[喪屍][人性?][政治?]在喪屍橫行的年代裏，我只想做一個人: 21 契約 中
雖然附近幾乎不可能出現喪屍，但我們還是帶上了武器才出門。今夜月色很美，微風吹拂，弄得那些矮樹叢沙沙作響，像是有甚麼會突然出現。我們走到一個山坡上。
「我哋有幾耐冇好似而家咁兩個人傾計？」
「大概有五分鐘左右。」
「屌你，」他拍了我一下，「畀你搶埋搞笑呢個角色，我就咩價值都冇哂架喇。」
「唔係吖，起碼你係白詠欣可以依靠嘅對象。」
他默默的望著地上，良久才說：「頭先我送咗白詠欣上房，佢喊咗好耐，同我講咗好多嘢之後先迷迷糊糊咁訓咗。之後我去咗睇白詩婷......佢剩係食咗少少嘢，好多都食唔落，食咗嘅又嘔返出嚟。佢仲發緊燒，一日十幾次咁腹瀉，屙出嚟嘅全部都係有血嘅液體......咁樣嘅情況已經持續咗三日。我同白詠欣都束手無策，退燒藥同抗生素都已經畀咗佢食，但係都唔知道係咪真係有用。」
「其實，到底白詩婷係幾時開始病？」
「我哋到石屋之後嘅一晚，第二日就開始係咁。曾經有懷疑過係咪食物，水源嗰啲有事？但我哋全部人食嘅飲嘅都係同一樣嘢，就係唔知點解得佢有事。不過其實都唔太出奇，白詩婷......佢只不過係個得十歲嘅細路女，抵抗力自然比我哋差，而且又成日食啲罐頭呀餅乾嗰啲，又唔係食得飽......營養不良加抵抗力低，搞到佢而家病到咁嚴重。」
「唔通......真係冇哂辦法？」
他搖搖頭，「最大問題係我哋唔知道白詩婷到底係有咩病。白詠欣佢雖然係護士，但咁嘅情況下佢除咗盡力照顧妹妹之外都做唔到啲咩。所以佢先咁沮喪同咁無助......而家，唯一嘅希望就係，白詩婷佢自己意志可以戰勝到病魔。但係，唔好忘記佢只有係得十歲咋，要佢自己一個去對抗，咁樣真係太殘忍......」
我們靜靜的看著流動的溪水，沒有說話。之後，他突然問：「喂......你到底係咪鐘意呀嵐架？」
「吓？點解咁問？」
「大哥，傻嘅都見到啦，佢對你個態度同其他人都唔同，你哋又行得咁埋......但自從嚟咗呢度之後，你對佢又好似不冷不熱咁。」
「......我對邊個都係咁上下架啦。」
「呢個就係問題。嗰個小剛，似乎對呀嵐佢有意思。你見唔到咩，呀嵐嚟咗呢到之後，就成日提住小剛，而小剛都成日同呀嵐佢一齊。」
「我冇乜留意。」
「屌，你再唔表態，同佢曖曖昧昧咁，你某一日就會突然發覺佢對你嘅態度就變得同其他人冇分別，佢會去搵第二個架喇。好似之前咁冇人同你爭就話啫，但小剛佢不論樣同才能都好過你，你拍馬都追唔上呀......再唔去馬就等食塵啦。」
「使唔使咁講到咁盡呀師傅。」
「即係咁講呀！你再係咁，一個咁好嘅女仔就會畀人搶走架喇......老實講，你到底係咁鐘意呀嵐架？」
「我唔知要點講......我覺得我應該係鐘意佢，但又好似唔係好踏實。佢有啲性格我幾鐘意，有啲特質幾吸引我，我想見到佢笑，我想同佢一齊，我同想佢上床......」
「哈......你到底想講乜嘢？」
「我喺度諗緊，我哋所謂嘅鐘意......所謂嘅愛情係點樣嘅一回事。我哋就係因為自己唔完美，因為自己孤獨，所以先會想去接近另一個人。我曾經有過幾段關係，我曾經好想同某啲女人做愛，當然大部分時候呢啲念頭都只不過係念頭，而同我一齊過嘅女人有好多都已經冇聯絡......我哋知道我哋只不過係互相滿足對方，但即使嗰啲比較穩定嘅關係入面，我哋又何嘗唔係只係互相滿足？因為我哋成為唔到完美嘅人，因為我哋自己有自身嘅局限，所以我哋先會去追求另一個人，可以令到自己完滿嘅另一個人——就好似柏拉圖所講，每個人都係唔完整，所謂愛情就係要搵到另一個人，令到自己變得完滿。所以你見到，其實所謂嘅鐘意一個人，都不過係鐘意嗰個想像中完滿嘅自己。即係話，其實我哋鐘意嘅人由此至終都係自己，而所謂嘅鐘意另一個人，只不過係人將自己嘅想像投射到嗰個人身上。」
