《無啦啦多左幾個家姐同細妹Season 3》: 回歸
嗯…？嘩屌好攰呀…成個身都好似俾鉛壓住咁…
話時話...我係幾時訓著左架…我印象中我仲係渡假村入面架…
啊…我諗都係因為太攰所以先會暈低架啫，唉真係失禮死人，居然係咁多人既埸合暈低。
我訓左幾耐？見出面個天咁光，睇怕我都起碼訓左成日啦…唉睇下電話睇下有冇人搵過我先。
講開又講…呢度又係邊度？點解我會…哇屌！！！我訓左成個星期？？？做乜撚野呀！？
正係我仲係度整理緊思緒，打算搞清楚到底發生左咩事既時候，房門就被人打開左。
但走入黎既唔係Sarah佢哋，而係大家姐，佢今日既衣著同個日既好唔同，今日非常平民look，就只係tee加條短褲。
係喎我暈個陣大家姐應該都在場，佢應該知道我發生左咩事先係。
大家姐：「哦？終於醒左啦？等我一陣呀我去叫醫生黎幫你check下。」
我：「醫生？呢度係醫院？？」
大家姐：「傻既，咁樣既架局唔係醫院唔通係機鋪咩？真係要快D搵個醫生幫你check下，唔好亂走呀，我好快返黎。」
佢無等我既答覆就再一次離開左間房，又剩低我一個人。
我呢個時候先識望望周圍，周圍都係儀器，啊果然係醫院…
我做乜會搞到入左醫院架…
我仲未搞清楚個答案就已經有幾位醫生護士入左黎幫我檢查，問呢樣又問個樣，呢個情境令我諗起獨角獸第二集入面既巴納吉，又係同我一樣咁俾人問呢問路，仲要自己仲未清楚發生咩事。
唉…有冇人可以同我解䆁下發生左咩事先呀…
儘管我好努力去尋找機會去問，但好可惜，根本無咁既機會，對方妙語連珠，就好似機關槍咁對我瘋狂掃射，到我稍稍鬆一口氣既時候，佢哋已經走哂，病房裏只係得返我同大家姐。
大家姐：「啊係，等我打俾Sarah佢哋話俾佢哋知你醒返先，佢哋幾個知道你出左事不知幾擔心呀，日日都..」
我：「咪住先大家姐，係通知佢地之前我想知自己出左咩事先…點解我會訓左係醫院？」
大家姐：「嗯？頭先醫生無話你知咩？」
屌…就算有我都聽唔清楚啦…講得咁快…而家我諗返個頭都仲有D痛添呀…
我搖搖頭，大家姐見到我咁既反應亦嘆左一口氣。
大家姐：「簡單D黎講就係你中左毒，不過好彩既係比較輕微，暫時黎講對身體無乜大影響咁喎。」
中毒？我？幾時既事？
呢三個問題一係我腦入面提出，我已經自動load左一個人樣出黎。
大家應該都知我諗到既人係邊個，無錯就係Ashley。
除咗佢之外我都諗唔出仲可以係邊個了。
不過話中毒…我係點中毒架？食野中？唔會吖我食既野同阿Ray佢哋一樣，如果我中毒佢哋都會中先係。
係喎一陣仲要打俾佢哋同佢哋道歉先得，唉訓左成個禮拜好多野要pick up返。
仲有要諗下辦法去查下Ashley既底細先得，我好想知道到底佢點解會對我恨之入骨。
加上如果掌握到佢既野，應對佢都會比較容易，至少唔會完全被動先。
唔…呢件事應唔應該同大家姐講好呢？佢而家已經係公司既話事人，日理萬機大把野要處理，都係暫時唔好煩到佢好D。
大家姐：「嗯？做乜事？想食橙？」
我：「啊唔係…只係咁岩發緊呆啫…」
吖屌原來自己唔覺意一直望住坐係一角係咪度玩個橙既大家姐，今鋪真係尷尬囉。
大家姐：「放心啦佢哋黎緊架啦，好快可以見到佢哋。」
說話一講完，就聽到有人拉開房門，而且仲要係好大力個隻，嚇左我一跳。
果然，入黎既就係佢哋幾個，我既幾位公主。
無見佢哋一星期，呀應該係兩星期先岩，佢哋好似瘦左D？哎邊有可能吖，係我幻覺啫。
奇怪既係，我心入面明明好想見到佢哋，但當我見到佢哋既時候居然真係一句野都講唔出口，只係想好好望住佢哋幾個。
係前面既係Sarah同Ellen，佢哋兩個同我四目交投之後就亳不猶豫咁撲向我既床邊，捉住我隻手。
相反，Ellie同Yui就顯得十分冷靜，只係跟住Sarah佢哋慢慢行埋黎。
Sarah：「點呀阿明，你見點呀？有冇邊度覺得痛？？」
Ellen：「你係咪傻架？之前咪話左佢係中毒，又點會覺得痛呀？」
我：「其實都唔係架，我而家都覺得少少痛…」
Ellen聽到我話痛嚇到花容失色，即刻問我邊度覺得痛，仲叫Ellie快D去叫醫生黎。
但Ellie並無照做，只係笑左一笑，睇黎我既諗法已經被佢睇穿。
我：「你哋D指甲插到我手啦…」
佢哋兩個聽到我咁講又嚇到即刻縮手，但係兩條友對望左一陣之後就察覺到自己上左我當，一人醒左我食一拳，好彩都係細細力，唔會痛。
望住佢地四個，頭先一直盤繞係我腦入面既部署同諗法都被一掃而空。
嗯，而家就暫時放低，好好享受同佢哋既時光先啦。
我假咳左兩聲，清一清喉嚨，準備好跟住落黎想講既野。
我：「好對唔住！要你哋擔心我！雄心壯志去參加個比賽居然會搞到中毒都有！」
我偷偷抬頭望下佢地，想話睇下佢哋會有咩反應，點估到佢哋全部都係笑笑就算，好似完全唔當係一回事咁。
Sarah：「算啦，我哋都慣架啦，最緊要係你哋無事~」
Yui：「阿明你有冇乜嘢想食？話我知等我去準備比你食吖。」
Ellie：「啊，差D唔記得，我哋仲有一位特別來賓黎緊，阿明你應該好想見到佢先係。」
特別來賓？邊個呀？
「係咪講緊我吖~~？」
呢把聲！！唔通係！！！
我一聽到呢把聲就即刻變得坐立不安，雙眼亦馬上望左向門口，期待住聲音既主人入黎。
唔洗幾秒，就有一個身影走左入黎。
Anna：「好耐無見啦，傻~仔~明~~」
真係Anna…佢返左黎…