《再見了，還會再見嗎？》: 第41章 – 三人會議

為咗唔好遲到，所以我比平時早咗15分鐘出門口。

去到西鐵站嘅時候已經見到Parco喺嗰到。

佢自己一個企喺到戴住headphone聽緊歌。

「Hello~ 你都咁早嘅」我對Parco講。

佢冇應我。





係咪啲電車男都硬係鍾意戴住大大個Headphone喺到聽歌，然後拒絕同外界溝通㗎呢？

算喇，可能只係佢唔鍾意我啫，都無謂逼佢夾硬同我交流啦。

我靜靜地企咗喺Parco隔離等Lily接我哋去會所。

過咗大約10分鐘，Lily準時出現。

「Hi~ 你哋咁早到嘅」Lily離遠嗌我同Parco。





「我驚遲到要你哋等嘛」我回應。

「我原本以為係我喺到等你哋添，早知我都早啲落嚟啦」Lily講完笑一笑。

「行啦」Parco冷淡地講。

經過幾次聚會同Parco相處，發現佢係嗰種成日都會搞臭個場嘅人。

啫係明明大家都傾得好好地，但係佢就會揾啲嘢嚟反駁，或者淋熄大家把火，總之就係好難溝通。





有冇啲例子可以睇下？？

一陣傾嘢嗰陣你就知㗎喇。

Lily：「下次我哋去探訪老人，中間會有個自由環節。我諗緊不如我哋3個搞啲表演俾老人家睇」

我：「我覺得都ok，可以各自揾啲擅長嘅嘢表演下囉」

Parco：「不如叫啲老人家瞓下覺好過啦，睇咩表演啫」

聽到呢句我真係呆晒。

冇理由一場去到叫啲老人家休息啫，咁樣陳sir都會鬧我哋啦。

Parco仲要係好認真咁講出嚟，絕對唔係吹水咁亂講一兩句引下大家笑。





因為我哋兩個都怕咗佢。

所以其實之前每次活動或者討論，都只係由我同Lily兩個人傾，傾完先再將結果話返俾Parco知。

Lily：「好似唔係幾好喎」

我：「我都覺得唔係幾好，不如認真諗下表演咩啦」

Parco：「咁我表演講楝篤笑同IQ題啦，你哋自己再諗」

IQ題，你搞笑咩......

老人家嚟㗎喎，咪玩啦……

我：「不如唔好講IQ題啦，啲老人家應該唔會識笑㗎喎」

Parco：「你理得我啫，你又唔係老人家」

正常人都諗得明啦，你都傻傻地……

Lily：「一人少句啦，唔好鬧交」

你估我想鬧交咩。

係呢條友講埋啲嘢不切實際咋……

算喇，Lily話點就點，反正佢係我哋組長。

Parco：「算數，傾完我就走先喇」





我哋連byebye都未講得切，Parco就已經拎埋個袋急急腳咁走咗。

Lily：「由得佢啦。係喎車仔，你到時去到彈琴俾老人家聽得唔得啊，個社區會堂好似有鋼琴㗎」

我：「雖然我都有一段時間冇彈，不過我諗我應該冇咩問題嘅」

Lily：「麻煩晒你喇。我諗我到時應該會去跳舞，你幫我彈埋首歌ok?」

我：「乜你唔係跳啲街舞定hiphop嗰啲㗎咩？我睇你facebook icon以為你係添」

Lily：「哦，好多舞我都有學過㗎，中國舞啊，芭蕾舞啊，仲有幾款。你知㗎啦，呢啲都係俾屋企人逼下逼下，就自動變到多才多藝」

唉，講起呢個話題又有啲sad。





到底學埋學埋咁多課外活動為咩呢？

明明好多嘢都係冇乜興趣，但就要俾屋企人逼去學呢樣嗰樣。

花費咁多錢同時間，為嘅就只係嗰一張證書，諗返轉頭都幾好笑。

我：「咁你到時跳芭蕾？不如你一陣返到去send啲名俾我上網睇下份譜啦」

Lily：「唔使咁麻煩啦，你而家跟我上去咪得，我屋企都有琴」

吓，上女仔屋企？？

好尷尬啫。

「不如唔好啦，我有啲事要趕住做……」我唔好意思咁講。

「尋日又話今日全日都得閒，你係咪怕唔好意思呀？唔洗驚喎，上嚟啦，我屋企冇人」Lily大方地講。

冇人唔係仲危險咩……

孤男寡女共處一失，咁樣好似唔係幾好囉。

「我係女仔喎，我驚過你啦，都唔知你驚乜嘢」

「咁好啦，我上去一陣㗎咋……」