「......你成晚坐喺度，就係諗緊呢啲嘢？」
「有一部分係。」
「老老實實，你講嘅嘢我一句都聽唔撚明，」他不在乎的擺一擺手，「屌你老味係就係，唔係就唔係啦，冇啦啦搞咩中二病思想家上身做乜鳩，突然返老還童咩。」
「我只不過係對自己誠實。」
「唉，你好自為之啦。」
之後我們就在石屋附近走來走去。
農地位於石屋左方，大約走五分鐘的路程，一塊小草地之上，旁邊就是之前我和杜嵐抓魚的小溪。此時草地已經開墾了大半，並且已經播種。種子和用具都是由小剛他們提供的，但數量不多。對毫無農耕經驗的我們而言，這次不過某程度上是在實驗而已。
我們走到農地上。剛由樹林探頭而上，尚未步入農地的範圍，就已經看到田地上有一團巨型的黑影，在地上不知翻找著甚麼。我們馬上停著，但已經驚動了牠們。這時蓋月的烏雲飄去，赫視發現那是一頭巨大的野豬，另外有幾隻小的，眼睛黑得發亮，正惡狠狠的瞪著這邊。
我們下意識的退後兩步，捏緊了手上的武器。
我雞皮疙瘩。牠們為甚麼不走？野生動物通常會迴避人類，因為牠們知道人類的可怕。是因為病毒爆發了不過三個月左右，牠們就變得不再害怕人類？看清我們根本對牠造不成任何傷害？對峙的時間只有數秒，但我腦海已經閃過無數念頭。要立即轉身逃跑？誰知道牠們會不會衝過來——
下一秒，其中那頭大野豬已經向我們衝過來。
我和呀禮轉身就跑，「做乜撚嘢冇啦啦跑過嚟呀屌！」
雖然手上有武器：我手上的是一支鐵鎚，呀禮手上的是消防斧頭，但面對一頭這麼巨型的野獸，區區兩人怎可能打的贏。
我們跑回身後的樹林，因為樹木的關係野豬的步速有所減慢。我們躲在一株大樹後。
「屌，隻豬係咪食錯藥呀！」
「佢好似當我哋仇人咁，一見面就衝過嚟！」
「唉陷家鏟，好似仲未肯走......駱輝，你去望下佢走咗未？」
我背貼樹幹，打算極輕極輕的探頭而出，卻已經感受到一股溫熱，濕暖的氣息。
「嗄嗄嗄......」
牠就在我旁邊出現。
「屌呀！！！」
我和呀禮立即逃跑，野豬在後面窮追不捨。我們在樹林中左穿又插，就是不走出樹林，因為這樣就連僅有的屏障也失去。
「呀禮，你走先，去搵權叔佢哋過嚟！」
「你......」
「你隻腳有傷，再跑個傷口又會裂開，呢到我頂住先，你去班馬！」
之前幾天已經稍為摸熟了附近的地型，但那是白天的事。雖然月色很好，但眼前看到的每株樹，走過的每一段路，都似曾相識，又似從未看過。突然在眼角瞥見今早杜嵐提過的陷阱，我心意一動，直直的奔向那個陷阱。
我小心的避過地上觸發陷阱的魚絲，一邊稍為的收慢步速，打算看牠會否中計。只見牠衝到魚絲，觸發了陷阱，瞬間一根削尖了的木棒就往野豬的左側衝至，直直的插入身體。
牠馬上停住，身體劇烈的顫抖一下，插在身上的木棒掉下，然後又像沒事人似的衝來。
外皮竟然如此的堅韌？我這樣想著，又馬上繼續跑，回想著到底甚麼地方還有陷阱。意念一轉，我左拐跑向另一個地方。
我的體力有限，不可能持續和野豬這樣跑下去，必須要找個方法令牠失去行動能力。我轉而跑向一個繩索的陷阱。
「噶噶噶......」
