一返到學校,就已經見到操場嘅每一個角落都逼滿咗等上禮堂嘅學生。

第一件事就緊係揾下有冇熟嘅人可以埋堆啦,如果唔係一個人企喺到會好悶㗎嘛。

行咗一個圈,小雲又唔見,阿天又唔見,淨係見到Zoe同雯雯。

不過Zoe又同佢嗰班個靚仔企埋一齊,我冇理由過去啫,咁我唯有過雯雯嗰到啦。

其實我同雯雯都只係傾過一兩次計,唔係話真係咁熟。





「Hello~ 我冇阻住你嘛?」我尷尬地說。

「估唔到係你喎。冇啊,我都係自己一個咋嘛」

今次係第一次真正望住雯雯,但係佢真係好似有種氣場,搞到我唔敢同佢雙眼對望。

「阿天呢,佢冇陪你咩?」

「有啊,今朝先一齊食完早餐。佢要上去禮堂練琴嘛,咁我唔阻住佢啦。」雯雯笑一笑。





「哦…」

一時間諗唔到有咩新話題,搞到場面又有少少尷尬。

點知雯雯主動撩我講嘢,

「怕羞仔,做咩唔敢望住我講嘢嘅,我個樣嚇親你咩?」

大佬,你叫我點應啊……





「唔睬人嘅,唔玩你喇都係。話時話你個女朋友一陣比賽喎,有冇買定啲燈牌舉下呀?」

吓,佢應該講緊小雲??一陣比賽??

「點解你個樣仲呆過啱啱㗎,你唔係做人哋男朋友連人哋要比賽都唔知嘛?」

我呢一刻真係一頭霧水,完全聽唔明雯雯講緊咩。

「唉,同阿天講嘅一樣,你係真係弱智,唔係扮出嚟㗎喎」雯雯嘆一嘆氣。

「我連續講咁多句嘢你都唔理我,真係傻傻地。行啦,夠鐘排隊上禮堂喇。」

唔通小雲參加咗歌唱比賽??

