[校園][純愛]《幸運星下的預言》: 第八十三章
筱瑜:「搞掂
依家咁靚晒喇」
我:「係喎
好靚喎部電話依家」
筱瑜:「um
你可以再假啲」
我:「認真講
我本身就真係唔鍾意呢啲飾物
真係俾面你先戴上去
第二個睬佢都傻
老母都唔例外
筱瑜:「咁你咪好偉大囉
伯母你都推咁佢有冇話你死人頭呀」
我:「嗰次佢買咗條唔知乜撚
好似鎖匙扣如果我冇記錯,
咁我就覺得唔靚
同埋好阻埞
我擺落去褲袋又覺得好重
跟住咪話唔要
所以你話我幾俾面你
你講一句靚我即刻買」
筱瑜:「咁你今次會唔會嫌嗰條繩好長好阻埞架」
我:「你買就梗係唔會啦
點樣阻埞都要
部部我都綁住」
筱瑜:「多謝你咁俾面喎
咁樣傑哥我地依家食野啦」
我:「好」
可能你地冇乜概念啦
嗰個年代智能手機唔係依家咁流行
仍然係推機又或者嗰個摺機年代
用我僅餘嘅記憶力講,
sony同埋nokia喺嗰陣好紅架
十個有八個上堂嘅時候
都會喺櫃桶嗰度進行激烈嘅手部運動
郁得大力又驚俾老師見到
又驚撳錯喎
以前電話係有掣撳個個都知啦
撳錯隔離掣已經係兩回事
唔好講咁多廢話驚大家唔啱年代唔鍾意
總之同今日嘅電話係完全唔同啦
跟住去食飯冇乜特別
食完就準備搭巴士走,
都係正常情節
一路去緊巴士站嗰陣見到我地想搭嗰架巴士
又難得嗰陣條街唔多人,
咁我地亦都唔知架巴士幾耐一班
最驚就係錯過一架然之後要等好耐
以前邊度有巴士app睇
跟住我就問咗佢一句
我:「點樣跑唔跑」
筱瑜:「你話事啦
不過我驚唔夠你快同埋撞到人
到時跑完又追唔到咁就無謂啦」
呢個時候我唔知邊度嚟嘅勇氣
一隻手捉住佢跑,
真係好似拍戲咁樣
當然都要多得條街冇乜人配合
我兩個先可以咁順利啦
人多就麻煩,
喺人群中間拖住個女仔風馳電掣
你估咁易咩
嗰啲真係拍戲就得
如果條街嗰陣係多人嘅話,
我就未必咁主動拖佢隻手
講明先佢話驚我先捉佢
絕對冇抽佢水
純粹追巴士啫,
咁當然,
點都拖住一個女仔,
梗係唔可以太快
真係追唔到咁都冇辦法
等下一架嘅話點都好過有任何人受傷
不過咁,
好彩架車喺街口紅燈停得耐
我地都及時趕到
跟住梗係上車啦仲有咩做呢
我:「攰唔攰呀」
筱瑜:「冇野喇抖返順條氣喇」
我:「咁就好
睇你個款完全唔似有做運動
估唔到跑落去又唔係」
筱瑜:「多得你拖得好啫」
係喎呢個時候講一講,
我先發現原來我仲拖緊佢
跟住大家面對面對望
我唔知佢咩感覺,
總之我就緊張到爆
成個腦又短路咗幾秒。
筱瑜:「光明正大抽水喎」
我:「er
冇心冇心」
不過呢個時候其實我仲未放手
嗰陣一心諗住搏懵
佢冇叫我放我就唔放
筱瑜:「咁依家仲拖住嘅」
我:「係囉
我都唔知點解」
講就咁講啫
其實嗰刻真係好驚
雖然我知得米機會好大
你見佢依家重未鬆手就知
不過點講都好,
始終都係面對面咁拖住
佢又唔係瞓著咗冇知覺
我又係一個小毒毒
緊張我都覺得係合理
筱瑜:「唔鬆手」
我:「咁你又唔鬆」
筱瑜:「唔知呀我睇你呀
如果你唔鍾意……
咁我就鬆架喇」
我:「你都痴線點會唔鍾意
我驚你唔鍾意咋
不過依家睇可以有排拖喎」
筱瑜:「你唔止小器
重要冇膽呀」
我:「今次又咩事呢」
筱瑜:「鍾意人又唔敢講
重要搵表弟去套我
如果我唔係咁樣放風俾表弟,
都唔知你呢個冇膽鬼等到幾時」
哈哈原來一切都係佢計劃之中
原來由一開始已經知我想點
佢真係犀利,
永遠都可以洞悉先機
等我重以為自己好醒
我:「你叻囉咁樣
咁你又唔講」
筱瑜:「呢啲野點敢講呀
你估我唔驚咩
你知你啦講野浮誇到不得了
我同你講鍾意咗你好耐又唔知你會點諗喎
如果你唔鍾意好尷尬架嘛」
我係唔會同佢講其實我都係咁諗
我:「之前點浮誇都好
今次都一定唔係
知唔知我等呢日等咗幾耐
有得拖住喎重放手」
筱瑜:「係呀
我唔係成日俾男仔拖住我隻手呀
第一個就係你個冇膽嘅小器鬼」
我:「你估我見人都拖咩
原本都諗住唔拖做一個浪子
點知見到你
即刻就改變初衷啦」
筱瑜:「誇張到死」
我:「不過講真丫
話晒依家身份唔同咗,
都冇理由成日叫我做冇膽嘅小器鬼」
筱瑜:「知喇
男朋友」
佢個男朋友講得特別細聲
重要成塊面都紅晒
佢咁白其實好明顯
我都冇乜見過佢呢個樣,
我:「聽唔到喎
大聲啲可唔可以
可唔可以講多次嗰三個字」
筱瑜:「小器鬼又玩人
小器鬼小器鬼小器鬼小器鬼
聽到未呀咁多次」
跟住我即刻拉佢個人過嚟我嗰邊
細細聲同佢講聽到
筱瑜:「嗯」
我未見過佢笑得咁甜
呢一刻我或者明白,
點解我一直以嚟都為咗呢件事諗咁多野
不斷諗所謂嘅部署跟住去實行
無聊係無聊咗啲,
不過佢呢個笑容就係最好嘅收穫
我都估唔到呢個咁垃圾嘅表白計劃
竟然咁都俾我過骨
真係符碌撞棍,
再有多次都唔得
係得佢先至咁包容。