人要惡過車！: 第二十九章 (27/07/2020 Updated Version)

咁就過咗個星期，BBQ嗰日我去拎返部EK，同埋還車，我揸返架DC2去耀哥車房。

「點呀，架車好唔好玩先？」

「掂啦，揸落好舒服，又飛嗰陣又飛得起。」

「嗱，話咗無介紹錯㗎喇。係喎，你架車粒電夠期換，就幫你換咗㗎喇，順便check過曬過車，我見個迫力皮到差唔多夠期就幫你換咗迫力皮。」

「喂唔該曬你先，前後加埋幾錢？」





「友情價就三舊啦。」

「咁益我呀？」

「得啦，到你啱傾收平啲有乜所謂。」

咁我拎返架車之後做嘅第一樣嘢就唔係去飛，係搵停車場泊低架車，我打比堯，睇吓佢家陣喺邊。

「喂，喺邊呀？」





「我哋仲喺荃灣廣場呀。」

「咁我泊低架車搵你哋啦。」

「好啦，Byebye。」

講返先，我今朝就車咗堯出嚟荃灣，佢話約咗Jenny行街。

我入停車場泊低架車，泊咗喺架黑色EF9隔離。







「架車幾靚喎，唔通你就係近排好紅嗰架白EK？」EF9司機說。

「唔係啦，我無嗰個人咁勁，你架EF9仲正啦。」

「真係幾正㗎，揸上手好舒服㗎。」

「係呀。」

「你有無Facebook呀？可以喺嗰度傾。」EF9司機問我。

「有呀，我加你啦。」

「好呀，我叫Chris Wong，icon係架EF9嚟。」





「得，搞掂，下次傾啦。」

我同阿Chris行相反方向，之後我打比堯。

「我泊低咗㗎車啦，你喺邊呀？」

「H&M呀，你上嚟搵我啦。」

「ok bye」

我搭電梯上去，話說荃灣廣場B1都仲有層商場嚟，仲有個落貨區，平時個場爆咗嘅話可以泊喺嗰度，但係要留車匙，所以我都唔會考慮。

「條裙靚唔靚呀？」





「靚呀。」

「係咪真㗎，唔好呃我喎。」

「真㗎。」

「算你啦，嘻嘻。」

與此同時，Jenny同Chris喺男裝嗰邊行過嚟。

「咦，阿Chris你喺度嘅？」

「喂，僖哥，咁快又見啦」Chris打招呼。

「乜你哋識㗎咩？」Jenny問。





「啱啱停車場識。」我答Jenny。

「你真係個個人都傾得埋㗎喎。」Jenny話Chris。

「家姐你真係當我流㗎。」Chris説。

「好啦，一人少句啦。」堯說。

「啱呀。」

「好，我比面僖哥，唔同你嘈。係喎，僖哥你又喺度嘅，你都同你家姐行街？」

「屌你醒少少啦，人哋陪緊老婆呀，邊似得你日日癡住家姐。」Jenny話阿Chris。





「哦～原來係僖嫂。」阿Chris講。

「屌條友弱智仔嚟，阿堯唔好介意呀。」Jenny講。

「我無介意呀。」阿堯塊面紅到蘋果咁。

「好啦，阻住其他人啦，去比錢啦。」

結果我就求其打圓場就算，廢事一陣真係阻住人。之後兩個女嘅去咗其他舖頭行，我哋跟喺後面。

「僖哥你真係唔係嗰架EK？」

「唔係呀，我都想識佢。」

「咁下次一齊出車去搵佢？」

「好呀。」

咁同咗佢哋行幾個鐘之後，都係時候返去BBQ。

「僖哥下次見啦。」阿Chris。

「好呀。」我笑咗笑。

咁離開荃灣，行屯公返屯門，喺麗城附近後面無啦啦有架跳燈MX5推我，咁橫掂無乜車就梗係玩吓啦，比多些少油行快啲，咁佢過多陣就爬我，再想拋離開，而我就比油追返佢，廢事咁衰下下推住人，所以我都係跟住佢行算，咁佢的確係幾快嘅，可能佢隱藏實力啦，感覺上佢都未踩盡。去到轉車站，佢都廢事玩，收返油，大家比對方個like就算，之後佢上返大欖舊路，我就繼續行屯公。

返到屯門，喺富健花園對出見到前面架Noah，即刻玩嘢閃鳩佢高燈，過多陣電話就響。

「喂，閃我做乜鳩？。」威説。

「無呀，打吓招呼啫。」我笑住講。

「屌，收皮啦。」威喺度笑，之後cut我線。

「做咩無啦啦玩人呀你？」堯問我。

「放心啦，我哋中學都係咁。」我繼續笑。

之後跟住阿威佢哋入蝴蝶灣。

———————————————————————————

注意：以下係Jenny視角。

同堯行完街就坐細佬車返屋企。

「乜你好似好鍾意阿僖咁嘅？」我問細佬。

「我硬係覺得佢係一個好勁嘅人。」細佬話。

「吓，即係點？」

「我覺得佢會教識我好多嘢。」細佬答。

我心諗：「屌哩個細佬真係癡撚線嘅，完全同佢溝通唔到。」

「哦，係呀。」我求其hea細佬。