[喪屍][人性?][政治?]在喪屍橫行的年代裏，我只想做一個人: 78 選舉 上
「——所以如果你哋見到題目入面有括號，就先計咗括號入面嘅式，之後先計埋外面嘅式。無論係括號外面同裡面都要記得先做乘除，之後先做加減...... 」杜嵐一邊說，一邊在黑板上寫下數條數式，「我見大家對呢類題目嘅概念都唔係好熟悉，所以喺我哋再講落去之前呢，我哋再做多幾條類似嘅題目先啦......大家首先自己試下做，之後先再講答案。」
「老師！我呢到點解錯呀？唔係話先乘除後加減咩？」
杜嵐走了過去，看著學生案上用紅筆圈著錯處的習作簿，耐心說道：「先乘除後加減嘅意思，唔係一定要做咗乘法先做除數嘅意思，而係......」
「老師！」此時又有另一名孩子舉手叫道：「老師！變態哥哥又嚟搵你喇！」
郭伊騏拉開窗戶，說道：「呀嵐，你出一出嚟，我有嘢要問你。」
杜嵐一愣，經過那天在會議上的針鋒相對後，她不知道要用甚麼態度去面對兩人，更遑論郭伊絲被褫奪職權後，郭伊騏會有多不忿，所以她忐忑不安的走出班房，作好被質問的準備，豈料郭伊騏卻是一臉緊張，劈頭一句問道：「家姐有冇搵過你呀？」
「佢？佢搵我做咩呀？」
郭伊騏憂心忡忡的抓一抓頭髮，喃喃自語，「所有同佢熟嘅人我都搵過哂，冇一個人見過佢！......」
「郭伊絲佢......發生咩事呀？」
「今朝一起身就唔見咗人，檯上面剩係留低咗呢張字條！」
杜嵐接過郭伊絲的字條，上面只寫著：「外出拜訪終端，勿念。」
「嗰個白癡都唔同我商量吓，就咁自己走咗去！」
「佢話要去搵終端......即係代表要聚集一大批喪屍。」
郭伊絲憤然的點頭，「所有負責出去搜索同攻擊軍隊嘅喪屍都話冇見過佢，而且都聽唔到有其他喪屍擅自離村，睇嚟條友下決心要自己搵答案......咁搞法都唔知要去邊搵佢！」
杜嵐若有所思說道：「佢會唔會係搵村外，佢識嘅人去幫手？」
「嗯......」郭伊騏想起甚麼似的雙手一拍，隨即又陷入沉思，「唔會，嗰個人決定咗自己獨自承受嘅話，就唔會去搵人幫佢。」
郭伊絲決定獨自尋找終端，大概就是受自己在會議上的一席話所影響，於是杜嵐歉然說道：「如果你有咩事要我做，甚至要出村搵佢，我都可以幫手。」
郭伊騏瞟了她一眼，又忽然嘆了口氣，「算啦，其實都唔可以怪你嗰日咁講......你只不過係將所有人嘅疑慮講出嚟，如果呢件事解決唔到，佢遲早都要去搵終端。」
「有件事我唔明白......點解郭伊絲要咁執著要兩軍停戰？如果真係停戰，呢條村就再冇存在意義，原本係保護者嘅喪屍就會變返侵略者......」
「家姐佢......佢一直係我哋嘅領袖，而為咗所需要嘅資訊，佢必須要深入咁讀取喪屍嘅大腦。你都曾經試過控制喪屍，係咪？當你同被控制嘅喪屍連結嘅時候，有一種好似被吞噬嘅感覺，因為嗰個時候你大腦被其他喪屍嘅記憶入侵，但由於控制嘅喪屍數量多，而且只係要單方面下達指令，所以你同每個喪屍嘅連結只係好片面，就算係咁，你都已經明白嗰種感覺並唔好受，係咪？」
「嗯，有種好似自己唔再係自己嘅感覺。其他人嘅感情仲有思想不斷咁湧入，實在係好唔舒服。即使係而家，有時個腦都會突然閃過一啲唔屬於自己嘅記憶......」