「行呀,係咪聾咗呀!!你再唔行我真係嬲㗎喇!!」





「係係係…而家行」我回應。

「校長,各位老師同學大家好,今日係聖誕聯歡嘅大日子,我哋係今日嘅司儀,我叫Chris」

「我叫Snow。事不宜遲啦,等我講解下今日個流程先。一陣首先會有話劇表演啦,然後就係獨唱組嘅比賽啦,之後仲有團體組嘅比賽。」

Chris:「咁而家請以熱烈嘅掌聲歡迎我哋話劇組嘅同學為大家表演“馬槽的故事”」

啪啪啪……

又係馬槽,個故事真係已經由細聽到大。

班話劇組仲要做得一般般,真係想悶死全場咩。





Chris:「多謝話劇組嘅精彩演出,果然好好睇呀」

佢自己講完都打咗個哈欠。

Snow:「係呀,真係好正!!啱啱對眼先享受完,又係時候到耳仔喇喎〜」

Chris:「聽講第一位參賽者有好多心事想講喎」

Snow:「咁不如我哋有請2B班嘅黃思雲同學出嚟唱我的秘密啦」

突然舞台嘅燈全部熄晒。

再開返燈嘅時候,小雲已經企咗喺舞台中間。


今日嘅佢冇戴眼鏡同放咗頭髮,令我醒返起當時陸運會個樣。





「今日我想借呢個機會唱首歌送俾一個成日都鼓勵我同支持我嘅朋友」

然後佢向旁邊點一點頭,鋼琴聲奏起。

「最近一直很好心情 不知道什麼原因 我現在這一種心情 我想要唱給你聽」

「看著窗外的小星星 心裡想著我的秘密 算不算愛我不太確定 我只知道我在想你」

「我們之間的距離好像忽遠又忽近 你明明不在我身邊我卻覺得很親」

「Ha~ 這一刻我真的想說明 我心裡的秘密 是你給的甜蜜」

「我們之間的距離每天一點點靠近 這是種別人無法理解的特殊感情」





「Ha~我要讓全世界都清晰 我心裡的秘密 是我會一直深愛著你」

「深愛著你」

估唔到又幾好聽,之前仲話自己唱歌好渣,呃人嘅。

然後阿天竟然喺旁邊行咗出嚟,輕輕拖住小雲隻手鞠咗個躬。

「估唔到佢兩個瞞住我玩音樂都唔話我知,一陣話下佢哋先」我細聲地自言自語。

Snow:「頭先真係好好聽呀,如果我係男仔一定會覺得好冧啫,係咪啊阿Chris〜」

Chris:「為〜何〜戀愛可以當做吸過半支煙 隨時不太高興將那煙蒂放一邊」

Snow:「你講咩啊,學校唔俾食煙㗎」

Chris:「我講緊嘅係3A班嘅邵莣妤同學即將為大家唱嘅歌呀,有請〜」

跟住落嚟嘅參賽者我都冇特別留意,因為我都唔識佢哋。

至於小雲有冇獎?

緊係冇啦,小雲又唔係平時唱開歌嘅人,又點會夠其他選手鬥呢。

完咗禮堂環節,就開始聯歡會後半嘅自由活動,同學都陸陸續續返去自己班房。

行緊返去嗰陣,小雲喺我身邊跳咗出嚟。

小雲:「傻仔,做咩行得咁慢嘅?」

我:「前面咁塞點行喎…」

阿天:「咁我同雯雯行慢啲,唔阻住你兩個二人世界囉」

我:「明明係你哋想二人世界,仲屈我。喂,你兩個又係學校拖住行,得唔得㗎?」

雯雯:「你拖返住你個小雲啦。呢到咁多人,一陣佢走失呀」

望下旁邊嘅小雲,原來臉都紅晒。

小雲:「行啦行啦,唔好理佢兩個」

返到去班房,大食會原來已經開始咗。


Choco:「你兩個曳喇,自己出去玩到咁遲先返嚟」

我:「邊有喎,我啱啱跟甩咗然後小雲追返我咋嘛」

Choco:「你知小雲追返你喇?」

小雲:「喂呀!!車仔,去食嘢啦,唔好理佢亂講嘢!!」

我:「哦…」

小雲:「車仔,你喺到食住嘢先,我攞張聖誕卡俾你」

小雲由背囊拎咗個粉紅色信封出嚟,再遞俾我

「聖誕快樂啊〜」

我一拎到手就忍唔住想打開嚟睇。

「傻仔,你返屋企先開啦,食嘢喇」小雲將舊pizza放上我隻碟。

聖誕聯歡其實都係想俾個機會啲同學玩下同熟啲,但係我對呢一班真係冇咩歸屬感,所以對呢個聯歡會嘅感覺都係麻麻。

食到一半嘅時候,Choco喺出面揸住支咪問大家,

「你哋仲想聽咩歌啊?」

「Smile個Butterfly啦,Choco姐,你唱呀?」Mary問。

「你都黐線,我上Youtube開俾你聽咋」

Choco講完就喺部電腦到㩒,搞咗5分鐘左右,終於有音樂響起。

「Ay, iyaiyai Ay, iyaiyai Ay, iyaiyai」

呃……呢啲咩歌嚟㗎

最憎聽呢啲古古怪怪嘅歌。

「做咩聽頭皺晒眉頭咁啊,我陪你出走廊行下啦」小雲問我。

行到出去,就見到阿天拖住雯雯行緊嚟我哋班房。

「喂,你兩個又會咁啱出嚟嘅」

「我哋諗住過嚟揾你哋影張相啊」雯雯對我哋講。

「好呀」我同小雲異口同聲地說。

「雯雯你睇下佢兩個,幾鬼夾」阿天奸笑住咁講。

呢個時候雯雯喺個袋拎咗部即影即有相機出嚟,

「準備〜」

「3,2,1 笑〜」

阿天:「點解車仔你可以影到咁樣衰㗎?」

我:「咩喎,你好靚仔咩」

小雲:「兩個都咁靚仔喇,得未?咁呢張相邊個keep好呀?」

雯雯:「不如影多3張,我哋一人一張啦」

我&小雲:「好啊」

阿天:「呢張你keep啦,影得你咁醜樣」

我接過阿天手上張相就放咗入銀包。

「其實都唔係咁醜樣啫」我細聲地說。
已有 0 人追稿