[校園][純愛]《幸運星下的預言》: 第八十一章

我記得嗰晚真係瞓唔著

你話我戇鳩仔都咁話

聽日要表白咁大件事，

我真係做唔到處之泰然

一路喺度諗



究竟要點講好呢，

「我好鍾意你不如拍拖啦」

咁樣講都成功

就真係要本身好靚仔先得

好明顯我就唔係啦



你知啦女仔好鍾意嗰啲屎忽野

又要有心機

有心機之餘又要俾佢見到你誠意

都唔知點解咁鬼煩

冇計啦食得鹹魚抵得渴



即使自己攞苦嚟辛都冇辦法

瞇埋對眼輾轉反側

都重係冇乜頭緒，

毒撚真係毒撚

對呢啲野一竅不通

去到最後無啦啦就瞓著咗

諗住喺夢入面拎靈感

點知都係唔得



一起身都係冇任何突破性進展

算數啦出到嚟先算啦，

或者到時靈光一閃呢

不過都係要問佢今日想去邊

於是我就即刻sms佢

我:「今日你想去邊」

佢好快就覆咗我



筱瑜:「你話事啦我冇所謂」

我:「講真同你出去

地點從來都唔係主角」

筱瑜:「咩意思呀」

我:「你知嘅

見你鍾意聽先講咋」

筱瑜:「痴線架無啦啦話人鍾意」

我:「係喇係喇



咁你想去邊」

筱瑜:「尖咀囉好冇」

我:「好，

食完晏一齊去」

筱瑜:「好呀」

我:「喂係喇，

今日俾啲驚喜你



你等住收」

筱瑜:「邊有人會將啲驚喜講出嚟架

重要講到等住收命令咁樣」

我:「屌俾定啲心理準備你啫」

筱瑜:「係咩

我鍾唔鍾意架」

我:「肯撚定好鍾意」

筱瑜:「唔係喎唔係好鍾意咋喎」

我:「我都未講

你又知我講乜」

筱瑜:「唔知呀唔知呀亂咁講咋」

好彩依家係打字

如果係傾電話，

佢一定又喺度語無倫次唔知噏乜

我:「鬼馬喇你」

筱瑜:「都唔知你講乜

唔傾住喇一陣見啦」

咁樣傾完之後信心又大咗

希望真係冇諗錯。


點講都好

今日都係我諗住表白嘅大日子

自己就梗係執正啲啦

我記得嗰日用髮泥對住塊鏡

起碼搞咗三四個字

點樣順眼啲呢

又唔想太浮誇

俾佢一望就望到我今日特登gel咗個頭

嗰幾個字就係咁喺度慢慢整

整到啱心水為止

好彩我個人就唔多汗，

所以唔洗點樣勁噴

好似平時咁就得

好多男人完全唔理三七廿一，

係咁喺度噴

有咁多噴咁多

其實我覺得止汗劑古龍水呢啲假若噴得太多，

會有反效果

所以我自己從來都唔會採用乜都唔理有野就噴呢種態度

陣間等到隔離嗰個就唔好啦

衣著我就唔想太誇張

屌你表白啫，

都唔使著老西出街

同埋我估佢都會行返casual look

所以我覺得好似平時咁著就得

搞完一輪，

各自食完晏

我地就約咗喺巴士站等，

好簡單純粹貪有得坐

我自己就早咗到，

唔緊要啦，

寧願早啲出門口慢慢行過嚟

冇幾耐就見佢行緊過嚟

大家離遠望到已經喺度笑，

其實都真係唔知笑乜

自從同佢越嚟越熟之後，

佢展示笑容個頻率就越嚟越密

上身著咗件淡黃色薄褸

亦即係嗰日我同佢買嗰件

唔好話我認叻

真心覺得佢著上去幾靚

我:「真係有著喎

以為你求其敷衍算數」

筱瑜:「有人好小器呀

唔著嘅話我驚俾佢鬧到我畢業」

我:「痴線真係唔小器」

筱瑜:「嗰日少少野都係咁講呀

唔小器」

我:「上車啦使乜講咁多」

我唔記得有冇喺度講過，

喺度再講多次啦，

筱瑜佢話過搭交通工具嗰陣唔會瞓覺

所以唔會有嗰啲挨膊頭嘅情節出現

好彩架車冇乜人

所以可以大聲啲傾計

其實嗰陣都坐得好埋，

手臂互相都掂住

我係咁望住佢隻手，

好唔好依家就拖落去

不過萬一佢唔鍾意的話

會唔會即刻走呢

話就話佢好似鍾意我啫，

不過原來去到想表白嗰刻都重係會有好多忌諱

筱瑜:「望咩呀」

我:「坐你隔離重可以望啲咩」

筱瑜:「點知你個變態佬呀」

好彩冇同佢講

唔係佢可能真係話我變態佬

嗰陣心諗重有大把時間，

一於享受埋呢段獨處時光先。