「......為咗得到情報，家姐每次只會讀取一個人嘅記憶。咁做雖然可以得到最全面同詳細嘅資料，但代價就係佢被迫咁親自感受每一個喪屍生前嘅經歷。過程只有短短兩三分鐘，但對家姐嚟講好似過咗幾年咁漫長，每一個人死前嘅痛苦，悔恨，遺憾，悲慟，家姐都要一併承受。如果只係好似電影或者小說被動接受，或者終有一日會麻木，但每一次嘅連結都係對大腦嘅直接刺激，記憶中每一次經驗都好似頭一次體驗咁，所以對家姐嚟講，佢已經死過無數次，失去過無數家人，經歷過無數次嘅痛苦......所以，我諗，即使唔知道應該點做都好，佢仍然堅持去做，因為呢個係令佢脫離痛苦嘅唯一方法。」
「如果真係咁嘅話......」杜嵐喃喃自語，「如果真係咁，直接放棄呢一切，唔好再干涉人類嘅生活，呢個唔係就係最直接嘅解決方法咩？」
郭伊騏一呆，默默的點頭，「其實我都係咁諗，但每次我咁樣同家姐講，佢就會唔理我，自己一個走開......只有我講呢個話題佢先會有咁嘅反應。」
「喂，郭伊騏，終於搵到你喇。」兩人望向音源，只見一名喪屍控制者走近，他一邊走一邊道：「村公所嗰邊而家召集緊所有喪屍同人類代表去開會，選舉新嘅執政官，人都差唔多到齊喇。」
「新執政官？家姐一走咗，你哋就咁急住去搵人代替佢？」
「吓？.......郭伊絲走咗？」
郭伊騏手一摔，恨恨的說道：「今日我一起身就見唔到佢喇！」
「哦......就算係咁，佢都一早被罷免，點都要再選過個新架啦。」
郭伊騏白了那人一眼，深呼吸一下，忍住怒氣，「......算啦，呢件事去到村公所再講。」
說罷，郭伊騏逕自前行，那人卻叫道：「等等！」然後望向杜嵐，「所有喪屍控制者都要出席，你都要過嚟呀。」
她望向學校，欲言又止，「但係......」
「你之前都有嚟投票，你都知議政係所有喪屍控制者嘅責任，雖然唔係強制性要做，但選執政官呢件事，你冇理由唔去。」
杜嵐一愣，隨即點點頭，「......我明白喇。咁你哋去先，我要安排好班學生先可以去。」
她回到課室，此時沒人看管的教室已經吵成一團，杜嵐不得不訓斥他們幾們幾句，待到秩序回復時才宣佈她要到村公所開會，今天的課就此完結，寫在黑板上的算題就當作家課。她會到各學生家提醒家長來校接送，期間指名由李亦康替她管理秩序。
「吓，唔好喇掛，又係我......」
「你上次唔係做得好好咩？我返嚟嘅時候同學都冇出意外，證明大家都願意聽你講。我唔喺度嘅時候就靠你喇。」
上次是指參加罷免郭伊絲投票的事，那也是被拉過去的。李亦康搔搔頭，「好麻煩......不過既然你咁講就冇辦法啦......」
當杜嵐處理好所有事情趕到村公所時，除她以外的有投票權的人類和喪屍已到齊。
其中一位資歷最深的喪屍控制者道：「既然人齊，咁我哋就開始啦。」
在這個團體初期發展時，郭伊絲與治下的人類和其他喪屍控制者訂立了類似憲法的規條，最初只是數條簡單的法律，到這個群體規模突然擴張時，規例也隨即增加，但最核心議會組成辦法的條例一直沒變，執政官的選舉辦法倒是後來才加入。
郭伊絲在位時，雖然議會中的各個派系都渴望掌權，但郭伊絲畢竟是創辦人之一，各方派系即使瞧不起她，也要在表面服從她的領導，但在村內村外各種明爭暗鬥在她被彈劾前已經十分激烈，她在離村前那段時間已經控制不住議會，甚至被架空——不然也不會如此輕易就被撤職，而且有那麼多人響應。郭伊絲本來就對村中各種政治鬥爭沒有興趣，又加上她在議會的發言被質疑，各人逮到這個機會把她踹下台，而這次選舉則成為了各派系政治爭鬥的舞台。
