「Hello呀Man!」我未開口同呀Man講嘢,Tracy佢竟然先行前一步,同呀Man打招呼。

可能呀Man無諗過Tracy會出現係到,我見到佢露出愕然嘅神情。

「Hi。」呀Man佢望住我,好似想我解釋下明明只係邀請我一個人,但係點解會多咗個人係到。

「我咁啱係街撞到Tracy,佢話都想嚟睇妳嘅畫展⋯⋯所以佢先會跟住嚟。」我見呀Man表情咁冷漠,我就立即將手上一束乾燥保鮮花遞到佢面前:「妳話送花牌誇張,所以我專登去買咗束乾燥保鮮花比妳。我見妳有好多飾物呀,隨身物品好多都係紫色,所以我先揀咗紫色。」

呀Man接過花禮貌咁向我道謝:「多謝⋯⋯」



唔知點解佢又好似同我有種距離感,唔知我又做咗咩嘢,定佢心情唔好,所以先對我咁。

「妳個畫展係咪到六點完呀?」

「係呀。」

我望一望隻錶,宜家都差唔多四點半。

「等陣完咗不如大家一齊食飯呀。」Tracy無啦啦開口講。



我同呀Man聽到成個人呆咗係到,我無諗過佢會提起食飯呢件事,我完全唔知佢心裡面有咩打算,我只係feel到佢對呀Man有啲敵意,佢係咪咁想食咗我呀⋯⋯

呀Man望住Tracy靜咗一陣,然後話:「好呀。」

聽到呀Man咁講,我又呆咗。

「哈哈⋯⋯今餐我請啦。」同兩個靚女食飯,我點都要盡紳士風度,請晒佢哋食飯。

不過千奇唔好比Tracy揀餐廳,唔係嘅話我又會被劏。



忽然有工作人員行埋嚟,係呀Man耳邊講咗幾句說話,之後呀Man說同我講:「你哋繼續參觀住先,我要去見一見客人。」

呀Man走咗之後,我一擰轉面就見到Tracy向我露出甜美嘅笑容,唔知點解呢一刻我覺得佢個笑容唔再甜美,係我眼中好似係一個別有用意嘅笑容。

「我哋係到再參觀一下,如果行完仲未到六點,我哋再去其他樓層睇下。」

「好呀。」

我係畫展到行咗兩個圈,逗留咗一段時間。但大部分時間我都唔係睇緊畫,我嘅視線都係喺呀Man到。

「呢幅畫又幾靚喎。」Tracy佢嘅說話將我視線拉返去佢身上。

「係⋯⋯係呀。」我一望幅畫先知原來我又企咗係啱啱畫得好似我嘅畫前面。

我望咗一陣然後然後向一邊嘅工作人員招手。



「Gary你想買畫呀?」Tracy見到我有咁嘅舉動有啲驚訝。

「係呀。一場嚟到點都買幅支持下。」

「唔該,我想買呢幅畫。」

「唔好意思呀,呢幅畫係非賣品。」

非賣品?

我望咗望先發現原來呢幅畫係無價錢牌係到。但我無諗過唔係有人買咗,而係非賣品。
已有 0 人追稿