[校園][純愛]《幸運星下的預言》: 第六十四章

大家都知一班人去camp

去到夜晚就梗係圍埋一齊啦

傾計有玩遊戲亦都有

我地都唔例外，

成班不論男女全部去晒男仔房



小弟乃正人君子

絕對唔會做出道德淪亡嘅事

突然間

唔知邊條友無啦啦話講鬼故

有啲就係好驚



另一啲就話好想聽

話唔驚咁樣喎，

我唔知係咪扮野啦

不過你問我嘅話，

我就答你唔驚靈異嗰啲野



第一我真係未遇過

咁你未遇過好自然就覺得冇野架啦

利申返先

我冇否認呢方面的而且確存在喺世界上

如有得罪多多包涵啦

早幾年夜晚未打機嗰陣，

間唔中都會屎忽痕上網睇鬼故

純粹覺得好刺激



有啲我覺得真係恐怖

就會記咗入腦

不過嗰陣好多人分享鬼故，

咁我自己就摺埋先啦

聽下佢地講乜都好，

一路聽一路發現嚟嚟去去都係嗰啲

有個鬼故咪話有個女仔個頭喺地下嗰度嘅



一個就話喺公廁坐緊嗰陣望上去就見到有個女鬼

有個直情話係我地學校附近

一路講嘅時候，

坐我隔離嘅筱瑜係咁捉實我手臂

未試過佢咁大力揸實我隻手，

咁梗係望住個同佢玩下啦

我:「驚呀」

筱瑜:「係呀



不過又想聽喎」

我:「我知

你捉得咁實」

筱瑜:「咁咋嘛

就算係又得唔得丫」

我:「唔得一早fing開你啦

係你咋第二個冇呀」



點知俾佢隔離嘅映彤聽到

映彤:「你兩個真係好骨痺囉」

筱瑜:「唔使理佢呀

佢成日講埋啲咁嘅野」

我:「唔使理佢呀

佢成日想聽我先成日講」

筱瑜:「痴線都冇人講過」

我:「痴線我同你使講出聲嘅咩」

映彤:「冇你兩個咁好氣」


跟住我地就繼續講，

原本一路都冇野嘅

突然間有條友講咗個好多人驚嘅鬼故

我就覺得ok啦

亦都係因為咁所以印象唔深刻

依家叫我講返出嚟真係有啲難度

不過嗰陣大家死寂一片，

呢個時候副主席問咁多位重有冇

咁我見終於冇人爭，

就自告奮勇開聲講

我:「我有一個喎想唔想聽

唔係講笑我本身真係唔算好驚鬼故

不過呢個真係有啲恐怖

好多年前睇依家都重記得」

成班人就話好呀好呀

呢個時候，

有條友無啦啦出聲

佢本身都係喺間房不過就冇行過嚟聽鬼故

咁佢講咩呢，

無聊人:「好呀好呀傑哥講鬼故一定唔會驚」

重要一路笑一路講

我心諗屌你丫

咁樣講擺明落我面啫

好等我一於chok埋把聲講

我:「話說喺某一日

小明想跑步減肥

咁樣就去咗屋企附近嗰條海旁跑步啦，

嗰條係一條單程路嚟

即係去同埋返都係同一條

喺去嗰程嘅時候，

小明無啦啦跌咗支水

理所當然烏低身執啦，

跟住無啦啦望到後面見到有條友著得非常奇特

全身都係黑色，

佢就覺得奇怪

最奇怪嘅係，

嗰條友企定定喺度望佢

佢嗰陣唔肯定呢條黑衣人係咪跟蹤佢

於是，

佢執返支水之後繼續跑

一路跑一路望後面，

跟住佢發現呢條黑衣人又即刻跟住佢跑

嗰陣覺得唔緊要啦地方咁大佢做唔到咩嘅，

又或者可能都係跑呢條路啫

呢條係單程路咁梗係跟住佢啦

最奇怪嘅地方就喺度喇

當佢跑完第一程準備調轉頭回程嘅時候，

佢竟然見唔到呢個黑衣人

第一呢條路係單程路，

照正常情況佢擰轉面就一定見到

左手邊就係海旁

如果跌落水一定聽到啦

右手邊就冇路嘅，

嗰陣佢發現黑衣人嘅時候已經係中後段

而且亦都見到佢一路有跟住跑，

所以如果你話個黑衣人可能一早走咗啫，

呢個喺時間上係唔吻合

因為嗰陣嘅距離根本唔足以趁小明回程嘅時候

一支箭跑返嚟起點，

點都會見到佢嘅背影

於是小明就覺得好怪，

第二日第三日繼續跑嘅時候，

呢件事一路發生

又係每次偷望後面嗰陣都會見到有個黑衣人跟住跑

不過一回程就見唔到，

如是者小明開始徬徨

就叫一個有陰陽眼嘅friend靜靜雞喺佢後面一齊跑

最好唔好咁貼因為唔想俾黑衣人知佢有個friend

所以特登留後啲，

當呢個計劃進行完之後，

嗰晚佢地冇溝通

直至第二日先講返，

佢個friend就同小明講，

佢話黑衣人其實唔係人嚟

重話其實唔止黑衣人一個

嗰度起碼有六七個跟住佢一齊跑

只係小明你睇唔到啫，

自此小明就冇再去過海旁跑」

講完之後，

正當我諗住嚇到大家冚家產嘅時候

點知佢地竟然喺度笑

重問返我係咪完架喇咁樣

我:「唔驚咩」

無聊人:「話咗傑哥講唔驚架啦」

主席:「唔該晒你呀傑哥

多得你先至可以舒緩氣氛」

跟住成班竟然喺度笑

我咁俾心機特登chok聲講

重將我畢生聽過以嚟最驚嗰個鬼故拎出嚟分享

得到嘅竟然係恥笑

簡直係離晒譜，

你知唔知將鬼故講到變笑話咁，

係一樣好羞恥嘅事

自此我發過誓，

我係唔會再講鬼故

係一定唔會。