「所以家姐一走，你哋就原形畢露啊......」郭伊騏抱著胸，冷眼看著議會中各派別的激烈辯論，不發一語。
坐在旁邊的杜嵐低聲問：「你唔同佢哋講郭伊絲走咗嘅事呀？」
「今日我搵過嘅人都喺齊到，既然冇人提呢件事，證明佢哋都根本唔在乎。」
早在郭伊騏到場前，在坐的人已經得知郭伊絲失蹤，這對覬覦執政官之位的人而言簡直是好消息。本來仍然傾向讓郭伊絲繼續擔任執政官的少數人，此時對她大為失望，這些人亦陸續被其他勢力拉攏。
一開始各參選人會就村子的內政和外交政策等問題展開討論，之後就會有一段休息時間，期間各大候選人和他們的競選隊伍並不會閒著，他們在各選民之間走來走去，在最後時刻游說別人投給自己的候選人。
休息期間村公所暫時不淮進入以待舉行投票，這時所有人類和喪屍代表，以及一眾沒投票權但關心投票的人類，齊集在村中廣場。杜嵐和郭伊騏坐在廣場邊的長椅上，兩名看像屬某競選人的喪屍代表向杜嵐道：「杜小姐，你之前喺臨時會議嘅演說實在係發人深省，完全講中哂我哋想講嘅嘢。或者你新加入，所以唔知道，我哋嘅一號候選人係呢條村入面資歷最深嘅喪屍控制者，可以話係呢個團體嘅創立人之一。」
「係......係呀？」杜嵐尷尬笑著，下意識的瞄一瞄身旁的郭伊騏，只見傲然地看著前方，對這兩人不屑一顧，而兩人亦刻意忽視郭伊騏，只向杜嵐拉票。大概是拉攏杜嵐這一著引起其他競選隊伍的注意，剛打發了一隊走另一隊就緊接而來，到所有競選隊伍離開，終於可喘一口氣時，才發現郭伊騏已經悄然無聲地走到不遠處的長椅上。
杜嵐坐在一旁，乾笑道：「佢哋真係好煩，趕極都趕唔走——」
「你唔需要考慮我諗乜，如果有你屬意嘅人選就直接投票畀佢啦......呢個機制係由家姐創立嘅，目的就係想尊重每個人嘅意見，所以你根本唔需要理我。」
「......我始終認為郭伊絲係最適合帶領呢條村嘅人。」杜嵐細語輕聲，「呢條村之前係由獨裁者統治，而且用宗教去迷惑村民......負責傳教嘅神父，即使佢係真心相信宗教可以拯救人，佢到最後都被獨裁者利用。郭伊絲並冇用好嚴厲嘅法律，甚至係獨裁手段去管理，佢只不過係抱住人同喪屍可以共存嘅可能性，親力親為咁去實現呢一點......一條人同喪屍並存，而且冇殘酷法律存在嘅村，竟然都可以運作得井井有條，我覺得呢一點已經好厲害。雖然呢一切係建基於他人嘅痛苦身上，但郭伊絲並冇合理化呢一點，而係一直咁嘗試搵解決辦法......如果係其他人，可能會忽視呢一點，但郭伊絲反而選擇直接面對，甚至親自感受被犧牲者嘅痛苦。所以，我仍然覺得畀郭伊絲帶領係最好。」
郭伊騏喃喃自語：「但你明明公開質疑過家姐呀。」
杜嵐默默地嘆氣，緩緩說道：「因為我自己都唔知道，到底係咪應該相信佢......或者到底係咪存在人同喪屍，喺唔出現犧牲者嘅情況下，可以共存嘅可能。我想去相信郭伊絲可以搵出嗰個方法，即使呢個可能性係幾咁渺茫......」
「既然係咁，」郭伊騏站了起來，「呢場選舉結束之後，我哋去搵家姐啦。就算嗰個白癡想獨力承擔，呢次點都唔可以畀佢亂嚟。」
杜嵐一愣，回道：「魯莽呢一點，你同郭伊絲都係一模一樣......如果係咁，咁睇嚟我要搵人代課喇。」
郭伊騏摸著後腦傻笑。他們一邊說著無關選舉的瑣事一邊走回村公所，剛好趕上投票的開始。投白票的兩人坐著等，直到結果宣佈，由一名最初就追隨郭伊絲的喪屍控制者勝出。
