢班後生仔贏左天晨集團既比賽，我對你哋有信心，絕對唔會咁易走我數既！」
 
我眼前既呢位王生係某間模型用品公司既銷售部人員，今次我哋既會面亦正正係
 
我：「真係好多謝你對我地咁有信心，咁就預祝我地合作愉快先。正式既合約就另外約個時間簽啦。」
 
王生：「其實而家簽埋都可以架喎，唔需要特別再約出黎簽。」
 


我：「哦，因為我希望簽約既時候我班partner可以在場，而且我又唔想我班partner知道我一早已經搞掂哂所有野…」
 
我故意擺出一副害羞既姿態，成功收到預期中既效果，得到眼前呢位王生既同意，佢仲對我讚賞有加，話估唔到而家仲有我呢種咁雄心壯志又識為人設想既後生仔。
 
對於呢一個評價，我只係輕輕一笑帶過。
 
雄心壯志，為人設想啊…都係既…雖然周不時會因為咁而惹來唔少麻煩，仲要我幫手善後。
 
王生：「好啦好啦我都唔阻你，後生仔應該拎多D時間去拍下拖，唔好哂時間同我呢D老野係度吹水，eh…應該點稱呼你好？陳生？」
 


我：「叫我阿明就可以了，我既朋友都係咁叫我。」
 
王生：「好，祝我哋合作愉快，阿明。」
 
王生舉起咖啡杯示意，我當然明白其中用意，同佢碰杯慶祝呢場合作。
 
過左無耐，王生就先我一步離席，而我就選擇仍然留低，享用埋手中呢杯咖啡。
 
呼…明明已經唔係第一次，但都仲係好緊張，隻手出哂汗，好彩戴左手套無比佢發現到啫。
 


「Hi~傾完嗱？順利嘛？」
 
我順住呢把聲音抬起頭望向，果然就見到家姐。
 
我：「嗯，大致上都已經處理好，只係差簽約，不過咁小事都唔洗我做架啦，畫隻龜啫。」
 
家姐：「係啊？如果無其他野做咁不如返屋企囉？」
 
我：「…都係唔好啦，我仲有個件事要查，唔返去住啦。你可唔可以載我去一個地方？」
 
家姐：「傻既當然可以啦，行啦咁~」
 
我無再回應，而係默默收拾行裝跟佢走。
 
係車程當中我地並無太多交談，因為我將所有心力都放哂係眼前既電話同電腦上。


 
畢竟仲有太多資料要整理同調查，一分一秒都唔想浪費。
 
可能家姐都注意到我太過投入，佢一手就搶走我既電話，仲合上我既電腦。
 
我：「喂…唔好玩啦我仲搵出佢而家到底去左邊架…」
 
家姐：「你啊，會唔會逼得自己太緊？」
 
佢用佢個對明亮而又動人既雙眼望住我，仲要望到實一實，望到我都有D唔好意思了，不禁擦一擦自己個鼻。
 
我：「無辦法啊…畢竟件事因我而起，如果我細心D監察個比賽的話佢就唔會…」
 
就係我說話講到一半既時候又一次比家姐打斷，佢今次仲伸手搓我塊臉，搓到我說話都講唔清楚。
 


家姐：「你仲想用呢個樣用到幾時呀？你用阿明既樣講呢d野個感覺真係好奇怪，快d除左佢啦。」
 
係佢咁「善意」既提醒之下我亦別無選擇，只好伸手將呢塊覆蓋我成塊臉已經幾個鐘既「面膜」同假髮除下，仲順勢深呼吸左一下。
 
佢亦十分體貼，隨即幫我散開我個把束起太耐既長髮。
 
呼…終於可以正正常常抖啖氣喇。
 
我：「佢一定都係用左呢件野先咁容易混入到個比賽度，仲成功對個傻仔落手。」
 
家姐：「你覺得會係邊個？男定女？」
 
我：「我真係唔知，可能甚至唔只一個，要查下先可以下定論，但我真係無諗過佢哋會對個傻仔出手…搞到佢而家訓左係醫院，令Sarah佢哋咁擔心…」
 
無錯，我個心而家除咗愧疚之外乜黎都無，就算有都只有對唔住呢三個字。


 
家姐：「哎唔好擺個咁既樣啦，喊苦喊忽都唔襯你。啊係啵，不如聽日我安排你去醫院睇吓佢？」
 
「如果佢知道自己既二家姐有去探佢，個傻仔一定會好開心架~」