《無啦啦多左幾個家姐同細妹Season 3》: 讓我走
馬鞍山去赤柱，其實都幾遠。
所以我收到個訊息之後咩都無諗，直接離開間屋，出村截左架的士就飛去赤柱。
而家既情況真係一分一秒都唔可以浪費。
未試過坐一程車係咁唔安樂，好似比蟻咬咁。
好想快啲可以去到赤柱，好想合埋眼再睜開就去到。
可惜現實就係現實，無可能做到數位旅行，人仲係要被重力束縛，車仲要係路上面行。
萬幸既係今日既路面情況尚算可以，只係用左九個字左右。最麻煩都係個條大老山隊道，好似行極都行唔完咁，坐到我個人幾炆。
不過沿途Ashley都無再Whatsapp我，我諗即係代表二家姐仲係佢個邊所以先唔方便聯絡我，好事黎。
為免打草驚蛇，我叫司機係遠少少既位置俾我落車，而唔係係正大門口。
門口旁邊仲有部車，相信係二家姐既車，就係吳因為咁我更加唔可以打草驚蛇，如果仍佢一陣直接跑上車開車走人我就真係碌柒，唔知點追佢。
唔...但係我應該要點入去呢？直接禁鐘？唔會咁直接掛...
「喂，陳煒明。」
我一邊行一邊諗入去既方法，直至有人叫我個名我先知我已經幾乎行到去間屋度，我而家正正就係架車旁邊。
而叫我既人亦係架車旁邊，睇佢個pose似乎係企左係度好耐。
呢個人就係已經好耐無見既阿日，啊唔係...應該叫佢...咦？我好似唔知佢叫咩名喎哈哈哈，尷尬囉。
我︰「Hi...好耐無見...」
只係識講呢啲，真係尷尬。
佢似乎好不滿我既態度，反左一下白眼，之後就掃下自己件衫既塵。
日︰「Ashley同我講哂啦，而家佢就係入邊同Ashley傾緊計，你行車庫呢道門入去啦。」
佢既爽快令我有啲愣然，佢而家比我既感覺直頭好似變左另一個人。
無左個份...戾氣...？唉我都唔知點講先岩。
雖然知道情況可以話係刻不容緩，但當我跟住佢行左入車庫，即將進入大宅既前一刻，我都係忍唔住開左口問。
我︰「點解要幫我？」
佢無馬上答我，只係望住前方既大門，其實有無望我都唔知道。
日︰「我都唔知，或者係覺得只有你可以令家姐回心轉意，因為佢一直都好在意你。」
「我都唔想家姐突然消失唔見左人，始終佢對我好重要，就好似你係佢心目中既咁。」
我都係咁諗，所以我邪而家先會係度。
我無再多言，只係拍拍佢膊頭，之後就越過佢，自己打開左大門。
但無諗過既係，一開門居然就見到二家姐。
佢就係我面前經過。
當然佢都發現到我啦，我又唔係咩透明人。佢一見到我就已經大吃一驚，仲後退左幾步，撞到係佢背後既Ashley。
二家姐︰「點解你會係度！？」
本身我諗左好多野想同二家姐講，想動之以情去說服佢留低，但當我真係見到佢既時候，我居然一句說話都講唔出口，成個人Freeze左係度。
二家姐︰「你同我走，即刻。」
未等我破冰，佢就已經踏出下一步，一下推開我，行去車庫。
如果唔係有阿日係我後面幫我擋住既話，我諗佢已經開車走左了。
日︰「喂陳煒明，你到底係為左啲咩先走黎呢度？」
…
為左唔比二家姐走...
手開始郁得返，但仍然係度震緊...
喂...郁呀陳煒明...再唔攔住佢既話就黎唔切架啦...你唔記得自己應承過Sarah佢地啲咩嗱？
你今日走均全港九新界咁辛苦到底係為咩呀？為左見佢呀！而家佢就係你面前，你居然連郁都郁唔到？你唔撚係呀？
二家姐︰「阿日讓開，我係時候去機場，飛機唔等人架乖啦。」
點解你可以咁決絕...明明你一直以黎都...
你而家連再望我一眼都唔肯啦？
無錯，佢只係望左我一眼，然後就沒有然後了。
Ashley︰「家姐...點解無啦啦要走啊...唔係係度好地地架咩？」
家姐︰「唔？唔係你地之前一直催我叫我快啲返去架咩，我而家肯走你地又唔高興嗱？你兩位少爺小姐真係好難服侍喎。」
講大話...
阿日︰「如果真係好似你所講既咁，點解唔叫埋我地一齊走？」
阿日既問題簡而精，一下就問到問題既關鍵，二家姐一下子都唔知點應對，咩都唔講。
好死唔死既係，Ashley居然再補多一刀。
Ashley︰「你係咪唔要我地啦...」
老實講，再鐵石心腸既人聽到呢句說話都無可能唔動容，二家姐都係人，而且係同佢地兩個相處左幾年既人，聽到呢句絕無可能一啲反應都無。
咦？我啲手腳...開始郁得返...？
不過就算係咁我都無輕舉妄動， 因為我好怕行錯一步會嚇走佢。
二家姐︰「對唔住。」
雖然只有短短三個字，但好明顯已經感覺到佢動搖緊，甚至可以透過聽到佢既索鼻聲察覺到佢開始控制唔到自己既情緒。
我︰「我...」
本身終於叫做諗好應該講咩先好既我，卻因為佢突然行動而被迫將所有說辭吞返落肚。
佢講完對唔住之後就推開左阿日，想行去外面。
我當然唔會俾佢咁做，如果佢係呢度走左，都唔知要去邊度先再搵得返佢。
所以留俾我既選擇就只有一個。
就係上前捉住佢。
此時此刻，力度呢啲野我都無辦法兼顧得咁多，只係諗住可以夠力留住佢。
而我亦的確做到，二家姐馬上就停低左，但仍然背向我，令我無辦法望清佢既容貌。
呢樣都未係最重要，重要既係呢刻我留得住佢先。
至少呢刻我係咁諗。
我：「一直以黎都好多謝你為我做左咁多野，特別係創業基金既事，我知道係你既主意。」
「雖然唔可以話好成熟好叻，但我已經唔係以前個個咩都要人幫我做哂既傻仔，我已經可以自己努力架啦。」
「所以你都無需要一直匿埋係暗處為我地做咁多野，返黎屋企啦好唔好。」
「屋企就係要黎返去，屋企人就係要齊齊整整架嘛，二家姐你話係咪？」
一輪嘴講完之後，成間空間都靜左落黎，無人出聲。
我甚至以為時間凍結左，但二家姐下一個行動打破左我呢個幻想之餘更打破埋空間既寧靜。
佢一下甩開我隻手，終於肯正面面對我。
但佢而家呢個眼有淚光既樣，再一次嚇到我。
二家姐：「求下你，比我走好無？」
第一次...二家姐第一次求我...
唔知個下自己諗緊咩，我居然放左手。
二家姐無放過呢個機會，馬上就奪門而出，我卻係呢個時候先回過神。
我︰「你到底仲想逃避到幾時呀！！」
可惜既係，佢並無因為我咁講而停低，反而繼續離開。
我唔甘心，唔甘心就咁就比佢走。
所以我決定追出去，點都要再說服佢多一次。
不過，門外居然仲有其他人。
大家姐同晨哥居然都黎左。