「嗄嗄嗄......」
看著吊在樹上的野豬，一邊調整呼吸。這是杜嵐之前向我展示的陷阱，想不到竟然當晚就發揮功效。野豬巨大的身軀懸在空中，輕輕搖晃。四隻肥壯的手腳不斷晃動，魚絲緊緊的深陷野豬的身體。
不知呀禮把權叔他們喊了過來沒有，雖然野豬已經受縛，但我沒有能力去把野豬擊斃。我舉起鐵鎚，打算去把野豬擊暈時，卻見吊著野豬的樹支嚴重彎曲。
說時遲那時快，那根樹枝正開始斷裂，而野豬的身體慢慢下沉。不消二十秒，樹枝正式斷開，一部分連著綁在野豬身上的魚絲。野豬一落地，只是抖動一下身子，又往我這邊衝過來。
正當我打算轉身逃跑時，突然聽到「轟！」的一聲，緊接就看見野豬停下了，左邊的身體中槍，暗紅的血液流出。
「駱輝！」
杜嵐握著手槍跑過來，我問道：「只係得你？權叔同呀禮佢哋呢？」
「我哋係分頭過嚟搵你架！......首先要將隻野豬引去——」
我拉著杜嵐逃跑。野豬中槍後未見膽怯，反而不知為何激起了牠的怒火。拖著中槍的身軀，牠不顧一切的追過來，來勢洶洶的像是要殺死我倆。
「到底點解隻野豬會無啦啦追住我哋架！」
杜嵐轉身打算射擊野豬，但牠一見杜嵐手上的槍舉起，就立即狂叫一聲，加速前衝。
我不知道自己正跑向甚麼地方，只是在樹林中左右穿插。杜嵐向野豬又開了兩槍，一槍落空，另一槍則擦過牠身子。
為甚麼牠總要窮追不捨？牠剛剛中槍，加上跑了有一段的路程，感覺上牠體力應該消耗了好一部分，跑速已經放緩。
「噶噶！」
野豬猛然止步，原來是中了一個捕獸器，帶鋸齒的鐵夾緊緊的咬住牠的左腳。野豬吃痛的不斷大叫，掙扎，但愈掙扎傷口就愈嚴重。
我和杜嵐看著野豬。先是高聲嚎叫，晃動身子掙扎，然後漸漸靜了下來，也不再掙扎。牠身上的長毛烏黑得發亮，在月光下顯出淡淡的褐色。一呼一吸之間，身體緩緩起伏，棕黑的眼睛死死的盯著我倆——我感覺一個生物在死亡之前的覺悟。
左邊的矮樹叢突然傳出動靜，接著另一隻野豬步出，緊接的是幾隻小野豬。在前的野豬原本步向那隻中了捕獸夾的野豬，中途瞥見我們，陡然止步，然後又退後兩步。這時我才發覺那隻野豬有點跛足，已經身體有不少傷痕。
我突然在想，那隻野豬如此衝動，是否因為另一隻，滿身傷痕的野豬而如此憤怒？
「駱輝...... 不如我哋放過佢，好冇？」
我沒有回應，她拉拉我衣角，「佢哋......應該係一家人，嗰隻後面跟住好多豬仔嘅係媽媽，呢隻就係爸爸。頭先咁嬲，應該係因為嗰隻媽媽受傷，佢就以為我哋係凶手。」
我沉默了一會才說：「......如果殺死呢隻野豬，我哋就唔使再捱餓。」
「但我哋都唔係捱餓呀。我哋可以去捉魚，可以去摘野果，出面搵嘅食物等等，都可以支持得住。」
「如果你唔想郁手，咁就等我嚟。畀把槍我。」
「我......我只係......」
「畀把槍我。」
她低頭想了想，把槍交了給我。
我瞄準野豬的頭部，準備開槍之時，手忽然不由自主的在顫抖，另一隻手按緊那隻在狂震的手，想要瞄準，但根本做不到。
「駱輝，你......有冇事？」
我猛然的搖搖頭，此時手終於不震了，於是我殺了受縛的野豬，另一隻野豬一聽到槍聲，劇烈的顫抖一下又退了一步，瞪著我們，過了兩三秒，大野豬帶著其他小野豬隱沒在樹林之中。
這頭野豬有近數十斤，只有我們兩人根本搬不動。我讓杜嵐去找人幫忙。之前被野豬追趕時竟然跑到一片從未來過的地方，杜嵐花了好長時間才找到回石屋的路，直到差不多破曉時權叔他們才抵達，連同呀禮等人把這頭野豬抬到石屋。