「各位，我係黑沙圍新任執政官李忠浩。首先我要多謝各位投票畀我嘅村民代表......」選舉結束後，新任執政官站在村中廣場的講台上發展就職演說，「......相信大家都清楚知道，呢次之所以會重選執政官，係因為議會罷免咗首任執政官，亦都係我哋一直以嚟嘅領導者郭伊絲，所以先急需要搵人去擔任呢個最重要嘅職務。郭伊絲被罷免嘅原因，相信大家亦有所耳聞——佢希望帶呢條村前進嘅方向，並唔符合本村嘅利益，加上種種原因，議會先會喺呢個兵荒馬亂嘅時候將佢辭退。呢個係我哋作出過最為沉重嘅決定，但基於現實嘅政治環境考量下，呢個亦係不得不作出嘅決定。」
坐在台下的郭伊騏翹腳叉手，閉眼皺眉聽著李忠浩的演說，聽到對方提起郭伊絲，不禁搖頭罵道：「荒謬！」
現處除講者的聲音外，突然插入這樣一句，令人為之愕然紛紛察看誰在說話。李忠浩雖然清楚聽見，但裝成甚麼也沒聽到，繼續道：「有一點我希望大家了解......黑沙圍到底係一個咩地方呢？係一個人同喪屍共存嘅地方。我相信好似黑沙圍咁嘅地方，喺全香港，甚至全世界都絕無僅有......前任執政官郭伊絲，係抱住『拯救人類等同拯救喪屍』呢個信念，創立咗呢個團體。我必須要講，佢係正確嘅，但只會有一部分人被拯救——不論係人類定係喪屍。我相信呢一點各位或多或少都心裡有數。問題係，點解只有我哋被拯救？仲有，到底係邊個『拯救』我哋？係郭伊絲？當然唔係！我哋有今日嘅生活，在於我哋擁有自治，我哋擁有法律；對法律嘅尊敬同執行，先係令人同喪屍共存嘅唯一方法——而呢啲法律，係由我哋自己創立，由我哋自己決定執行。外面嘅人，如果佢哋想嘅話，佢哋自然可以建立一套屬於佢哋法律，但事實上，佢哋為咗一己私慾，選擇互相殺戮。所以我要做嘅事，不外乎只係繼續沿襲黑沙圍過往嘅方針，繼續對外攻擊，不論外面係戰爭狀態定係和平，因為咁做係令我哋得救嘅唯一方式，即使咁樣意味住有好多人因此被犧牲。郭伊絲一直堅持所有人都可以得救，事實上就係要犧牲呢條村，所以——」
「你亂講！」郭伊騏愈聽就愈覺得聽不入耳，一聽見他又詆毀姐姐，再也按捺不住，霍地站起，衝到台前，嚷道：「家姐佢由此至終都堅持要搵出人同喪屍共存嘅方法！如果佢真係打算犧牲呢條村，咁佢就唔會一直仆心仆命咁為呢條村做事啦！」
「......但如果真係有所謂嘅和平，郭伊絲又打算點樣帶領呢條村？定係佢打算解散呢條村？如果唔係，你點樣說服村民繼續同喪屍住喺同一條村？」他面向村民，繼續道：「唔通各位仲想返去舊日嗰種擔心被喪屍襲擊嘅日子？假如外面已經達至和平，就會變返人同喪屍嘅戰爭，唔通你唔係已經對嗰種日子厭倦喇咩？我嘅目標——我不厭其煩咁講多次——我只會著重呢條村嘅利益，除此之外嘅一切都唔重要！」
李忠浩這樣說完，台下一片掌聲和喝采，甚至掩蓋了郭伊騏的呼喊。
「拍咩手呀？唔好忘記係家姐收留你哋咋！你哋而家咁算點呀？你哋咁樣仲對得我家姐住咩？」
杜嵐到台前對郭伊騏低聲道：「佢哋呢個時候唔會聽你講架喇......因為佢哋最初入村嘅目的就係想要安穩呀。」
「如果唔係我同家姐一開始好心收留，佢哋會有今日所謂嘅安穩咩？」他轉向台上的李忠浩，怒道：「我今日就出去搵家姐返嚟，等佢同你哋澄清，佢根本就冇打算要犧牲黑沙圍！」
李忠浩冷冷一笑：「你唔記得喇咩？任何人未經批准擅自離村，自動視為被驅逐出村，即使返嚟都唔會被容許入村！」
