人要惡過車！: 第二十八章

過咗兩個鐘，終於落堂。

「不如今日去赤柱呀，我未去過。」堯說。

「好呀，行啦。」

究竟去赤柱行紅隧香隧入好，定係行東隧大潭嗰邊入好呢？哩度出返窩打老道可以直落紅隧，但驚塞好耐。不過哩度過東隧又係煩嘅，要行龍翔道落九龍灣上觀繞。

「諗緊咩呀？又諗其他女仔呀？」堯鼓起泡腮扮嬲。





「唔係呀，我諗緊行邊條路喳。」

「無所謂啦，去到咪得囉。」堯說。

「你啱，咁出發啦。」

我揀咗行窩打老道落公主道，去到理工八期附近個橋位開始塞。咁啱隔離停咗架藍色S30Z。

「師兄部DC2幾新淨喎，買咗幾錢呀？」





「你架Lady都幾正呀，把聲好好聽添。」

「多謝先，前面行啦，下次見啦。」

我閂返隻窗，慢慢塞。

「頭先架車好熟口面喎，我好似打機見過嘅。」堯説。

「你講灣岸？」





「係掛，我都唔識。」

咁紅隧香隧都係咁慢慢塞，咁過咗香隧就轉入香島道，再去淺水灣道，去到哩啲郊外地區，啲空氣都特別清新。入到赤柱，泊低架車喺海邊，望住個海。

「我都好耐無嚟過沙灘，對上一次好似係中學同啲朋友一齊去。」堯說。

「我都係，同佢地班友一齊去玩。」我笑咗笑。

「真係想即刻衝落海玩水。」堯説。

「你有泳衣咩？」我問。

「又諗埋啲衰嘢。」堯拍咗我個頭一吓。

「唉吔。」





「嘻嘻。行啦，去食啲嘢。」堯説。

食飯途中，我部電話收到來自「狗狗狗狗」嘅訊息。

皓：「下個禮拜中秋喎，有咩做？」

威：「照舊？」

Ken：「Ok呀。」

我：「Go Go Power Ranger」

皓：「咁到時見啦。」





我收返埋部電話，繼續食嘢。

「啱啱先邊個搵你？」堯問我。

「班友仔話下個禮拜去BBQ啫。」

「我又要去。」堯好似細佬女嗲阿爸咁。

「一早預咗你啦。」

「好嘢，嘻嘻。」

咁食完嘢，行多陣市集就返咗屋企。