人要惡過車！: 第三十章

同阿威泊好車之後行過去燒烤場，阿Ken同阿皓兩pair已經到咗。

「你哋做咩一齊嚟嘅？」阿Ken問

「喺富健出面咁啱見到我，屌佢條仆街仔即刻閃我。」阿威笑住講。

「你做咩蝦威威？」阿皓都笑埋一份。

「一定係咁啦。」我就梗係笑啦。





咁言談間我哋已經透好爐，可以燒。

「喂，可以燒啦。」阿皓叫班女仔。

「哦，好呀。」阿婷應佢。

咁成班人圍住個爐，當然要吹水啦。

「我隻叉呢？」阿威喺度問。





我哋成班人喺度笑佢。

「又嚟啦喎，哈哈哈⋯」阿Ken瘋狂恥笑。

「威威你唔見嘢九成都係嗰個原因㗎啦。」我都笑鳩佢。

「唉，哈哈⋯」阿威苦笑兩聲，之後行咗去阿淇度。

「今次隻叉去咗邊呀？」阿威無奈咁問阿淇。





「唔知呢～」阿淇答佢。

「點解阿威唔見嘢一定喺阿淇度嘅？」堯細細聲問我。

「哩個係佢哋兩公婆啲情趣嚟，中學開始已經係咁。」我繼續恥笑阿威。

「想當年我哋兩個睇住佢比阿淇蝦。」阿Ken話。

「屌你仲影鳩人相添。」我笑Ken。

「你唔好講到自己無咁喎。」Ken笑返我。

「中學嗰陣，威威三日唔埋就會唔見眼鏡，筆，功課，你諗得出嘅嘢都試過，而每次都係阿淇收埋，而威威都知，所以佢次次都會追住阿淇，喺我哋課室嗰層行嚟行去，但係阿淇次次都喺度撚鳩威威，但威威好嘢喎，唔只攞返自己啲嘢，仲成個人追咗返嚟。」我同堯講。

「咁我隻叉究竟去咗邊呀？」阿威繼續追問阿淇。





「自己搵吓啦～」阿淇亦繼續撚威威。

「唔好咁啦，我肚餓呀。」阿威開始求阿淇。

「擘大口呀。」阿威擘大口，阿淇將一粒啱啱燒好嘅獅子狗放入阿威個口度。

「嘩⋯熱熱熱⋯⋯」阿威即刻吸大氣。

「好唔好味呀？」阿淇好似細佬女咁嗲威威。

「好⋯味⋯」威威繼續吸大氣。

睇住佢哋兩個喺度打情罵俏，唔經唔覺太陽都準備落山，我一個人行出沙灘，坐喺度望住個海，過咗無幾耐，阿堯都行咗出嚟，坐喺我身邊，挨喺我膊頭，我硬係覺得有種講唔出嘅熟悉感。





「做咩一個人行出嚟呀？唔開心呀？」堯問我。

「無呀，一個人望住個海靜下都幾開心呀。」

「係嘅，仲要今日個日落咁靚。」堯説。

「係喎，講個秘密比你知呀。」我同堯講。

「咩秘密呀？你有第二個？」堯說。

「唔好傻啦，我想講喺早幾年前，即係我仲讀緊中學嗰陣，又係中秋同喺蝴蝶灣同佢哋BBQ，我又係一個人行咗出嚟坐，之後有個同我差唔多年紀嘅女仔走嚟聊我傾計。嗱，唔好嬲呀。」

「你咁毒都有女仔聊你？嘻嘻。」堯喺度笑。

「真係㗎，跟住我仲有燒嘢比佢食㗎。」





「雞扒同腸仔呀嘛，嘻嘻。」堯喺度笑。

「你又知嘅？唔通你係⋯⋯」我未講完堯已經阻止咗我，至於點樣阻止，嘻嘻。

過咗陣，我哋拖住手，坐喺度望住個夕陽甜笑。

「你嗰陣咁蠢㗎，唔問人攞contact。」堯話我。

「唔緊要啦，我哋依家同未來喺一齊就得啦。」

「嗯，你話㗎，唔準反口呀。」堯喺度甜笑。

「個承諾直到永遠呀。」我講。





「算你啦嘻嘻。」