郭伊騏為之一愣：佢當然知道這規例，但自從這規例訂立以來，從未真的動用過，只是用以警戒村民，不可隨意離村。郭伊騏心知在這一點上的確理虧，但仍然口硬：「家姐佢......佢一直係我哋嘅領導人，你哋憑咩驅逐佢！」
「呢條法律係經議會通過，就算係郭伊絲都要遵守。」他頓一頓，「郭伊絲佢冇任何理由就離村，加上佢喺政策上唔係真心為本村著想，我有合理懷疑佢可能想背叛黑沙圍......所有同郭伊絲有密切關係嘅人，包括你同你身邊嘅杜小姐，睇怕要接受我哋嘅監視，同時你哋都唔可以出村。」
「荒謬！你憑咩咁做呀！」
「就憑我係執政官。」
郭伊騏怒氣沖沖，作勢想爬上講台，其他喪屍控制者，甚至連他身旁的杜嵐都馬上制止他。他抓著杜嵐手腕，本來已經赤紅的雙眼此時彷彿紅得要滴出血來，惡狠狠的盯著杜嵐，無視身邊想要拉開他的其他喪屍，一字一頓的道：「你點解要阻住我？你唔係企喺我呢邊架咩？」
「但係！......就算你打佢都無補於事呀！」
「放屁！如果一開始你冇喺議會入面咁講，件事就唔會搞到今日咁！」
「就算我——」
「我唔想再聽你解釋呀！」郭伊騏使勁一推，杜嵐被推倒在地，而郭伊騏像頭受傷的猛獸，被其他喪屍控制者制服，帶離現場。
接下來的日子，郭伊騏被軟禁在自己的寓所內，杜嵐三番四次想探望郭伊騏，甚至只是帶些東西給他也不得要領。杜嵐雖然在村中仍可自由活動，但一舉一動都被李忠浩安排的人監視。
「......所以呢，水嘅固體就固體就係冰，氣體就係水蒸氣。當冰變成液體嘅過程就係融化，由液體變成氣體嘅過程叫蒸發，咁由固體直接變成氣體又叫咩呢？」
雖然已經過了兩個星期，但李亦康仍然覺得有外人在場，令他渾身不舒服。即使被監視的是杜嵐，卻覺得自己也被監視一樣。他不時回頭，看著坐在最後排負責監視的婦人，直至她神色不善地回瞪，他才吐吐舌頭，準備望回黑板——
「亦康，你識唔識呀？」
「......吓？」
李亦康緩緩望向杜嵐，一臉漠然。
「由固體變成氣體嘅過程叫昇華。」杜嵐一邊看著手上的殘破不堪的舊教科書，一邊把字抄寫下來，一邊說道：「亦康，你最近成日都神不守舍。如果你有心事，可以同我講呀。」
似乎是你比較有事吧——李亦康這樣想著，又迅速往後方瞥了一眼，然後向正在抄寫的杜嵐含糊的「嗯」一聲當作回答。
關於執政官選舉的事，雖然從來沒人向他當面說明，但從父母和其他大人的閒聊之間也隱約明白了七八成，當然也得知郭伊騏被關的消息。奇怪的是，杜嵐在選舉的第二天，只是向他們公佈從這天起會有人觀課，竟然就像沒事人般繼續授課，也看不出她情緒有甚麼影響。據說郭伊絲跑了，郭伊騏被關了，她就沒一點感覺嗎？或只是在逞強？李亦康知道事情發生了，但不知道為何發生，更看不透杜嵐在想甚麼。
過了不久，遠方傳出一陣喧鬧，像是有好幾批人在大聲指罵似的，而且聲源愈來愈接近，孩子們本來已經不怎麼專心，這時更是紛紛走到窗前，踮起腳尖，好奇地察看外頭。
「火呀！有火呀！」一名孩子叫道，指著遠方的圍牆，只見牆上冒起幾個火頭，這是有外敵入侵時升起的狼煙，而在更遠的森林，幾道黑煙裊裊上升。正當教室內的人全神貫注望向外頭時，又傳來一陣急促的敲門聲，杜嵐跑去應門，來者劈頭就道：「你係杜嵐老師係咪？你快啲帶班細路去避難，佢哋就殺到嚟喇！」
「佢，佢哋？」
「森林到突然出現大批士兵，向黑沙圍前進！你快啲帶班細路去村公所啦，我仲趕住去通知其他人呀！」