[校園][純愛]《幸運星下的預言》: 第八十二章

落到車我真係叫佢話事

想去邊就去邊

完全唔使理我呢條友

大家都知今日出嚟目的

根本就唔係行街



所以喺邊度睇乜野梗係佢決定

我成個腦就喺度諗

點樣開口先至好

行行下見到一間手飾舖，

筱瑜見到兩條手繩



問我買唔買

筱瑜:「小器鬼買唔買呀」

我:「買咩」

跟住佢就指嗰兩條電話繩

我先知係佢講乜野



驟眼睇應該係情侶裝

同款唔同色

一條淺藍一條粉紅

細路女都重係細路女

果然鍾意呢啲花巧野

筱瑜:「點呀鍾唔鍾意呀

你鍾意就一齊買

兩條平啲呀



最多我俾埋喇

因為我覺得真係好靚呀」

佢講到隻眼發光咁樣

我覺得ok啦

咁又唔會咁唔俾面話佢

我覺得唔係咁靚咋喎

呢啲說話咁唔識做我又點會講呀



唔好話對住佢，

對住其他人都係啦

佢講到咁樣再問埋你，

都係想你認同

你第一下就話唔得人地點諗

諗住同你分享點知你踩到咁盡，

我真係覺得咁嘅行為唔多尊重人

我:「好，



不過唔使你買喇

我俾埋啦」

筱瑜:「點可以要你俾晒

又唔係你話想要」

我:「即係我想要你就送俾我」

筱瑜:「痴線都唔知你講乜

依家排隊呀」



其實咁樣撚下佢真係幾好玩

佢好搞笑架

永遠都係拋得一句痴線都唔知你講乜

不過佢可能唔知啦

嘴角不知不覺間出賣咗佢喇

我就實知因為每次都眼定定望住佢

每一次都係。


買完之後佢話不如依家綁喺電話度

我:「唔好啦返去先啦」

筱瑜:「返去俾邊個睇呀」

我:「哦原來係想俾你睇」

筱瑜:「今次係丫我唔會否認」

我:「會唔會又扮唔知呀

快啲講啦

話唔知我講乜」

筱瑜:「痴線都唔知你講乜

Er」

我:「話咗你啦

繼續講丫繼續講丫」

筱瑜:「好煩呀」

哦，

原來「痴線都唔知你講乜」之後，

就會講「好煩」

等我記住呢個未來女朋友嘅野先

當然啦呢個只係我單方面ff

同埋講真嗰句，

邊度使特登去記丫

一直以嚟聽都聽唔少啦

唔係想講啲乜

喺學校大家就已經成日接觸，

返學放學又係

每次佢講嚟講去都係呢幾句

你估我真係太無聊冇野做咩

佢呢個樣吸引到我

我先走去撚下佢啫

其他男仔我唔知啦

亦都冇資格代表咁多位男性，

我只係講自己，

唔會無啦啦去做一樣對我自己冇意義嘅事

我估佢唔知，

以為我好無聊成日去撩其他女仔

我成日講嗰句，

見佢鍾意聽先講

其實絕對係真話

佢唔信就係另一件事啦，

不過一路講咁多廢話，

小弟都重未有頭緒點樣講好

我都知你地好想屌我

講真我努力緊架喇

或者嗰陣真係完全未開竅喇

完全唔知溝女第一件事就係唔怕輸

又或者，

可能真係好重視

重視到要諗得過分仔細

唔容許有半分出錯

不過點都好，

我一早決定今日要講

所以最遲係落到巴士送佢返屋企嗰陣

希望一切順順利利

唔好有咁多阻礙，

天時地利人和，

最希望就係有天時又有地利

就算去到最後，

真係咁唔好彩原來人不和

起碼都可以怨自己

邊度做得唔好，

又或者可能真係唔啱

點樣都叫做有個解釋，

天與地，

真係冇得怨

好耐之後先發覺，

失敗絕對唔係最慘嘅事，

而係當失敗嗰陣，

自己冇得怨天怨地，

連失敗者應該有嘅權利，

都被剝削埋

咁先係絕地。